Handa ang CSC (Civil Service Commission) na tulungan ang mga empleyadong maaapektuhan ng rightsizing ng gobyerno.
Ipinabatid ni CSC Commissioner Aileen Lizada na bahala na silang ilipat ang mga maaapektuhang empleyado depende sa kuwalipikasyon at kakayahan.
Sinabi ni Lizada na makikipag ugnayan sila sa DBM para tulungan ang mga ahensyang nangangailangan ng organizational review.
Iginiit ni Senador Ronald Bato Dela Rosa na hindi sila sasali sa anumang posibleng pagbubukas muli ng imbestigasyon ng International Criminal Court (ICC) sa drug war ng administrasyong Duterte.
Sa halip sinabi ni Dela Rosa na bukas siyang humarap sa mga korte sa bansa hinggil sa nasabing usapin.
Binigyang-diin muli ni Dela Rosa na isang insulto sa justice system at malinaw na pakikialam sa soberanya ng bansa kung papayagan ang ICC na pumasok sa bansa at imbestigahan ang anti-illegal drug campaign ng nakalipas na administrasyon.
Hindi aniya siya kailanman papasailalim sa hurisdiksyon ng ICC na hindi naman alam ang problema ng bansa at ginagawa ng gobyerno para solusyunan ang mga problema.
Pormal nang umupo ngayong araw ang bagong Eastern Police District (EPD) Director na si Police Brigadier General Jerry Bearis.
Kasunod na rin ito nang pangunguna ni Bearis sa flag raising ceremony sa EPD headquarters sa Pasig City.
Tiniyak ni Bearis ang pinaigting na kampanya ng EPD kontra krimen.
Ipinaabot ng Pangulong Ferdinand “Bongbong” Marcos, Jr. ang pagbati sa team ng Pilipinas matapos mag kampeon sa AFF Women’s Championship 2022.
Binigyang-pugay ni PBBM ang aniya’y historial victory ng pambato ng bansa sa women’s football.
Kinilala ni PBBM ang pagpapakita ng husay at talento ng mga manlalarong Pilipino.
Suportado ni senador Francis Escudero ang pag-aalis ng Ched sa moratorium na nagbabawal sa mga kolehiyo at unibersidad na mag-alok ng undergraduate nursing programs.
Sinabi ni Escudero na makatutulong ang nasabing hakbangin upang mapataas ang bilang ng medical frontliners sa bansa.
Naramdaman aniya ang hagupit ng pandemya sa kakulangan ng nurses at iba pang healthcare workers kaya’t panahon nang palakasin ang workforce para laging handa sa anumang health crisis.
Tiniyak ni Escudero, chair ng Senate Committe on Higher Education ang pagsilip niya sa estado nito sa bansa.
Hindi dapat maapektuhan ng rightsizing ng burukrasya ang mga masisipag at maayos na empleyado ng gobyerno.
Ayon ito kay senador Ramon Bong Revilla, Jr. sa gitna na rin nang pag-suporta niya sa planong rightsizing ng economic managers para maiwasan ang overlapping at redundant functions.
Binigyang-diin ni Revilla na dapat ibatay sa performance ang pag-aayos ng government workforce.
Ikinasal na ang singer na si Jennifer Lopez at aktor na si Ben Affleck nitong weekend sa Las Vegas.
Ito ay matapos kumuha ng marriage license ang celebrity couple, batay sa mga dokumentong inilabas online ng clerk’s office ng clark county sa Nevada.
Ayon sa report, ang power duo na tinaguriang Bennifer ay ikinasal sa isang small ceremony.
Sa instagram, ipinost ng Marry Me actress ang mga katagang Sadie! #iykyk go to the OnTheJlo for all the deets” at ini link ang kanyang newsletter website sa kanyang page bio.
Sinabi ni Jlo na mayroon siyang “exciting and special story to share” subalit ang subscribers nila sa “inner circle” newsletter lamang ang makakabasa ng nasabing exciting story.
Halos isang taon nang nagka balikan ang tinaguriang bennifer matapos ang dalawampung taon at nag engage nitong nakalipas na Abril.
Kumbinsido si dating Finance Secretary Roberto De Ocampo sa mga hakbanging ng Pangulong Ferdinand Bongbong Marcos Jr. para magtuluy-tuloy ang takbo ng ekonomiya ng bansa.
Sinabi ni De Ocampo na nakikita niya ang pagsusumikap ng Marcos administration para matiyak ang trabaho para sa mga Pilipino sa gitna na rin nang paghahanap ng paraan upang hindi gaanong tumaas ang presyo ng bilihin at maging ng krudo.
Kasabay nito, ipinabatid ni De Ocampo na pabor siya sa hakbangin ng BSP na makontrol ang money supply o supply ng piso para bumaba ang halaga nito.
Kung tutuusin aniya ay mas malala pa ang sitwasyon sa Amerika at hindi dapat gayahin ng bansa ang anumang hakbangin ng Estados Unidos.
Hindi lamang sa ehekutibo kundi maging sa lehislatura dapat ipatupad ang planong rightsizing.
Ayon ito kay Congressman Rufus Rodriguez matapos paboran ang planong rightsizing sa ehekutibo para makatipid ng halos 15 billion pesos mula sa mga suweldo ng kawani ng mga redundant agencies, offices at iba pang executive at legislative creations.
Sinabi ni Rodriguez na kung titingnan ang taunang budget marami sa mga tanggapan at opisina ang may magkakapareho o overlapping na mandato.
Dapat din aniyang maghinay-hinay ang lehislatura sa paglikha ng mga bagong departamento hanggang matukoy ng ehekutibo ang sapat na bilang ng mga empleyado nito.
Karapatan ng empleyadong tumangging mag trabaho kung nakikita nitong magiging mapanganib siya sa kanyang workplace.
Binigyang diin ito ni Occupational Safety and Health Center Executive Director Noel Binag dahil ang kaligtasan sa trabaho ay sama-samang responsibilidad ng employers, safety officers at mga manggagawa.
Ayon kay Binag, may karapatan din ang manggagawa na ipaabot sa kanilang safety officer, employer at kahit maging hanggang sa DOLE ang kaniyang sitwasyon.