Judith Estrada-Larino

Hindi makatuwirang pilitin ng Department of Education ang mga gurong pumasok pa rin sa kani-kanilang mga paaralan mula May 2 hanggang 13 kahit wala silang tungkuling pang eleksyon.

Binigyang diin ito ng Alliance of Concerned Teachers (ACT) dahil Non School days ang mga nasabing petsa kayat hindi ito dapat ikunsider na workdays para sa mga guro.

Sinabi ng ACT na pabigat na trabaho sa mga guro ang direktiba ng DepEd na pumasok pa rin ang mga ito kahit wala silang election related duties sa May 2 hanggang 13 sa halip na tutukan ang tunay na trabaho ng mga guro.

Pag-aaralan ng LTO (Land Transportation Office) ang panukala ng MMDA na mag isyu ng plaka na mayruong parehong mga huling numero sa mga motoristang nagpapa-rehistro ng mga bagong sasakyan.

Ayon ito kay LTO Chief Edgar Galvante matapos kumpirmahin ang nais na pakikipag pulong sa kanila ng mmda.

Sinabi ni Galvante na “doable” ang nasabing panukala ng MMDA subalit kailangang lamang magkaruon ng adjustment dito tulad ng proseso nang pag verify ng tunay na may ari ng mga bagong sasakyan.

Tinukoy ni galvante ang dapat na maging batayan o pagbusisi ..halimbawa ang pagkuha ng bagong sasakyan mula sa iisang bahay at i ibahin lamang ang pangalan ng may ari.

Isinusulong ng MMDA ang pagpapalit ng office hours sa mga nasa gobyerno sa Metro Manila.

Ayon kay MMDA Chairman Don Artes, uubrang magsimulang mag operate ang ilang ahensya ng gobyerno ng alas-7 ng umaga hanggang alas-4 ng hapon para mabawasan ang bigat ng trapiko tuwing rush hours.

Inirerekomenda rin aniya ang 4 day-work week na mayroong 10 oras na trabaho kada araw.

Ipinabatid ni Artes na sumulat na sila kay Civil Service Commission Chairman Carlo Nograles bago sila makipag pulong dito para tutukan ang kanilang rekomendasyon.

Una nang inihayag ni Artes na sobra-sobra na ang bilang ng mga sasakyan sa mga lansangan sa Metro Manila.

Natanggap na ng konsulado ng bansa sa New York, usa ang mga vote counting machines (VCM) at iba pang election paraphernalia na gagamitin sa May 9 Elections.

Kinumpirma ito ni Consul General Elmer Cato kayat maaari na nilang simulan ang proseso nang pagkuha ng mga balota para sa overseas voters sa Northeast Part ng Amerika hanggang ngayong araw na ito.

Sinabi ni Cato na ngayong gabi ay ipapadala na nila ang unang batch ng overseas ballots para makaboto na ang mga Pilipinong nasa New York at iba pang bahagi ng US Northeast.

Magugunitang na delay ang pagboto sana ng mga Pinoy sa Northeast part ng Amerika sa pagsisimula ng Overseas Absentee Voting nuong linggo dahil sa delay sa shipment ng VCM, official ballots at election paraphernalia.

Nilamon ng apoy ang 50 kabahayan at dalawang establisyimento sa tatlong insidente ng sunog sa Metro Manila ngayong araw na ito.

Ayon sa mga otoridad, inabot ng ikalawang alarma ang nasabing sunog sa Dulong Tangke, Malinta, Valenzuela City na nakaapekto sa 15 pamilya roon.

Hindi kaagad naapula ang apoy dahil sa kipot ng kalsada na sinabayan pa ng mahinang pressure ng tubig mula sa Maynilad.

Isang ready to wear at celfon accessories stall naman sa Kapitan Ambo Park Avenue, Pasay City ang nasunog na iniimbestigahan pa ng mga otoridad partikular ang pinagmulan at kung magkano ang pinsala rito.

Samantala, nasunog din ang Judiciary Data Center Room sa ground floor ng gusali ng Korte Suprema sa Padre Faura, Maynila.

Sinabi ni Atty. Brian Hosaka, Spokesman ng Korte Suprema na nagsimula ang sunog alas-6 ng umaga sa UPS ng data center ng SC Management Information Systems Office at nagdulot ng matinding trapiko sa Padre Faura St. na pansamantalang isinara sa mga motorista.