Binalaan ng PAGASA ang publiko kaugnay sa mga pag ulang dulot ng Low Pressure Area.
Ayon sa PAGASA, ang nasabing LPA ay pinakahuling namataan sa layong halos 70 kilometro Hilaga-Hilagang Kanluran ng Virac, Catanduanes o 100 kilometro ng Daet, Camarines Norte.
Kabilang sa mga apektado ng sama ng panahon ang Bicol Region, Calabarzon, Mimaropa, Isabela, Aurora at Visayas.
Nagbabala rin ang PAGASA sa posibleng lahar flow sa bahagi ng bulkang Bulusan kapag nagtuluy-tuloy ang pag ulan.
Apat na mangingisda ang nasawi at isa pa ang nawawala matapos lumubog ang kanilang bangka sa Bagac, Bataan dahil sa malalaking alon.
Kinilala ang mga nasawi na sina Alexander Mesina, Tirso De Guia, Edgar Balboa at Gregorio Limboc.
Ayon kay commodore Armand Balilo, spokesperson ng Philippine Coast Guard, hinahanap pa ng kanilang team sa Bataan at ng maritime group ang nawawalang mangingisda na nakilalang si Jemar Dacillo.
Nakapag-isyu na rin naman aniya sila ng notice to mariners sakaling makita ang nasabing mangingisda lalo’t daanan ng barko ang nasabing area.
45 mangingisda ang unang nasagip sa nasabing insidente.
Tinanggap na ni dating PAL President Jaime Bautista ang alok na maging susunod na kalihim ng DOTr.
Kasunod na rin ito nang pag kumpirma ni Bautista sa pagkikita nila ni President-elect Ferdinand Bongbong Marcos sa opisina nito sa Mandaluyong City.
Sinabi ni Bautista na una na siyang nakatanggap ng tawag mula kay Incoming Executive Secretary Atty. Vic Rodriguez para makipag pulong kay BBM.
Wala aniya siyang idea sa alok na maging DOTr Secretary bagamat natutuwa siya at nagtataka kung paano napasama ang kanyang pangalan sa pinagpilian.
Binigyang diin ni Bautista na pangunahing direktiba sa kanya ni BBM na mag develop ng premier airport na pasok sa international standards.
Inamin ni Bautista na mas malaking responsibilidad ang maging DOTr Secretary kumpara nuong pangulo siya ng flag carrier subalit nakikita niyang ang kanyang karanasan sa airport at airline operations ang pinakamagandang kuwalipikasyon nya. —sa ulat ni Raoul Esperas (Patrol 45)
Malawak at mapanikil.
Ito ang reaksyon ni Senador Koko Pimentel sa aniya’y hindi makatuwirang pag-block ng NTC sa mahigit 20 websites na umano’y may kaugnayan sa makakaliwa.
Sinabi ni Pimentel na ang nasabing hakbangin ay pagkakait sa Generation Z o sa mga kabataan ng pagkakataong mapag-aralan at mapag isipan ang iba’t ibang pananaw, idea at teorya ng sinasabi ng mga progresibo.
Dapat aniyang mahikayat ang mga kabataang Pilipino na maging critical thinkers para matuto ang mga ito na gumawa o humanap ng ibang paraan nang pag resolba sa mga problema at isyu ng bansa.
Una nang ipina-block ni National Security Adviser Hermogenes Esperon, Jr. sa NTC ang mga nasabing website na may direkta anitong ugnayan sa partido ng mga komunista. —sa ulat ni Cely Ortega-Bueno (Patrol 19)
Patay ang pito katao sa barilan sa paghahain ng arrest warrant sa ilang suspek sa Rajah Buayan sa Maguindanao.
Ayon sa report, maghahain sana ang mga pulis ng arrest warrant laban sa tatlong suspek subalit pinagbabaril sila kaagad ng mga suspek kaya’t napilitan silang gumanti.
Nasawi ang dalawang target ng operasyon na nahaharap sa mga kasong frustrated murder at robbery with homicide.
Limang kasamahan ng mga suspek ang napatay din samantalang arestado ang apat pang kasamahan ng mga suspek at isang pulis naman ang nasugatan sa insidente.
Narekober sa lugar ng engkuwentro ang ilang matataas na kalibre ng baril, mga bala at isang grenade launcher.
Tuloy na ang Wattah Wattah Festival sa San Juan City bukas, June 24.
Ayon kay San Juan Mayor Francis Zamora, nasasabik na ang maraming mamamayan nila sa nasabing kasiyahan na bahagi nang pagdiriwang ng kapistahan ni St. John the Baptist.
Dalawang taon aniyang hindi naisagawa ang nasabing festival o basaan ng tubig sa mga dumadaan at mga residente dahil sa Covid-19 pandemic.
Subalit pinapayagan na ng IATF ang mga ganitong aktibidad sa mga lugar na nasa ilalim ng alert level 1, basta’t patuloy ang pagsunod sa health protocols.
Walang ibang paraan kundi magtaas ng presyo ng tinapay.
Ito ang katuwiran ng ilang bakery matapos sumipa na rin ang presyo ng mga sangkap sa paggawa ng tinapay.
Nasa P.50 hanggang P1.00 ang itinaas ng ilang bakery sa sa presyo ng pandesal at iba pang uri ng tinapay.
Binigyang diin naman ni Luisito Chavez, pangulo ng panaderong pilipino na ang patuloy na pagtaas ng mga sangkap tulad ng harina at asukal ang isa sa mga dahilan kayat nagtaas na ng presyo ang mga panadero.
Kasama na rin dito ang pagbulusok ng halaga ng piso kontra sa dolyar at patuloy na sagupaan ng Russia at Ukraine.
Kasabay nito umapela si Chavez sa publiko na huwag gawing basehan ang presyo ng Pinoy Tasty na nasa P28.50 na at Pinoy Pandesal na P23.50 kada sampung piraso.
Arestado na ang suspek sa pag atake sa isang Filipino family sa parking lot ng isang kainan sa North Hollywood sa Amerika.
Ayon sa report 300,000 US dollars ang inirekomendang piyansa para sa pansamantalang kalayaan ng 31 anyos na si Nicholas Weber.
Si Weber ay nakakulong na sa Los Angeles County Jail matapos damputin ng mga pulis.
Ang suspek ay may record ng iba pang krimen bago atakihin ang pamilya Roque.
Ikinatuwa naman ni Patricia Roque, isa sa mga biktima ang pagkaka aresto kay Weber subalit kailangang mapanagot ito para sa hustisyang dapat sa kanilang pamilya.
Nanumpa kay Supreme Court Associate Justice Marvic Leonen si Senator Elect Raffy Tulfo.
Kasama ni Tulfo sa kanyang oath taking ang may bahay na si ACT CIS Partylist Representstive Jocelyn Tulfo.
Sa Lunes naman magtutungo sa senado si Tulfo upang dumalo sa orientation para sa mga bagong senador.
Si Tulfo ay isa sa tatlong bagong senador na nakakuha ng mataas na boto nitong nakalipas na eleksyon. – ulat mula kay Cely Ortega-Bueno (Patrol 19) at sa panulat ni Judith Estrada-Larino
Sasagutin ng gobyerno ang pagbabalik sa bansa ng mga labi ni Pinoy Lawyer John Albert Jal Laylo na biktima ng gun attack sa Philadelphia, USA.
Ipinabatid ito ni Leah Bustamante Laylo, ina ni Atty Jal, kasunod nang pagdating sa bansa ng mga labi ng abogado sa susunod na Linggo.
Sinabi ni ginang Laylo na nais niyang magpakatatag sa nangyari sa kanyang anak na maraming nagawang mabuti sa kapwa kaya’t hinihintay ng marami ang pagbabalik bansa nito.
Muling umapela sa US government si ginang Laylo para mabigyang katarungan ang sinapit ng anak.