Judith Estrada-Larino

May bago nang tagapagsalita si Vice President-elect Sara Duterte-Carpio.

Ito ayon sa kampo ni Duterte ay sa katauhan ni Atty. Reynold Munsayac na papalitan si incoming Tourism Secretary Christina Frasco.

Ipinabatid ng kampo ni Duterte na magka klase sa law school ang Bise Presidente at si Munsayac na siya ring umalalay sa presidential daughter sa pagtatayo ng tapang at malasakit nuong 2017.

Nuong isang taon nagbitiw si Munsayac bilang PCGG Commissioner at Acting Chairman para tumulong sa kampanya ni Duterte.

Kasabay nito, nagpasalamat si Duterte kay Frasco sa pagtulong sa kanyang maipaabot sa mga Pilipino ang kanyang mensahe sa pamamagitan ng media.

Dalawang motibo ang tinututukan ng mga otoridad sa Amerika kaugnay sa pagkakapaslang kay Pinoy Lawyer Atty John Albert “Jal” Laylo.

Kabilang sa mga motibong ito, ayon kay New York Consul General Elmer Cato ay Mistaken Identity kung saan posibleng nagkamali ang gunman sa pinaputukang sasakyan na maaaring kapareho ng sinasakyan ni Laylo.

Bukod pa ito sa anggulong random shooting.

Isang pulong na ang hiniling ni Cato kay Philadelphia Mayor Jim Kenney at Police Commissioner Daniella Outlaw kaugnay sa estado ng imbestigasyon sa krimen.

Kasabay nito, tinawag namang heinous at senseless ni Kenney ang nangyari kay Laylo matapos ipaabot ang pakikiramay sa buong pamilya.

Binigyang diin ni Kenney na ang krimen ay resulta ng maluwag na pagdadala ng mga armas sa kanilang lungsod na hindi na talaga aniya katanggap tanggap.

Alam ni Vice President Sara Duterte-Carpio ang mga usaping nakakaapekto sa mga kabataan ngayon.

Ayon ito kay Rhodora Ferrer, Executive Director ng  Private Education Assistance Committee (PEAC) bilang pag sang-ayon sa naging talumpati ng susunod na pangalawang pangulo.

Partikular na tinukoy ni Ferrer ang naging pahayag ni Duterte hinggil sa kahalagahan ng pagkakaruon ng strong loving happy family na siyang nagtatakda ng lahat ng basic foundations na kailangan sa development at paglaki ng isang bata samantalang tungkulin ng mga magulang na turuan ang kanilang mga anak ng values tulad ng integrity at discipline.

Ipinabatid ni Ferrer na nagtakda sila ng serye ng pakikipag pulong kay Duterte kung saan ipapaabot nila ang ilang concerns tulad ng dagdag subsidy para sa private schools at pagtataas ng suweldo ng mga guro.

Hindi nabanggit ni Vice President Elect Sara Duterte-Carpio sa kaniyang inaugural speech ang mga plano niya bilang kalihim ng Department of Education (DepEd).

Ayon kay Professor Herman Kraft ng UP Political Science Department, pawang motherhood statements ang laman ng talumpati ni Duterte at uubra sanang banggitin niya ang kanyang mga plano sa education sector.

Sinabi ni Kraft na sadyang naghihintay ang publiko ng mga polisiyang ikakasa ni Duterte sa DepEd.

Makikipag-ugnayan pa ang PNP sa pamunuan ng Philippine Arena kaugnay sa posibleng pag-hook up nito sa inagurasyon ni President-elect Ferdinand “Bongbong” Marcos, Jr. sa June 30.

Ayon ito kay PNP Director for Operations, Police Brigadier General Valeriano de Leon dahil nasa halos 300 hanggang 350 guests lamang ang ma-a-accommodate sa National Museum at hindi rin naman lahat ay kaya pang makapag-biyahe para masaksihan ang makasaysayan aniyang inagurasyon ni BBM.

Nanawagan si UN special Rapporteur Mary Lawlor sa awtoridad sa Pilipinas na i-atras na ang mga kaso laban sa human rights defenders.

Sa gitna na rin ito nang pagsalang sa witness stand ng national officers ng karapatan sa perjury case na isinampa ni outgoing national security adviser Hermogenes Esperon, Jr. laban sa grupo.

Sinabi ni Lawlo na ang paghahain ng kaso ay malinaw na retaliation o pagganti sa mga hakbangin ng human rights defenders ng bansa.

Una nang inihayag ng karapatan na ang kaso ay isinampa nila katuwang ang Gabriela at Rural Missionaries of the Philippines matapos nilang isama si Esperon bilang respondent sa mga inihain nilang petition for writs of amparo at habeas corpus.

Sumakabilang-buhay na kaninang umaga ang Filipino lawyer na binaril sa Amerika.

Ipinabatid ito ni Leah Bustamante Laylo, ina ni Atty. John Albert Jal Laylo na bumibisita lamang sa kanilang mga kaanak sa Philadelphia.

Sa kanyang facebook post, nagpasalamat si ginang Laylo sa 35 years ng buhay ng anak na inilarawan niya bilang good, smart, generous, loving and caring son.

Ang mag-ina ay sakay ng Uber vehicle patungong airport nang pagbabarilin ng hindi pa natukoy na suspek.

Inaayos na ng pamilya ang pagbalik ng mga labi ni Atty. Laylo sa Pilipinas.

Si ginang Laylo ay nagtamo ng minor injuries sa nasabing pamamaril at nasa stable condition na samantalang si Atty. Laylo ay may tatlong tama sa ulo at naka life support na lamang matapos ideklarang brain dead ng mga doktor.

Nagsimula na ang DPWH sa pag-repair ng EDSA Kamuning Flyover sa Quezon City matapos makitaan ng mga butas.

Isinara muna ang isang lane sa Southbound dahil kailangan munang alisin ang semento sa ibabaw para mabatid kung hanggang saan ang kailangang i-repair.

Dahil dito, tanging mga maliliit na sasakyan lamang at EDSA carousel buses ang pinapayagang gumamit ng Flyover sa Southbound direction.

Sinabi ng DPWH na kakayanin sa loob ng isang linggo ang pag-repair sa nasabing bahagi ng EDSA Kamuning Flyover.

Nanumpa kay Pangulong Rodrigo Duterte si Senator Elect Robin Padilla.

Kasama ni Padilla na nagtungo sa Malakaniyang ang asawang si Mariel at mga anak na sina Isabella at Gabriela gayundin ang inang si Eva Padilla.

Sa kanyang post, ipinagmalaki ni Mariel ang asawa na nakikita niyang magiging amazing at effective senator.

Sinabi pa ni Mariel na suportado nila si Padilla  sa pagharap nito ng mga hamon sa pagiging mambabatas.

Una nang binigyang diin ni Padilla na kakayanin niyang pangunahan ang Senate Committee on Constitutional Amendments and Revision of Codes and Laws kahit bagitong senador pa lamang.

Si Padilla ay nanguna sa pagka senador nitong nakalipas na eleksyon matapos makakuha ng mahigit 26 million votes.

Nasa apat na milyong pisong halaga ng smuggled carrots ang nakumpiska ng Bureau of Customs.

Kasunod na rin ito nang nakuhang report ng customs hinggil sa pagpasok ng misdeclared agricultural products sa bansa.

Carrots ang bumungad sa mga otoridad nang inspeksyunin ang mahigit 2,000 karton sa halip na steamed buns na idineklarang laman nito.

Ikinakasa na ng mga otoridad ang kaso laban sa trading company at broker ng smuggled items.