Judith Estrada-Larino

Sinuspinde ng Korte Suprema ng isang buwan ang presiding judge ng Manila Metropolitan Trial Court.

Kasunod ito ng guilty verdict kay Judge Jorge Emmanuel Lorredo dahil sa work related sexual harassment.

Si Lorredo ay una nang inireklamo nina Marcelino Espekon at Erickson Cabonita matapos itong magpakita ng pagiging bias at partiality sa kanilang sexual orientation sa isinagawang preliminary conference sa kinakaharap nilang kaso.

Sinabi nina Espekon at Cabonita na paulit-ulit silang tinatanong ni Lorredo kung homosexual ba sila kasabay nang pagsasabing ang homosexuality ay kasalanan.

Dahil dito, binigyang diin ng high tribunal na nakakaapekto ang religious beliefs niya sa paggampan sa tungkulin ni Lorredo kaya’t nawawalan ng silbi ang anumang ihahatol nito sa mga kaso.

Pinagbabayad din si Lorredo ng 50,000 piso dahil sa simple misconduct at conduct unbecoming bilang isang hukom.

Wala pang naitakdang state visit ang Pangulong Ferdinand Bong Bong Marcos, Jr.

Ayon ito kay Press Secretary Trixie Cruz-Angeles dahil abala pa aniya ang pangulo sa pagbuo ng kaniyang gabinete.

Una nang nagpaabot ng imbitasyon para makabisita sa kanilang bansa si US President Joe Biden gayundin ang China at si European Council President Charles Michel.

Natukoy na ng mga otoridad ang suspek sa pagkamatay ng 24 anyos na industrial engineer.

Ayon kay Bulacan Police Director Police Colonel Charlie Cabradilla, ang biktimang si Princess Dianne Dayor ay pamilya sa suspek na nakatira lamang malapit sa pinangyarihan ng krimen base na rin sa isinagawang follow-up operations ng mga otoridad.

Sinabi ni Cabradilla na itinuturing ng mga otoridad na kaso ng pagnanakaw at homicide ang nasabing insidente.

Kaugnay nito, inihayag ni Cabradilla na hinihintay pa nila ang resulta ng medico legal at autopsy kay Dayor na natagpuang patay sa madamong lugar malapit sa Guiguinto-Malolos border matapos ilang araw nang nawawala.

Inimbitahan ni European Council President Charles Michel ang Pangulong Ferdinand Bongbong Marcos. Jr. para bumisita sa Belgium.

Sa pamamagitan ito ng isang sulat na ipinadala mismo ni Michel kay PBBM.

Ang nasabing pagbisita, ayon kay Michel ay para tutukan ang pagpapalakas sa bilateral relations ng EU at ASEAN at maging pagpapalawig ng foreign policy issues at pagsuporta sa Rules Based International Order.

Kinumpirma ni DTI Secretary Alfredo Pascual ang aniya’y bahagyang pagtaas sa presyo ng mga pangunahing bilihin.

Gayunman, nilinaw ni Pascual na ang mga nasabing pagtaas ay pasok pa rin sa itinakda nilang suggested retail prices (SRP).

Kasabay nito, ipinabatid ni Pascual na pinagaaralan pa rin nila ang petsiyon ng manufacturers at producers para magdagdag sa presyo ng kanilang mga produkto.

Sumalang sa tatlong araw na rehearsal training ang mga kuwalipikadong miyembro ng MNLF para maging kasapi ng PNP.

Layon ng pagsasanay, ayon kay Abdulqadir Dimalao, State Chairman ng South State Revolutionary Committee ng MNLF na maihanda ang MNLF sa Reintegration Program sa PNP.

Pumapalo sa mahigit 400 miyembro ng MNLF, kapwa lalaki at babae ang sumabak sa nasabing rehearsal training para makapasok sa PNP.

Sumipa sa mahigit 6% ang inflation o bilis nang pagtaas ng presyo ng mga pangunahing bilihin at serbisyo.

Ang naitalang 6.1% inflation, ayon sa Philippine Statistics Authority (PSA) ay pinakamataaas sa nakalipas na apat na taon kasunod na rin nang patuloy na pag akyat ng presyo hindi lamang ng pagkain kundi maging ng langis.

Ipinabatid ni PSA Chief at National Statistician Claire Dennis Mapa na ang June inflation ay pasok sa target na 5.7% hanggang 6.5% forecast ng Bangko Sentral ng Pilipinas (BSP).

Una nang tinaya ng economic managers ng gobyerno sa 2% hanggang 4% ang June inflation na mas mataas sa 5.4% inflation noong Mayo at 4.9% noong Abril.

Napipintong tumaas ang singil sa kuryente matapos ideklara ng Korte Suprema na null and void ang kautusan ng ERC hinggil sa regulated power rates sa wholesale electricity spot market (WESM) noong November at December 2013.

Ayon sa High Tribunal, ang kautusan ng ERC na pumipigil sa 2013 Luzon Rates ay ibinatay sa tinatawag na unfinished investigation at ang rates sa nasabing panahon ay hindi reasonable, walang rationale at hindi competitive dahil sa influence of factors.

Dahil dito, inatasan ng Korte Suprema ang ERC para utusan ang Philippine Electricity Market Corporation, operator ng WESM na mag recalculate ng kanilang rates.

Una nang inihain sa Korte Suprema ang mga petisyon sa umano’y pag apruba ng ERC sa kahilingan ng Meralco nang pag kolekta ng automatic rate adjustments mula sa generation cost noong November 2013.

Kasabay ng kanyang panunumpa sa tungkulin kahapon, lumagda si Taguig City Mayor Lani Cayetano ng isang Executive Order na siyang tututok sa kanilang laban kontra korupsyon.

Sa ilalim ng kautusan, inaatasan ng Alkalde ang lahat ng mga tauhan ng Pamahalaang Lungsod na panatilihin ang kanilang pagiging matuwid upang matiyak na sila’y maglilingkod ng may integridad sa kanilang mga nasasakupan.

Kasunod nito, sinabi rin ni Cayetano na paiigtingin din nila ang COVID-19 response na nasimulan ng kaniyang sinundan.

Hindi na rin nag-aksaya ng pagkakataon si Mayor Lani matapos ang kaniyang panunumpa sa pamamagitan ng pagbisita nito sa kanilang Love Caravan sa Brgy. Balagtas .

Duon nagkaloob ang Pamahalaang Lungsod ng iba’t ibang libreng-serbisyo tulad ng medical at dental checkup, wellness check, lab test at libreng-bunot ng ngipin na kanyang sinimulan mula noong una siyang maupo bilang Alkalde taong 2010.

Hinatulan ng habambuhay na pagkabilanggo ang Peace Consultant at Spokesperson ng National Democratic Front of the Philippines (NDFP).

Si Concha Araneta ay napatunanayang guilty beyond reasonable doubt ng Taguig RTC kaugnay sa pagkamatay ni Metudio Inisa sa Sitio Agbanuod sa Madalag, Aklan.

Batay sa court records, si Inisa ay nakatira sa kanyang bayaw nuong September 1975 nang puntahan ng siyam na indibidwal bitbit ang kani-kanilang mga armas.

Isa sa mga indibidwal ay nagpakilalang miyembro ng NPA samantalang ang isa sa mga babaeng suspek ay nagtanong kay Inisa kung bakit ito lumahok sa Philippine Constabulary.

At nang hindi kaagad makasagot si Inisa, tinutukan ito ng baril at pinaputukan sa ulo bago sunud-sunod na pinagbabaril si Inisa.

Natukoy si Araneta na siyang bumaril kay Inisa subalit nagpasok ito ng not guilty plea sa nasabing krimen nuong August 2015.