Judith Estrada-Larino

Tatlong Undersecretary ng (DOJ) Department of Justice ang itinalaga ng Pangulong Ferdinand Bongbong Marcos, Jr.

Ayon kay Justice Secretary Jesus Crispin Remulla kabilang sa mga itinalagang Undersecretary sina Jesse Andres, dating chief of staff ni dating vice president Noli De Castro Geronimo Lim Sy at Jose Ragus Cadiz, Jr.

Nananatili sa puwesto si Undersecretary Deo Marco samantalang na promote naman si Assistant Secretary Nicholas Ty bilang Undersecretary.

Sinabi ni Remulla na marami pang puwesto sa DOJ ang kailangang mapunan.

Pinalitan ni Andres si dating Undersecretary Adrian Sugay Sy kay dating undersecretary Emmeline Aglipay-Villar si Cadiz ang kapalit ni dating undersecretary Jon Salvahan.

Kinukumbinsi ng Department of Agriculture ang egg producers na taasan ang kanilang produksyon dahil sa mataas na demand nito.

Ito ayon kay Agriculture Assistant Secretary Khristine Evangelista ay matapos nilang makipag ugnayan sa egg producers partikular na yung mga nagbawas ng kanilang produksyon.

Sinabi ni Evangelista na ayaw nang mag operate ang egg producers dahil sa banta ng bird flu.

Nakikipag ugnayan na rin sila sa market master at quezon city government para makapag supply ng itlog ang ilang kooperatiba.

Tiniyak ni Evangelista ang tulong ng (BAI) Bureau of Animal Industry sa mga producer sa pamamagitan ng ayuda sa gitna ng mataas na presyo ng feeds.

Tataas muli ang presyo ng itlog.

Ito ayon sa suppliers ay dahil sa banta ng bird flu at mahal na presyo ng feeds o pagkain ng manok.

Nabatid na tataas ng P6 ang kada tray ng itlog at C50 ang idadagdag sa presyo ng kada itlog.

Sinasabing kada tatlo hanggang apat na araw nagtataas ng presyo ng itlog ang mga supplier.

Itinaas ang presyo ng itlog dahil limitado lamang ang mga nangingitlog dulot nang pagkakasakit ng maraming manok bukod pa sa nagtaas ding presyo ng feeds.

Dinadagsa na ang mga supplier ng school uniform, tatlong linggo halos bago ang pagbubukas ng klase.

Ayon sa mga mananahi, nuong isang linggo nagsimulang magdatingan ang kanilang mga customer pati mula sa mga  estudyante sa pribadong paaralan.

Nasa P700 hanggang P800 ang halaga ng kada set nang patahing school uniform.

Samantala, sa Divisoria naman, mabibili ang polong panlalaki mula 250 hanggang 300, blouse – 200 hanggang 250, plain skirt – 150 hanggang 200 at checkered skirt – 150 hanggang 250 depende sa size.

Ang sariling wika ang magiging batayang lakas sa paglinang ng kultura sa paglipas ng panahon.

Binigyang diin ito ni Pangulong Ferdinand Bongbong Marcos, Jr. bilang pagbati at pakikiisa sa pagdiriwang ng Pilipinas sa Buwan ng Wikang Pambansa ngayong Agosto.

Sinabi ni PBBM na higit kailanman ay dapat panatilihing matatag ang lingwistikong pundasyon sa Filipino at palagiang isaisip at isapuso na tayo lamang ang makapagpapatibay ng wikang taal sa pagkakakilanlan natin.

Napapanahon aniyang paalalahanan ang ating mga sarili na ang Filipino ay hindi limitado sa mga salitang likas lamang sa Tagalog kundi kalipunan ng iba’t ibang mga wika sa buong bansa na siyang magbubuklod sa lahat tungo sa pagsulong ng mas maunlad at nagkakaisang republika. —sa ulat ni Jopel Pelenio (Patrol 17)

Itinalaga ng Pangulong Ferdinand Bongbong Marcos , Jr. si Labor Leader Allan Tanjusay bilang DSWD Undersecretary.

Nagpasalamat naman si Tanjusay kay PBBM sa kanyang appointment bilang Undersecretary for Inclusive and Sustainable Peace para matutukan partikular ang mga nagbabalik loob sa pamahalaan, kanilang pamilya, conflict affected areas at indigenous people’s communities.

Natutuwa siyang nabigyan ng pagkakataong tutukan at magpatupad ng mga kapaki pakinabang na mga  programa at serbisyo para sa mga Pilipinong nasa ilalim ng vulnerable sectors.  —sa ulat ni Jopel Pelenio (Patrol 17)

Target ng Land Transportation Office (LTO) na malinis ang kalahati sa 11 million backlog nito sa plaka sa loob ng anim na buwan.

Ayon ito kay LTO Assistant Secretary Teofilo Guadiz, III na nagsabing kabilang sa backlog ang mga plakang nagawa na simula pa nuong 2016.

Inihayag ni Guadiz na dodoblehin nila ang kanilang manpower o bilang ng mga tauhan sa planta para makagawa ng plaka 24 oras at makakuha ng iba pang manufacturer.

Kasabay nito, ipinabatid ni Guadiz na kinukunsider nilang gawing online ang mga transaksyon na may kaugnayan sa pagpaparehisto ng sasakyan at renewal ng driver’s license para maiwasan ang korupsyon.

Dinampot ng mga otoridad ang Plant Manager at ilang tauhan nitong sangkot sa iligal na pagre-refill ng LPG tanks sa General Trias, Cavite.

Huli sa akto ng mga tauhan ng Anti Organized Crime Unit ng Criminal Investigation and Detection Group (CIDG) ng PNP ang ilang tauhan ng nasabing planta na nagre-refill ng LPG tanks ng mga kilalang brand.

Sinabi ng mga otoridad na may bitbit ng search warrant na tinangka pang tumakas ng mga suspek at maging ang mga  nagpapa refill ay inaresto rin.

Mahigpit naman ang pagtanggi ng kinatawan ng kumpanya sa alegasyong illegal activity na una nang isinumbong ng mga lehitimong dealer ng LPG tanks.

Kinumpiska ng mga otoridad ang ilang equipment sa planta kasunod nang paghahain ng kaso laban sa mga suspek.

Asahan na ang normal inflation sa susunod na taon.

Ito ayon kay BSP Governor Felipe Medalla ay dahil sa patuloy na pagsirit ng presyo ng mga pangunahing bilihin sa taong ito.

Dahil dito, ipinabatid ni Medalla na binago nila ang inflation forecast sa 3.5% hanggang 4.5% sa 2023 at 2.3% hanggang 4.3% sa 2024.

Posible ring itaas sa susunod na taon ng Monetary Board ang policy rate ng BSP mula point 25 hanggang point 5.

Amerika, Japan at Australia.

Ito ang mga bansa, ayon sa survey ng Pulse Asia ang dapat pinagkakatiwalaan ng Pilipinas.

Nakasaad pa sa survey na isinagawa ng June 24 hanggang 27 sa 1, 200 respondents na China at Russia ang mga bansang hindi dapat pinagkakatiwalaan ng Pilipinas.

Ipinabatid ng Pulse Asia na 58% ng respondents ang naniniwalang dapat pagkatiwalaan ng Pilipinas ang Amerika o mabigyan ng “Fair amount of trust” at 31% naman ang nagsabing “Great deal of trust” ang dapat ibigay ng bansa sa Estados Unidos.

Batay sa survey, pumapalo sa 89% ang kabuuang trust rating ng US na matagal nang kaalyado ng Pilipinas.

63% ng respondents ang nagsabing dapat mabigyan ng “Fair amount of trust” ang Australia, 15% ang nagsabing “Great deal of trust” at 79% ang kabuuang trust rating nito.

Para naman sa Japan, 55% ang nagsabing dapat bigyan ito ng “Fair amount of trust” ng Pilipinas, 22% ang “Great deal of trust” at nasa 78% ang kabuuang trust rating nito.

Samantala, 31% ng respondents ang nagsabing “No trust at all” ang trato ng Pilipinas sa China at 36% ang nagsabing “Not too much trust” sa tinaguriang Asian Superpower.

26% ng respondents ang pabor sa “No trust at all” ng Pilipinas sa Russia at 36% naman ang nagsabing “Not too much trust” ng bansa ang Russia.