Judith Estrada-Larino

Lumisan na ng Malakanyang ang Pangulong Rodrigo Duterte, isang oras bago magtapos ang kanyang termino.

Kasunod na rin ito nang pagtanggap ni Duterte ng departure honors mula sa militar sa loob ng Palace grounds.

Sinaksihan naman ng bagong Pangulong Ferdinand Bongbong Marcos, Jr. ang pagkilala kay Duterte.

Nagkamay sina Duterte at Marcos bago umalis ang Pangulong Duterte pauwi sa Davao City.

Binalewala ni dating COMELEC Commissioner Rowena Guanzon ang inisyung Temporary restraining orders (TRO) ng korte suprema kaugnay sa pag upo niyang substitute sa kongreso bilang P3PWD Partytlist nominee.

Sa halip inihayag ni Guanzon na magsusumite sila ng komento sa high tribunal batay na rin sa ibinigay sa kanilang sampung araw para tumugon sa TRO.

Una nang naghain ng petisyon sa korte suprema si Duterte Youth Partylist Representative Ducielle Marie Cardema at mister na si Ronald Cardema.

Ang P3PWD ay nakakuha ng isang seat sa papasok na 19th congress.

Kulong nang habambuhay ng walang parole ang natimbog na suspek sa 2015 Paris terror attack.

Si Salah Abdeslam ang natitirang miyembro ng grupong responsable sa nasabing insidente na ikinasawi ng 130 katao at ikinasugat ng halos 500 iba pa.

Ang 32 anyos na si Abdeslam ay ika-limang taga-France na hinatulan ng life sentence ng walang parole mula nang ma legalize ito nuong 1994.

Madilim pa ay dumagsa na ang supporters ni President Ferdinand Bongbong Marcos, Jr. sa Club Intramuros Golf course sa Maynila.

Nagkulay pula ang kapaligiran matapos dagsain ng mga nakapulang damit na may tatak na BBM at mukha ng bagong pangulo ng bansa.

Una nang inihayag ng mga otoridad na inilaan ang golf course na nasa harap ng National Museum sa Padre Burgos Avenue sa BBM supporters at kayang masakop ng 25 hanggang 30 libo katao.

Pinayagan naman ang publiko na pumasok sa Victoria at General Luna Street na kapwa nasa gilid ng golf course mula alas sais hanggang alas nueve lamang ng umaga kanina.

Kaagad natapos ang kampanya sa Wimbledon ni US Tennis Star Serena Williams.

Kasunod ito nang pagdapa ni Williams sa unseeded player na si Harmony Tan sa unang round ng torneo.

Tuwang tuwa si Tan sa kanyang panalo bagamat inamin nitong nahirapan siya sa nasabing laban.

Binigyan naman ng matinding palakpakan ng audience ang 23 time grand slam habang papalabas ng court dahil sa ipinamalas na galing din sa laro.

Tumaas nang bahagya ang bilang ng mga kaso ng COVID-19 sa Pateros.

Ayon kay Pateros Mayor Miguel “Ike” Ponce III, nag zero COVID-19 cases sila nuong mga nakalipas na araw subalit mayruong naitalang siyam na kaso ang lungsod sa kasalukuyan na pawang asymptomatic.

Ipinabatid ni ponce na dalawa sa mga COVID-19 patients ay nasa isolation facility na dahil sa takot na makahawa sa mga kasambahay samantalang ang pito naman ay naka home quarantine.

Kasabay nito, inihayag ni Ponce na tuluy tuloy ang pagturok nila ng COVID-19 booster doses sa kanilang lungsod.

Napasakamay ni Outgoing Vice President Leni Robredo, sa ika apat na sunod na taon ang ang pinakamataas na rating mula sa Commission On Audit.

Ipinost ni Robredo ang katuwaan at pagmamalaki sa ibinigay sa kanyang opisina na “unqualified opinion” na itinuturing na pinakamataas na markang matatanggap ng isang ahensya ng gobyerno mula sa state auditors.

Ang OVP ay unang nakatanggap ng pinakamataas na audit rating nuong 2018, isang taon matapos itong tawagan  ng atensyon ng COA dahil sa delay sa pag liquidate ng travel expenses.

Dumating na sa bansa si US second gentleman Douglas Emhoff na dadalo sa inagurasyon bukas ni President-elect Ferdinand Bongbong Marcos, Jr.

Si Emhoff ay winelcome sa US Embassy ni Philippine Charge D’ Affaires Ad Interim Heather Variava.

Una nang inanunsyo ni US President Joe Biden ang pagpapadala ng US Presidential Delegation para dumalo sa inagurasyon ni PBBM at ito ay pangungunahan ni Emhoff na asawa ni US Vice President Kamala Harris.

Bukod kina Emhoff at Variava, kabilang din sa delegasyon ng Amerika sa inagurasyon ni PBBM sina Bobby Scott – Chairman of the Committee on Education and Labor, US Representative Virginia, Nani Coloretti, Deputy Director, Office of Management and Budget, Admiral James Sandy Winnefeld Jr. – dating Vice Chairman ng Joint Chiefs of Staff, Edgard Kagan, Special Assistant to the President at Senior Director for East Asia and Oceania, National Security Council at Chantale Wong, US Director- Asian Development Bank. —ulat mula kay Raoul C Esperas (Patrol 45)

Uubrang makapasok ng National Museum mula alas-6 ng umaga hanggang alas-9 ng umaga ang sinumang nais dumalo sa inagurasyon ni President-elect Ferdinand Bongbong Marcos, Jr., bukas, June 30.

Ito ayon kay MPD spokesperson Police Major Philipp Ines ay dahil bubuksan nila ang Victoria at General Luna Streets sa publiko papasok ng National Museum sa mga nasabing oras at alas-9 ng umaga ay isasara na ang mga ito.

Ang Marcos supporters ay ipinuwesto sa golf course sa Intramuros sa harap ng National Museum na kaya ang 25 hanggang 30K katao.

Bukod sa supporters, sinabi ni Ines na nasa halos 1, 500 VIP’S at VVIP’S ang inaasahang dadalo sa panunumpa ni PBBM.

Ang VVIP’s ay uupo sa taas ng Podium ng National Museum habang ang VIP’s ay naka puwesto sa lane sa kahabaan ng Padre Burgos Avenue.

Inihayag pa ni Ines na ang kabilang bahagi ng Padre Burgos Avenue malapit sa Museum ay bakante para sa isasagawang parada.