Judith Estrada-Larino

Pasok ang Pilipinas sa top 10 bilang best snorkeling destinations in the world dahil sa snorkeling sp[ots nito sa Palawan, Batangas, Cebu at Bohol.

Ang Pilipinas ay ikapito sa listahan ng Bounce, isang luggage storage company matapos tingnan ang iba’t ibang karagatan ng mga bansa, batay na rin sa ganda ng coral reef areas, bilang ng fish species at snorkeling tours.

Bukod pa ito sa mga factor tulad ng percentage ng global plastic waste emission at sea temperature.

Binigyang diin ng Bounce na malaking bagay ang snorkeling para madiskubre ang mga kakaibang mundo sa ilalim ng dagat na mag iiwan ng lifelong memories.

Ang dagat anito ay isa sa mga pinakamagagandang tanawin sa mundo subalit higit na mas maganda ang pag explore kung ano pa ang nasa ilalim nito tulad ng mga coral reefs at unique animals.

Nangunguna ang Australia sa listahan ng best snorkeling destinations in the world kung saan ikalawa naman ang Maldives at ikatlo ang Amerika at Cuba samantalang pasok din dito ang mga bansang Bahamas, Papua New Guinea, Indonesia, Fiji at Micronesia.

Muling lumabas ang pagiging madiskarte at utak negosyo ng mga Pilipino ngayong araw na ito.

Kasabay nang pagbubukas ng 19th Congress at unang State of the Nation Address (SONA) ng Pangulong Ferdinand Bongbong Marcos, Jr. nagkalat sa IBP Road sa Quezon City ang mga ibinibentang souvenirs ng ilang kababayan natin.

Kabilang dito ang mga pin, key chain, sticker at iba pang souvenir na may mukha ni PBBM.

Hinimok ng isang political analyst si Pangulong Ferdinand Bong Bong Marcos, Jr. na gamitin ang Legislative Executive Development Advisory Council (LEDAC) para higit na maging maayos ang mga legislation sa ilalim ng kaniyang administrasyon.

Ayon kay Associate Professor Jean Franco ng UP College of Political Science, ang LEDAC ang mangangasiwa nang pagpapalaganap ng legislative agenda sa Senado at Kamara.

Ang LEDAC ay binubuo ng 20 miyembro kabilang ang pangulo, pangalawang pangulo, senate president at house speaker.

Mahigit 40 insidente ng hate crimes at iba pang aktibidad laban sa mga Pilipino sa New York ang naitala ng konsulado ng bansa sa Amerika simula pa noong isang taon.

Sinabi ni New York Consul General Elmer Cato na ang 42 incidents ay maituturing na isolated cases at maliit na bahagi lamang ng halos 67,000 Pilipinong nasa New York.

Kasabay nito, ipinabatid ni Cato na ligtas namang magtungo ng Amerika sa kabila ng mga hate crimes sa New York.

Pinakahuling biktima ng hate crime laban sa mga Pilipino ay ang 50 anyos na Pilipinang pinagsalitaan ng masasama at hinarass ng isang umano’y palaboy na babae sa 63rd Drive Subway Station sa Rego Park, Queens.

Walang seryosong banta sa seguridad ng unang State of the Nation Address (SONA) ng Pangulong Ferdinand “Bongbong” Marcos, Jr. sa Lunes, July 25.

Ayon ito kay PNP Spokesperson Police Colonel Jean Fajardo bagama’t tuluy-tuloy ang pag-monitor ng kanilang intelligence team at iba pang ahensya ng gobyerno sa posibleng pagtatangkang guluhin ang SONA.

Kasabay nito, sinabi ni Fajardo na hindi nila ikinukunsider ang pagpapatupad ng signal jamming sa kasagsagan ng SONA subalit nakadepende pa rin ito sa takbo ng seguridad at threat assessment sa mismong araw ng SONA.

Mahigit 21 libong pulis aniya ang ipapakalat nila sa Lunes.

Ipinutok ng BRP Antonio Luna o FF151 ang mga pangunahing armas at battery nito sa sea phase na tinaguriang pinakamalaking pinag-isang naval exercise sa buong mundo.

Sa idinaos na Rim of the Pacific Exercise 2022 (RIMPAC) isinalang sa testing ang 76mm super rapid gun, na pangunahing battery ng FF151 gayundin ang 30mm smash aselsan at caliber 50 machine gun, target ang mga hammer head na idineploy ng Royal Canadian Navy Halifac-Class Frigate HMCS Winnipeg.

Isinailalim din sa testing ang 76mm super rapid gun ng FF151 sa Naval Surface Fire Support Rodeo Exercises sa pamamagitan nang pag-target sa 2D Virtual Land Information.

Isinusulong ni Education Undersecretary Epimaco Densing, III ang paggamit ng English at Filipino bilang Medium of Instructions sa mga paaralan.

Sinabi ni Densing na ginagamit ang regular English at Filipino bilang Medium of Instructions at Exception to the Rule ang mother tongue na inoobligang gamitin mula Kindergarten hanggang grade 3 sa ilalim ng K-12 Law.

Gayunman, inamin ni Densing na nangangailangan ng batas ang panukala niyang adjustment na ilang beses na rin niyang natalakay kay Vice President at Education Secretary Sara Duterte.

Samantala, ipinabatid ni Densing na natapos na ng DepEd ang pagrepaso nito sa mga programa para sa Kindergarten hanggang Grade 10 kung saan may mga isinusulong silang probisyon na ilalatag nila sa mga susunod na araw.

Mas higit umanong nakakahawa ang bagong COVID-19 Omicron subvariant na BA.2.75 at uubrang tablahin ang mga bakuna kontra COVID-19.

Binigyang diin ito ni Dr. Rontgene Solante, Infectious Disease Expert bagamat naghihintay pa sila ng mga pag-aaral na nagsasabing mas matitinding sintomas ang dala ng naturang Omicron subvariant na tinagurian ding Centaurus.

Ayon pa kay Solante, miyembro ng Vaccine Expert Panel (VEP), maaga pa para matukoy ang anyo at galaw ng BA.2.75 subalit may mga mutations na nadiskubre nilang mayruong mataas na hawahan tulad ng BA.5 at may posibilidad na makaapekto ito sa mga bakuna.

Sinabi ni Solante na kung titingnan ang genetic tree ng Omicron variant habang nag-e-evolve ito, nariyan ang posibilidad nang tumaas na hawahan at abilidad na balewalain ang mga bakuna o mismong proteksyon na ibinibigay ng mga bakuna.

Ang BA.2.75 ay unang lumutang sa India nuong Mayo at mabilis na kumalat sa mga bansang Amerika, Britanya, Australia at Netherlands.

Nagkasa ng programa ang OWWA para sa mga anak ng mga OFW.

Ang binuong OCC (Ofw’s Children’s Circle)  ay kasunod na rin ito ng resolusyong nilagdaan nina labor Secretary Bienvenido Laguesma at Department of Migrant Workers Secretary Susan Toots Ople.

Ayon sa OWWA, tutulungan ng OCC ang mga anak ng mga ofw na mailabas ang kanilang creative skills at talents, paunlarin ang social skills, palakasin ang coping mechanisms at imulat sa mga usapin ng climate change, values reorientation, digital literacy at drugs.

Sinabi ng OWWA na makakatulong din ang programa para maisulong ang pagkakaibigan, pag develop ng potential leaders at mahimok na makiisa ang mga anak ng mga OFW sa programa at polisiya ng gobyerno.