Judith Estrada-Larino

Nananatiling numero uno sa presidential candidates si dating senador Ferdinand Bongbong Marcos, Jr.

Base ito sa Pulse Asia Preferential Survey na isinagawa nitong April 16 hanggang 21 kung saan hindi natitinag sa 56% ang ratings ni Marcos mula sa survey nuong buwan ng Marso.

Nasa ikalawang pwesto pa rin si Vice President Leni Robredo sa 23% o bumaba ng isang porsyento mula sa nakalipas na survey.

Sina Senador Manny Pacquiao at Manila Mayor Isko Moreno ay kapwa nasa ikatlong puwesto kung saan umakyat sa pitong porsyento ang ratings ni Pacquiao subalit bumaba naman ng apat na porsyento ang dating walong porsyentong ratings ni Moreno.

Samantala, hindi rin nagbago ang dalawang porsyentong ratings ni Senador Panfilo Lacson na sinundan nina Ernie Abella at Faisal Mangondato na parehong may 1% rating, Ka Leody De Guzman – .3% at sina Norberto Gonzales at Jose Montemayor, Jr. – kapwa may .1% rating.

Ginawa ang survey sa halos tatlong libong respondents na may edad 18 pataas gamit ang face to face interview.

32 kalalakihan ang inaresto ng mga otoridad dahil sa umano’y harassment sa Biñan, Laguna.

Ayon sa mga otoridad, limang lalaki ang umano’y nang-harass sa idinaraos na voters education training sa Barangay San Vicente at naghahanap umano sa Barangay Chairman.

Isang pulis naman na nakatira malapit sa lugar ang nag-usisa sa kaguluhan subalit kinuyog ito ng mga suspek at sinubukang agawan pa ng baril.

Sumaklolo naman ang mga residente na nagsabing hindi nila kilala ang mga naturang lalaki.

Kaagad ding nakaresponde ang SWAT ng Biñan PNP at dinakip ang mga kalalakihan na mga retiradong sundalo, security guards at umano’y protection agents.

Una nang napaulat ang pagdasting sa Biñan City ng  120 kalalakihan na nagrenta ng apartment sa lungsod.

Inilatag na ng Department of Education ang mga guideline kaugnay sa isasagawang in-person na end of school year rites para na rin sa kaligtasan ng mga guro, mag a aral at magulang.

Kasunod na rin ito ayon kay Education Undersecretary Diosdado San Antonio nang pagpayag nila sa limited physical ceremonies sa mga paaralang nasa mga lugar na nasa ilalim ng Alert level 1 at 2.

Subalit sinabi ni San Antonio na dapat matiyak ng mga paaralan na masusunod ang mga panuntunang itinakda ng dep ed tulad nang pagsusuot ng face mask ng lahat ng mga dadalo bukod pa sa isang metrong distansya.

Ang mga kasali sa seremonya ay dapat umupo lamang sa kanilang assignmed seats, bawal ang pakikipag kamay o iba pang uri ng physical contact at kailangan ang parental consent para sa mga mag-aaral na dadalo sa Face to Face Graduation Ceremony.

Ayon pa kay San Antonio , ang mga paaralang hindi makakapag in person end of school year ay papayagang mag broadcast live ng virtual graduation rites sa pamamagitan ng isang social media platform.

Isusulong na ng BSP (Bangko Sentral ng Pilipinas) ang pilot project nitong isang Wholesale Central Bank Digital Currency (Wholesale CBDC).

Ipinabatid ng BSP na layo ng cbdcph na palakasin ang katatagan ng payment system sa bansa kung saan target na gumamit ng digital currencies sa mga malalaking transaksayon sa 24/7 basis.

Sinabi ni BSP Governor Benjamin Diokno na mas maiintindihan sa gagawing pilot testing ang mga oportunidad at panganbib ng mas advance na wholesale CBDC project.

Patay ang dalawa katao matapos masunog ang kanilang bahay Sa Leo Street, Barangay Talon Tres, Las Piñas City.

Kinilala ng BFP ang mga nasawi na sina angelita sopelanas, 44 na taong gulang at Steve Sopelanas, 12 anyos kapwa natagpuan malapit sa banyo ng nasunog na bahay.

Ayon sa BFP, nagsimula ang sunog mag a alas 4 ng madaling araw at tuluyang naapula makalipas ang halos isang oras.

Bagamat isang bahay lamang ang nasunog, limang pamilya naman ang naapektuhan nito na iniimbestigahan pa ng mga otoridad.

Sumakabilang buhay na si Karapatan Chairperson Amaryllis Hilao-Enriquez.

Ipinost sa Facebook page ni Andrea Enriquez ang pagyao ng kanyang ina kahapon ng tanghali sa Covina, California, USA.

Ayon kay Andrea, nakasama na ng kanyang ina ang kapatid nitong si Liliosa na nasawi nuong martial law.

Binigyang pugay pa ni Andrea ang 68 taong gulang na ina na aniya’y inialay ang kanyang buhay para isulong ang hustisya at karapatang pantao.

2017 nang dalhin ni Andrea sa Amerika ang ina para gamutin sa kanyang parkinsons disease.

Ibinasura na ng Comelec ang Townhall format ng ikatlo at huling presidential at vice presidential debates.

Kasunod na rin ito nang hindi natuloy na huling leg ng debate dahil sa kabiguan ng contractor na bayaran ang Sofitel Hotel sa pagho-host ng event.

Sa halip ipinabatid ni Comelec Commissioner George Garcia na magsasagawa na  lamang sila ng single candidate/team-panel interview format.

Ang sistema ngayon aniya ay parang personal interview kung saan may panel kayat mabibigyan ang lahat ng mga kandidato ng buong isang oras para maisapubliko muli ang kanilang mga plataporma sa huling pagkakataon.

Sinabi ni Garcia na makikipag kita na lamang ang mga interviewer o panelist sa mga kandidato kung saang lugar uubra habang nasa kampanya ang mga kandidato o yung presidential-vice presidential tandem.

Inihayag pa ni Garcia na puwede ring kausapin ng interviewers ang mga kandidato online at ang mga ito ay i eere sa mga istasyong miyembro ng KBP o Kapisanan ng mga Brodkaster ng Pilipinas mula May 2 hanggang 6.

Inilunsad na ng Department of Education (DepEd) ang bagong modules para sa mga mag aaral ng Alternative Learning System (ALS).

Ayon kay Education Assistant Secretary GH Ambat,  halos 3M Junior High School ALS students ang makikinabang sa mga naturang bagong learning materials.

Kasabay nito, ipinagmalaki ni Ambat ang mga nasabing bagong ALS modules na sumasabay aniya sa 21st century skills na kailangan ng mga K to 12 students.