Judith Estrada-Larino

Isinusulong ni Presidential Adviser on Entrepreneurship Joey Concepcion ang pag-obliga simula sa Hunyo nang pagpapakita ng booster card bago makapasok sa enclosed establishment.

Sinabi ni Concepcion na layon ng hakbang na mapabilis pa ang pagpapaturok ng booster dose at maiwasan ding ma-expire o masayang ang mga stock na bakuna.

Nangangamba si Concepcion na humina ang immunity ng mga wala pang booster shot dahil sa paglutang ng mga bagong variant ng COVID 19.

Kaugnay nito, ipinabatid ni health undersecretary Dr. Myrna Cabotaje, pinuno ng National Vaccination Operations Center na tinututukan na ng experts ang nasabing mungkahi ni Concepcion.

Solido ang suporta ng buong Lanao Del Sur kay presidential frontrunner Ferdinand Bongbong Marcos, Jr. at vice presidential frontrunner mayor Inday Sara Duterte.

Tiniyak ito ni governor Mamintal Alonto Adiong, Jr., kasunod nang idinaos na mini rally para sa BBM Sara Uniteam na dinumog ng libo-libong supporters.

Ayon kay Adiong, buo ang suporta ng Lanao Del Sur sa tambalang Marcos at Duterte na tanging nakikita nilang dapat na mamuno at magpatuloy ng pagbabago sa buong bansa.

Ipinagmalaki pa ni Adiong ang aniya’y pagiging matapang ni BBM gayundin ang pagiging mapagkumbaba, matalino, pursigido at matibay ang pagmamahal sa Pilipinas nito ay sumasalamin sa pagpupunyagi ng bawat tao.

Siniguro ni Adiong ang pagsama niya at mga taga-Lanao Del Sur kina BBM at Mayor Sara hanggang makamit at marating ang tagumpay sa Mayo 9.

Magdo-doble kayod ang Department of Finance (DOF) para makabawi ang ekonomiya ng bansa sa nalalabing buwan ng Administrasyong Duterte.

Tiniyak ni Finance Secretary Carlos Dominguez III ang target nilang mabilis na mapalago ang ekonomiya ng bansa.

Sinabi ni Dominguez na hindi magiging sagabal ang election season sa adhikain nilang bumuo ng isang Comprehensive Fiscal Consolidation Plan para ibalik ang aniya’y high growth trajectory ng bansa.

Magugunitang 2021 nang pumalo sa 5 porsyento ang itinaas ng koleksyon sa buwis kumpara noong 2020 habang tumaas din ang naitalang merchandise trade at remittances kumpara nuong pre-pandemic level.

Walang dahilan para hindi gawin ang computerized elections.

Ayon ito kay Comelec commissioner George Garcia matapos isulong ng Namfrel ang pagbabalik sa manual vote counting sa mga presinto sa ngalan ng transparency.

Iginiit ni Garcia na nakabase sa mga batas ang pagsasagawa ng computerized elections kaya’t kailangan itong gawin.

Una nang inihayag ng Comelec na rerepasuhin nito ang kanilang kontrata sa Smartmatic incorporated dahil sa umano’y security breach sa system ng service provider para sa 2022 Elections.

Umalma si Congressman Pantaleon Alvarez sa ibinunyag ni Senador Panfilo Lacson na humihingi siya rito ng 800 million pesos na campaign fund ng mga kandidato sa lalawigan ng Partido Reporma.

Sinabi ni Alvarez na kahit kailan ay hindi siya humingi ng pondo kay Lacson para sa local candidates ng kanilang partido.

Binigyang-diin ni Alvarez na kayang kaya nilang pondohan ang kampanya ng kanilang mga kandidato sa mga lalawigan.

Maaari aniyang ang tinutukoy ni Lacson ay pondo para sa poll watchers ng kanilang partido sa mismong araw ng eleksyon.—mula sa ulat ni Cely Ortega-Bueno (Patrol 19)