Judith Estrada-Larino

Unemployment insurance.

Ito ang isinusulong ni Congressman Joey Salceda kaysa bigyan ng ayuda ang mga walang trabaho.

Sinabi ni Salceda na nakakaapekto sa mga pangunahing sektor ng ekonomiya ang pagtaas ng unemployment rate sa 6% noong Mayo.

Ayon kay Salceda, hindi sapat ang Social Benefit System ng bansa para tugunan ang pangangailangan ng mga empleyadong nawalan ng trabaho at karamihan ay naghihirap na.

Nakakabahala rin aniyang mas mataas pa sa 770,000 ang bilang ng mga walang trabaho kaysa mga bagong pasok sa Labor Force nasa 550,000.  —sa ulat ni Tina Nolasco (Patrol 11)

Uubrang gamitin ng Bureau of Immigration (BI) ang bahagi ng kita nito bilang dagdag ayuda sa mga mahihirap na pamilya.

Binigyang diin ito ni 4Ps Partylist Representative Marcelino Libanan na nagsabing kaya ng BI na makalikom ng 10 hanggang 12 billion pesos sa buong taon.

Bago nag pandemic o taong 2019, ipinabatid ni Libanan, dating Immigration Commissioner na nasa mahigit siyam na bilyong piso ang nakolekta ng BI o mas mataas ng 32% mula sa mahigit pitong bilyong pisong nakolekta noong 2018.

Kasabay nito, binuhay muli ni Libanan ang panukalang Bureau of Immigration Modernization Act na lusot na sa Kamara subalit bigong maipasa sa Senado.

Na shock at nadismaya si DFA Secretary Enrique Manalo sa napaulat na pagbaril kay Dating Japanese Prime Minister Shinzo Abe.

Kasunod na rin ito nang pagpapaabot ni manalo ng simpatiya at pagdarasal para sa agarang paggaling ni Abe.

Si Abe ay isinugod sa ospital matapos mabaril habang nagta talumpati.

Batay sa report, si Abe ay nasa “state of cardiopulmonary arrest” o pagkawala ng hininga at pagtigil nang pagtibok ng kaniyang puso.

Magkakasa ng mga bagong panuntunan sa imbestigasyon ang Chairman ng Senate Blue Ribbon Committee.

Ayon kay Senador Francis Tolentino, ang mga bagong rules ay para mas maging responsive anya ang Blue Ribbon Committee at mapangalagaan ang karapatan ng mga iniimbestigahan.

Sinabi ni Tolentino na dapat magkaroon ng preliminary determination at hindi yung pagka-file ay isasalang kaagad lalo pa’t kakaunti lamang ang mga miyembro ng Blue Ribbon.

Sa 19th Congress, ipinabatid ni Tolentino na maglalagay siya ng “referral to prosecute” provision sa rules ng Blue Ribbon Panel at maglalatag ng mga bagong panuntunan para maging time bound aniya ang mga imbestigasyon at makita ang pagkakaiba ng commitment order at detention order bukod sa pagtatalaga ng permanenteng Blue Ribbon Committee General Counsel.

Itinanggi ng Metro Manila Center for Health Development (DOH-MMCHD) na galing sa kanila ang mga text messages kaugnay sa pagkuha ng One COVID-19 Allowance (OCA).

Ayon sa DOH MMCHD, ang pagkuha ng OCA ay direktang ipinapaalam sa mga dapat tumanggap nito gayundin ang kumpleto at maayos na dokumentong kinakailangan.

Sinabi ng MMCHD na bukas ang kanilang Public Assistance and Complaint Unit (PACU) para sa mga tanong at concerns kaugnay sa OCA at maaari ring bisitahin ang kanilang website www.,dohncro.gov.ph o magtungo sa tanggapan nila sa Mandaluyong City.

Pinayuhan ng MMCHD ang publiko na tiyaking lehitimo ang mga nakukuhang balita.

Sinuspinde ng Korte Suprema ng isang buwan ang presiding judge ng Manila Metropolitan Trial Court.

Kasunod ito ng guilty verdict kay Judge Jorge Emmanuel Lorredo dahil sa work related sexual harassment.

Si Lorredo ay una nang inireklamo nina Marcelino Espekon at Erickson Cabonita matapos itong magpakita ng pagiging bias at partiality sa kanilang sexual orientation sa isinagawang preliminary conference sa kinakaharap nilang kaso.

Sinabi nina Espekon at Cabonita na paulit-ulit silang tinatanong ni Lorredo kung homosexual ba sila kasabay nang pagsasabing ang homosexuality ay kasalanan.

Dahil dito, binigyang diin ng high tribunal na nakakaapekto ang religious beliefs niya sa paggampan sa tungkulin ni Lorredo kaya’t nawawalan ng silbi ang anumang ihahatol nito sa mga kaso.

Pinagbabayad din si Lorredo ng 50,000 piso dahil sa simple misconduct at conduct unbecoming bilang isang hukom.

Wala pang naitakdang state visit ang Pangulong Ferdinand Bong Bong Marcos, Jr.

Ayon ito kay Press Secretary Trixie Cruz-Angeles dahil abala pa aniya ang pangulo sa pagbuo ng kaniyang gabinete.

Una nang nagpaabot ng imbitasyon para makabisita sa kanilang bansa si US President Joe Biden gayundin ang China at si European Council President Charles Michel.

Natukoy na ng mga otoridad ang suspek sa pagkamatay ng 24 anyos na industrial engineer.

Ayon kay Bulacan Police Director Police Colonel Charlie Cabradilla, ang biktimang si Princess Dianne Dayor ay pamilya sa suspek na nakatira lamang malapit sa pinangyarihan ng krimen base na rin sa isinagawang follow-up operations ng mga otoridad.

Sinabi ni Cabradilla na itinuturing ng mga otoridad na kaso ng pagnanakaw at homicide ang nasabing insidente.

Kaugnay nito, inihayag ni Cabradilla na hinihintay pa nila ang resulta ng medico legal at autopsy kay Dayor na natagpuang patay sa madamong lugar malapit sa Guiguinto-Malolos border matapos ilang araw nang nawawala.

Inimbitahan ni European Council President Charles Michel ang Pangulong Ferdinand Bongbong Marcos. Jr. para bumisita sa Belgium.

Sa pamamagitan ito ng isang sulat na ipinadala mismo ni Michel kay PBBM.

Ang nasabing pagbisita, ayon kay Michel ay para tutukan ang pagpapalakas sa bilateral relations ng EU at ASEAN at maging pagpapalawig ng foreign policy issues at pagsuporta sa Rules Based International Order.