Judith Estrada-Larino

Walang dapat ipangamba ang mga business owners hinggil sa panukalang “No Booster Card, No Entry” policy.

Ayon ito kay presidential adviser for entrtepreneurship Joey Concepcion dahil ang pagpapabilis sa pagturok ng booster ay magpapahaba pa sa panahong maluwag ang pinaiiral na restrictions kung saan malayang makakakilos ang publiko.

Iginiit ni Concepcion na mabibigyan ng booster vaccine ng dagdag proteksyon ang mga humihina na ang immunity habang hinihintay namang makahabol sa dami na bilang mga primary vaccination ang mga lalawigang mayroong mababang vaccination rate.

Binigyang-diin ni Concepcion na hindi dapat tumigil ang business activities kaya’t isinusulong nila ang “No Booster Card, No Entry” policy na nagbibigay sa tao ng sapat na oras para makapagpaturok ng booster vaccine.

Tatalakayin bukas ng Commission on Elections (COMELEC) ang pagdaragdag ng voting precincts para sa Overseas Absentee Voting (OAV) sa Hong Kong.

Ayon kay COMELEC Commissioner George Garcia, kasunod ito ng mga reklamo sa mahabang pila at magulong election system sa unang araw ng absentee voting para sa Overseas Filipinos.

Aniya posibleng itaas sa walo hanggang sampu ang bilang ng voting precincts.

Inaasahang lalahok sa overseas absentee voting sa hong kong ang nasa 93,000 mga Pinoy.

Kritikal ang huling 30 araw ng kampanya.

Ayon ito kay Ronald Holmes, Pangulo ng Pulse Asia kaya’t hindi dapat tirahin o maging negatibo ang mga pulitiko sa mga aniya’y messengers tulad ng polling firms.

Sinabi ni Holmes na ang 30 days ay katulad ng last 2 minutes ng larong basketball kaya’t naka depende rito kung paano papalitan ng kandidato ang kanyang strategy sa kampanya.

Tinukoy ni Holmes na posibleng naka 12 points na ang isang kandidato at 15 points naman ang katunggali nito subalit sakaling maka shoot ng 3 points ang naunang kandidato, tie o patas na ang laro o labanan nila.

Binigyang-diin ni Holmes na krusyal nga ang huling isang buwan ng kampanya para mapaigting pa ang kanilang mga aktibidad na makakakuha ng suporta mula sa taumbayan o maiboto sila sa mismong May 9 election.

Inaasahang babalik sa pre-pandemic levels ang dami ng domestic flights ngayong Holy Week.

Ayon ito kay Manila International Airport Authority (MIAA) General Manager Ed Monreal kung saan nasa 80% level na ngayon ng pre-pandemic figures ang naitatala sa domestic travel.

Handa na rin naman aniya sila sa pagtaas ng bilang ng mga biyahero sa naia ngayong Semana Santa.

Binigyang-diin pa ni Monreal na mahigpit pa rin nilang ipatutupad ang health protocols kontra COVID-19.

Tinawag na irrational ni Pulse Asia President Ronald Holmes ang mga nagbabasura sa survey result dahil lamang hindi pumapabor sa isang partikular na kandidato.

Sinabi ni Holmes na inaasahan na rin naman nilang ang mga partisan ay hindi magiging makatuwiran lalo na sa pagtingin sa survey results.

Hindi naman aniya perpekto ang mga survey at nagkakamali rin naman ang social scientists.

Binigyang diin ni Holmes na makakatulong ang survey para maplantsa ng mga kandidato ang kanilang strategies.

Una nang inilabas ng Pulse Asia ang March Presidential Survey nito kung saan nangunguna pa rin si dating senador Ferdinand Bongbong Marcos, Jr. bagamat bumaba ang ratings nito.

Patay ang limang taong gulang na batang lalaki nang madaganan ng gumuhong pader ng isang bahay sa Passi, Iloilo.

Ipinabatid ni Mayor Stephen Palmares na maghapong umulan sa lungsod at lumambot ang lupa na tinatayuan ng pader kayat gumuho ito at nadaganan si Christian Aguilar Sorongon na nagtamo ng malubhang sugat sa ulo.

Sinabi ni Palmares na nakatayo sa mababang lugar ang bahay ng biktima na gawa sa light materials at nasa taas nito ang gumuhong pader.

Sugatan din sa nasabing pagguho ng pader sa Barangay Poblacion Ilaya sina Shaina Mae Panila at Joland Sampiano na nahirapang sagipin ng rescuers.

Pinaalalahanan ng gobyerno ang mga residente na mag ingat lalong lalo na ang mga nakatira sa flood at landslide prone areas sa lungsod.