Judith Estrada-Larino

Pabor si Congresswoman Janette Garin na mabigyan ng insentibo ang mga magpapaturok ng booster dose ng COVID-19 vaccine.

Sinabi ni Garin na nakikita niyang susi ang pagbibigay ng insentibo tulad ng transportation allowance para mapalakas ang booster vaccination na ipinatutupad na nila sa kaniyang distrito sa Iloilo.

Ayon kay Garin, maraming nagdadalawang isip na magpa booster dahil kailangang mag absent sa trabaho at gumastos pa sa pamasahe.

Kaugnay nito, muling iginiit ni Garin ang pagtatayo ng on-site vaccination sa mga trabaho upang maging madali ang pagpapa booster ng mga empleyado.

Patay ang hinihinalang miyembro ng Dawlah Islamiyah Maguindanao Group habang arestado naman ang kasamahan nito sa operasyon nang pinagsanib na pwersa ng PNP Region 12 at Philippine Army sa Purok 7, Brgy. Dunguan, M’lang, North Cotabato.

Kinilala ang suspek na si Monir Lintukan habang ang naarestong kasamahan nito ay si Randy Saro alias ‘Bobong’.

Ayon kay 6th Infantry Division Acting Commander Brigadier General Eduardo Gubat, ang nasabing grupo ay itinuturong responsable sa pambobomba sa Parang, Maguindanao; Mlang at Aleosan sa North Cotabato at twin bombing incident sa Koronadal City at Tacurong City.

Narecover ng mga otoridad ang isang caliber 5.56mm m16 rifle, long magazine ng m16 na mayruong 41 rounds na bala ng caliber 5.56mm ball, isang bandolier at isang improvised explosive device.

Ang pagkasawi ng hinihinalang bomber ay itinuturing ng AFP na tagumpay sa pinalakas na kampanya kontra karahasan sa Mindanao. —sa ulat ni Gretchen Estrada (Home Radio-Gensan)a

Makikipagpulong ang Department of Education (DepEd) sa mga kinauukulang ahensya para tutukan ang usapin ng transportasyon.

Ito ayon kay Education Undersecretary Toni Umali ay sa gitna nang planong pagpapatupad ng 100% face to face classes sa Nobyembre.

Sinabi ni Umali na una nang nakipag-ugnayan ang kanilang Chief of Staff na si Undersecretary Epimaco Densing, III sa mga concerned agencies para sa isang pulong upang plantsahin ang transportation issue na makakaapekto sa mga estudyante at guro kapag nagsimula na ang face to face classes.

Una nang nanawagan ang ilang transport groups na ibalik ang orihinal na rutang itinakda sa Public Utility Jeepneys (PUJs) matapos ang anunsyo ng pagbabalik ng 100% in person classes.

Nasa kustodiya na ng mga otoridad ang dalawang suspek sa pambubugbog sa tauhan ng MMDA.

Hindi naman inilabas pa ng Pasay City Police ang pangalan ng mga suspek na boluntaryong sumuko matapos masangkot sa nasabing pambubugbog kasama ang anim na iba pa.

Hinimok ng mga otoridad ang iba pang sangkot sa insidente na sumuko na rin at managot sa insidente.

Pumuslit na palabas ng Sri Lanka ang 73 taong gulang na pangulo nito.

Una nang nangako si Gotabaya Rajapaksa na magbibitiw sa puwesto at bibigyang daan ang mapayapang paglilipat ng kapangyarihan sa Sri Lanka sa gitna na rin nang lumawak na mga protesta dahil sa economic crisis na nararanasan sa nasabing bansa.

Bilang pangulo, si Rajapaksa na tinaguriang the terminator ay mayruong immunity sa pag-aresto at pinaniniwalaang nais niyang magtungo ng ibang bansa bago bumaba para makaiwas na posibilidad na makulong.

Ayon sa immigration sources, bukod kay Rajapaksa, ang kanyang asawa at bodyguard ang sakay ng military aircraft na nagmula sa main international airport patungong Maldives.

Tinatakan muna ang passports ng grupo ni Rajapaksa bago tuluyang sumakay sa Special Air Force Flight.

Puputok na matapos ang dalawang taon ang inaabangang aktbidad ng Association of Firearms and Ammunitions Dealers of the Philippines Incorporated (AFAD) bukas, July 14 sa Megamall, Mandaluyong City.

Tiniyak ni AFAD President Hagen Alexander Topacio ang kakaibang 28th Edition ng Defense and Sporting Arms Show na limang araw bubuksan sa publiko, gun owners at sports enthusiasts simula bukas, Huwebes.

Pangungunahan nina Senador Ronald Bato Dela Rosa at PNP OIC Lt General Vicente Danao, Jr. ang nasabing Defense and Sporting Arms Show kung saan tampok ang world class local at imported guns, bala at paraphernalia mula sa halos 50 grupo at exhibitors.

Ayon kay Topacio, hindi lamang nila ipapakita sa event na ito ang mga pinakamagagandang gun products sa merkado kundi ipapaalam din nila ang restriction o mga hindi dapat gawin sa paghawak ng mga armas.

Sumipa pa sa 90% ang kaso ng dengue na naitala sa unang bahagi ng taong ito kumpara nuong 2021.
Batay sa National Dengue Data ng DOH, nasa 64, 797 o halos 65,000 ang naitalang kaso ng dengue mula January 1 hanggang June 25, kumpara sa 34,000 cases na naitala sa kaparehong panahon nuong isang taon.
Ipinabatid ng DOH na 274 ang nasawi sa dengue sa unang anim na buwan ng taong ito o nasa 0.4% case fatality rate.
Ayon pa sa DOH, nasa mahigit 21,000 dengue cases ang naitala mula May 29 hanggang June 25 lamang kung saan 15% o nasa 9, 426 cases ay mula sa Central Luzon, mahigit 8,000 kaso sa Central Visayas at halos 6,000 kaso o 9% mula sa Zamboanga Peninsula.
Una nang inihayag ni Health Undersecretary Maria Rosario Vergeire na nakakaalarma na ang pagtaas ng kaso ng dengue dahil marami na ang nao-ospital dahil dito.

Pinarangalan ng United Federation of Filipino American Educators (UNIFFIED) ang mga Pinoy Educators sa iba’t ibang bahagi ng mundo.

Sa isinagawang awards ceremony sa New York, ginawaran ng UNIFFIED ng Outstanding Leadership in Education Award si Dr. Rommel Sergio ng Dubai, Dr.  Maria Jade Opulencia ng UAE, Juan Carlos Antonio ng Thailand, Dr. Judilyn Solidum ng Maynila, Aireen Arbis at Dr Crisanto Avila ng Cavite, Loida Nartates ng Los Angeles California at Dr. Ma Nesga Provido.

Kinilala naman bilang influential teacher sina Melba Acantilado ng New Mexico, USA at Jonathan Garcia ng Los Angeles, California.

Ang Gawad Ulirang Guro Award naman ay ibinigay kay Mark Escobar ng North Carolina, Catalina Suerte ng New Jersey at Dr. Gilmore Solidum ng Pilipinas.

Ginawaran din ng Outstanding Leadership in Public Service sina Nelson San Juan  na kauna-unahang Pinoy na itinalagang Deputy Commissioner ng Department of Labor and Workforce Development ng estado ng Alaska kung saan siya nagtatrabaho sa nakalipas na 23 taon.

Kabilang din sa binigyan ng parehong award sina Florente Coronel, Atty. Angelita Cordova Hayes at Dr. Rosalinda Bajolo ng New York.

Matagumpay na nakapag emergency landing ang isang eroplano sa Sangley Airport sa Cavite.

Ang ATR Aircraft BE58 na may registry number RPC 5916 ay patungong Cuyo, Palawan para kumuha ng isda nang mapansin ng piloto ang problema sa right landing gear ng eroplano.

Dahil dito, nagpasya ang kapitan na bumalik sa Sangley dahil kumpleto ang emergency facilities ng naturang paliparan.

Ligtas na nakalapag ang eroplano sa madamong bahagi ng nasabing airport sa pangunguna ni Captain Jesse Bihasa at co-pilot na si James Patrick Bala.

Iniimbestigahan na ng Civil Aviation Authority of the Philippines (CAAP) at Aircraft Accident Investigation and Inquiry Board (AAIIB) ang nasabing insidente. —sa ulat ni Raoul Esperas (Patrol 45)

Asahan na ang mababang singil sa kuryente sa buwang ito.

Kasunod na rin ito ng refund na ipinag-utos ng Energy Regulatory Commission (ERC) sa kasalukuyang buwan.

Ayon sa Meralco, nasa halos 71 pesos o mahigit siyam na piso ang bawas sa kada kilowatt hour mula sa halos 11 pesos noong Hunyo.

Nangangahulugan ito ng 141 pesos na tapyas sa kabuuang bill ng mga kumukunsumo ng 200 kilowatt hours kasunod ng apat na sunud-sunod na buwang pagtaas ng singil sa kuryente.

Ipinag utos na ERC ang pag recalcucate sa pagkakaiba ng actual weighted average tariff at final interim average rate ng mahigit piso kada kilowatt hour mula July 2015 hanggang June 2022.