May kapasidad na ang Research Institute for Tropical Medicine (RITM) na maka-detect ng kaso ng monkeypox.
Ayon sa RITM, io-optimize nila ang real time PCR testing para ma detect ang monkeypox virus at ang ikalawang PCR test ay para naman malaman kung anong organismo nabibilang ang naturang virus.
Ipinabatid ng RITM na tanging suspected cases lamang at yung mga sumunod sa lahat ng procedure para sa referral ang ipo proseso nila base na rin sa DOH memorandum.
Bahagi na ng coaching staff ng Gilas Pilipinas si Barangay Ginebra Coach Tim Cone.
Ito ay matapos kunin ni Gilas Pilipinas Head Coach Chot Reyes si Cone na aniya’y maasahan niya sa coaching techniques sa pagsabak ng National Basketball Team sa World Cup.
Ang trabaho ni Cone ay magsisimula sa paghahanda ng Gilas para sa 2023 World Cup kung saan magiging co-host ng bansa ang Japan at Indonesia.
Si Cone ay naging coach nang mapasakamay ng Gilas ang gold medal sa Southeast Asian Games nuong 2019.
Inaresto ng Bureau of Immigration (BI) ang walong overstaying foreigners sa Metro Manila at umano’y pawang miyembro ng isang drug syndicate.
Ayon kay Immigration Commissioner Jaime Morente, ang mga nasabing dayuhan ay inaresto ng BI Fugitive Search Unit katuwang ang NBI Special Action Unit sa Las Piñas at Makati City.
Sinabi ni Morente na sasailalim muna ang dalawang Yemeni Nationals, tatlong Sudaness at isang Djibouti, Sri Lankan at Kyrgyzstani Nationals sa deportation procedures dahil sa pagkakasangkot sa illegal drugs.
Kakasuhan aniya ang mga naturang dayuhan at kung mako-convict, tatapusin muna nila ang sentensya sa bansa bago sila pabalikin sa kani kanilang mga bansa.
Iginiit ni ACT Teachers Partylist Representative France Castro ang mga dapat gawin para epektibong maibalik ang face to face classes.
Sinabi ni Castro na dapat pairalin ang social distancing bukod pa sa dagdag na guro, maayos na structures, ventilation at maging ang sanitation facilities para maisakatuparan ang pagbabalik ng face to face classes ngayong school year.
Isang Pilipino ang nabiktima ng pagnanakaw sa isang mall sa California, USA.
Batay sa lumabas na video, nakahiga ang biktima habang kinukuha ng suspek ang kanyang mga gamit.
Ayon sa mga otoridad, maaaring armado ng patalim ang suspek nang nakawan ang nasabing Pinoy sa loob ng Southland Mall sa Hayward Area.
Hindi naman kinilala ng mga pulis ang biktima habang tikom ang bibig sa posibleng racial motive sa insidente.
Isinusulong ni National Security Adviser Hermogenes Esperon sa National Telecommunications Commission ang pag block o pagharang sa access sa mga website ng CPP-NPA-NDF.
Kabilang dito, ayon kay Esperon ang mga website ng mga progresibong grupo at independent media tulad ng Bulatlat at Pinoy Weekly.
Wala namang ibinigay na dahilan si Esperon sa kahilingang ma-block ang access sa mga naturang websites na aniya’y may koneksyon at sumusuporta sa mga terorista at grupo ng mga ito.
Kinumpirma ni dating Agriculture Secretary Emmanuel Manny Piñol ang pagtanggap niya sa alok na maging bahagi ng food security group ng papasok na administration.
Ipinabatid ni Piñol na tinanggap niya ang alok ni National Security Adviser Clarita Carlos na tulungan siyang tumutok sa National Food Security Strategy.
Sinabi ni Piñol na naiintindihan ni President Elect Ferdinand Marcos, Jr. ang problema sa food security kaya’t handa siyang tumulong na bumuo ng mga paraan para sa COVID-19 post economic recovery program ng agrikultura.
Panahon na aniyang tutukan ng administrasyon ang food production lalo na sa bigas at huwag nang dumipende sa importasyon at makabangon na rin ang mga magsasaka mula sa pagkalugi.
Balik normal na ang mga nagsisimba sa Baclaran Church sa Paranaque City simula ngayong araw na ito.
Ito ay dahil magkakatabi nang nakaupo ang mga nakikinig ng misa sa loob ng simbahan.
Tuwing Miyerkules inaasahang dadagsain ang Baclaran Church dahil sa nakaugaliang pagsisimba rito simula alas-5:30 ng madaling araw hanggang alas-6:30 ng gabi.
Halos P9-M ang mapapasakamay ng isang mananaya matapos makuha ang winning numbers combination sa Mega Lotto 6/45 draw.
Ipinabatid ito ng PCSO subalit wala namang mapalad na nagwagi sa kasabay na Grand Lotto 6/55 draw na may pot money na mahigit P232-M.
Inaasahang tataas ang Jackpot Prize sa susunod na Grand Lotto draw bukas ng gabi.
Binabarat ang mga health workers.
Ito ayon kay Robert Mendoza, Pangulo ng Alliance of Health Workers ang nangyayari dahil mayruon namang pondo na para sa kanilang sektor subalit nagagamit sa ibang bagay.
Kaya nga aniya hindi na rin napipigilan ang maraming health workers na mangibang bansa.