Judith Estrada-Larino

Pinawi ng Bureau of Corrections (BuCor) ang pangamba hinggil sa mataas na kaso ng mga mayruong tuberculosis (TB) sa New Bilibid Prison (NBP).

Sinabi ni BuCor Spokesman Gabrial Chaclag na normal o usual case na ang nasa 200 kaso ng pulmonary tuberculosis sa NBP.

Wala aniyang TB outbreak sa NBP at nakokontrol ito kahit pa sa kasagsagan nuon ng naitatalang mataas na kaso ng COVID-19.

Ipinabatid ni Chaclag na gumagaling din naman ang mga bilanggong nagkakaruon ng TB dahil kaagad inihihiwalay o ina-isolate ang mga ito kasabay nang paggamot sa mga ito.

Kaagad din naman aniya silang nagsasagawa ng mass screening sa mga inmate para hindi na kumalat ang virus.

Isinusulong ng Commission on Population and Development (POPCOM) sa susunod na administrasyon ang pagtutuloy ng family planning program.

Ito ayon kay POPCOM Chief Dr Juan Antonio Perez, III ay matapos pumalo sa 8.1 million Pinoy couples, partners at individuals ang nakakabatid na sa family planning program ng gobyernong Duterte.

Mas mataas ito aniya ng 25% o 2 milyon mula nang simulan ng Duterte administration ang family planning program nuong 2016.

Sinabi ni Perez na mula 2016 hanggang 2022, nasilayan ng mga Pilipino ang mainstream implementation ng Republic Act 10354 o Responsibile Parenthood and Reproductive Health Law na aniya’y malaking tulong upang madagdagan ang mga nag-avail ng family planning services na 30% mula nang maipasa ang batas nuong 2021.

Lumalabas sa pinakahuling Field Health Services Information System sa isyu ng contraceptive methods pills pa rin ang pinipili ng mahigit 3 milyong kababaihan hanggang nuong 2020.

Ipokrito!

Ito ang itinawag ng CPP-NPA-NDF sa social media giant na Meta matapos nitong alisin ang Facebook accounts na umanoy may kaugnayan sa grupo.

Sinabi ng CPP na mapagkunwari ang Meta subalit pinapayagan nito ang pagrered tag ng NTF-ELCAC, AFP at mga trolls na nagtutulak pa anito ng galit ng tao laban sa democratic forces.

Ayon pa sa CPP, may pahintulot din ng Meta ang pro-violence posts sa Facebook ng mga panawagan ng karahasan at kamatayan na may kaugnayan sa giriang Russia-Ukraine.

Binigyang diin ng grupo na ang nasabing hakbang ng Facebook ay paggamit ng arbitrary power para i-censor ang freedom of expression lalo na ang mga kontra sa fascism at mga lumalaban sa US Imperialism.

Pinalawig pa ng Department of Agriculture ng 30 araw ang suspensyon sa pag byahe ng poultry at non-poultry live birds mula Luzon patungong Visayas, Mindanao at sa Region 4B (MIMAROPA).

Ito ayon sa DA ay para mapigilan ang pagkalat ng bird flu.

Gayunman, nilinaw ng DA na hindi kasama sa extended travel ban ang day old breeder chicks, day old pullets at hatching egss basta’t galing sa mga lungsod o munisipalidad na walang naitalang kaso ng bird flu.

Bukod sa pagluluwag, kailangan ng negative test result ang mga manok at itlog mula sa pinanggalingang farm, samantalang ipinagbabawal pa rin ang inter regional movement ng mga pato at itik sa loob ng Mainland Luzon.

Ipinabatid ng bureau of animal industry na kabilang sa mga mayruong kumpirmadong kaso ng bird flu ang Bulacan, Pampanga, Nueva Ecija, Tarlac, Bataan, Laguna, Camarines Sur, Benguet, Sultan Kudarat, North Cotabato at Davao Del Sur.

Pabor naman ang UBRA (United Broilers Raisers Association) sa extended travel ban para hindi na mahihigpitan ang pag biyahe ng mga manok at itlog na walang kumpirmadong kaso ng bird flu.

Uubra nang makaboto ang mga pilipino abroad sa Philippine Post (PHLPost) maliban sa kung saan sila naka-rehistro.

Ayon ito kay Comelec Commissioner Marlon Casquejo matapos magpasa ng resolusyon ang Comelec En Banc hinggil dito.

Sinabi ni Casquejo na kinakailangan lamang makapag-parehisto ang mga Pinoy bago matapos ang registration period sa ibang bansa o mga lugar na nasa ilalim ng iba pang post na nagpapatupad ng personal voting.

Maaari ring maghain ng Manifestation of Intent to Vote in Another Post (MIVAP) ang mga overseas voter para mapayagan ang mga itong makibahagi sa May 9 Elections.

Ikinakasa na rin ng Comelec ang Two Way Postage System para sa mga boboto gamit ang postal service.

Pinag-aaralan ng Comelec ang pag suspindi ng Overseas Absentee Voting (OAV) sa anim pang bansa.

Kabilang dito ayon kay Comelec Commissioner Marlon Casquejo ay ang mga bansang Iraq, Algeria, Chad, Tunisia na pawang walang overseas voting capabilities at Afghanistan at Ukraine na mayroong isinasagawang mandatory repatriation.

Una nang sinuspindi ng Comelec ang OAV sa Shanghai, China kung saan mayroong mahigit 1,600 registered pinoy voters dahil sa ipinatutupad na lockdown.

Kasado na ang pagsisimula ng Overseas Absentee Voting (OAV) sa April 10 para sa mga pilipinong nasa Israel.

Ito ayon sa Philippine Embassy sa Israel ay matapos na maisagawa ang Final Testing and Sealing ng Vote Counting Machines (VCMs) para sa Pinoy Absentee Voters sa nasabing bansa.

Ang nasabing hakbang ay sinaksihan ng mga kinatawan ng political parties at iba pang observers para na rin matiyak ang kahandaan ng mga mangangasiwa sa eleksyon.

Kasabay nito, tiniyak ng embahada ang mahigpit na pagpapairal ng physical distancing sa pagdaraos ng OAV para iwas COVID-19.