Judith Estrada-Larino

Tuluy-tuloy ang paglubog ng lupa sa isang sitio sa Sadanga, Mountain Province mahigit isang linggo matapos ang magnitude 7 na lindol sa Luzon.

Ipinabatid ng Sadanga Social Welfare and Development Office na isang metro kada araw ang ibinababa ng lupa sa Sitio Tatabra-An sa Barangay Sacasacan simula pa nitong nakalipas na August 4.

Dahil dito, limang bahay na ang inirekomenda ng nasabing tanggapan na kailangang abandonahin, anim na nanganganib gumuho, at apat na kamalig ang hindi magamit dulot ng mga bitak sa kinatitirikang lote.

Lumubog din ang ilang bahagi ng Tekan Road na nagkabitak bitak na rin kaya hindi na madaanan.

Napinsala rin ang water system sa Barangay Poblacion dahil sa pagguho ng lupa.

Pagmamahal at pagtitiwala sa gawa at salita.

Ito ang binigyang-diin ni D. Edgard Cabangon, chairman ng CityState Savings Bank matapos pangunahan ang pagdiriwang ng ika-25 anibersaryo ng nasabing bangko na nakatutok sa pagpapaigting ng kampanya para makapag-impok ang mga pilipino.

Nagpasalamat din si Cabangon sa tulong ng mga empleyado para maipagpatuloy ang commitment at legacy ng amang si dating Ambassador Antonio Cabangon Chua para sa serbisyo publiko.

Pasasalamat din sa dating ambassador ang ipinaabot ni Jaime Valentin, Chief Operating Officer ng CS Bank para maisakatuparan ang mga vision, mission at core values ng bangko na kanila pang paiigtingin sa susunod na limang taon.

Target aniya nilang mapabilang ang citystate savings bank sa top 10 thrift banks sa buong bansa at top 5 private lending institutions sa susunod na sampung taon kasama ang pagtatayo ng mga sangay sa iba’t ibang rehiyon.

Sinabi naman ni Benjie Ramos, Presidente ng CS Bank na pursigido silang gawin ang marami pang mga bagay para palawigin pa ang kanilang operasyon bilang bahagi ng serbisyo publiko sa pamamagitan ng CityState Savings Bank.

Patuloy ang pagdagsa ng mga malalapit na kaibigan sa burol ng dating Pangulong Fidel Ramos sa Heritage Park, Taguig City.

Kagabi ay dinagsa ng mga kaibigan ng dating pangulo mula sa mga lalawigan at mga progresibong grupo ang burol nito.

Bitbit naman ng Historian na si Professor Xiao Chua ang libro at sumbrerong pirmado ng dating Pangulo sa kanyang pagdalaw sa burol nito.

Nagbigay ng tribute sa dating pangulo sina Doris Magsaysay, Major General Anthony Alcantara, dating PNP chief ngayo’y Zambales Governor Hermogenes Ebdane, pamangking si Alaminos City mayor Hernani Braganza at Close In Security na sina Techical Sergeant Jaime Ancheta at Master Sergeant William Tinte.

Ang dating Pangulo ay nakatakdang ihatid sa huling hantungan bukas sa Libingan ng mga Bayani.

Nananatiling bukas ang isang gate ng Magat Dam para tuluy-tuloy na makapaglabas ng tubig.

Ayon sa PAGASA, naitala sa 188.19 meters ang water level ng Magat Dam kaninang umaga.

Una nang nagpalabas ng tubig ang Magat Dam alas -2 kahapon dahil sa matinding pag ulan dulot ng Habagat at Low Pressure Area.

Pinaplantsa na ng DFA (Department of Foreign Affairs) ang pulong nina Pangulong Ferdinand Bongbong Marcos, Jr., at US President Joe Biden.

Ipinabatid ni Foreign Affairs secretary Enrique Manalo na ang nasabing pulong ay posibleng isabay sa pagdalo nina PBBM at Biden sa United Nations General Assembly sa New York.

Gayunman, sinabi ni Manalo na naka-depende pa rin sa schedule ng dalawang Pangulo kung matutuloy ang paghaharap ng mga ito.

Nakapagtala ng “very high” COVID-19 positivity rate ang Camarines Sur at 14 pang lalawigan sa bansa.

Hanggang nitong August 6, ipinabatid ng OCTA Research Group na nakapagtala ang Camarines Sur ng positivity rate na 48.7% mula sa 30.3% nuong July 30.

Kabilang din sa nakapagtala ng mahigit 20% positivity rates ayon sa OCTA Group ang Isabela – 47.6% mula sa halos 36% nuong July 30, Tarlac – 41.9%, Nueva Ecija – 38. 4%, Pampanga – 35%, Laguna  – 33.2%, Cagayan- 30 .5% at La Union – 29. 4%.

Sinabi ng OCTA Group na nasa very high positivity rates din ang Zambales, Albay, Quezon, Pangasinan, Benguet, Cavite at Rizal.

Gayunman, inihayag ng OCTA na bumaba ang COVID 19 positivity rate sa ibang lugar mula July 30-August 6.

Lumakas pa ang Southwest Monsoon o Habagat sa Luzon, bagama’t lumabas na ng PAR (Philippine Area of Responsibility) ang LPA na una nang namataan ng PAGASA.

Dahil dito, ipinabatid ng PAGASA na patuloy na makakaranas ng malakas na ulan ang Metro Manila at iba pang bahagi ng bansa ngayong araw na ito.

Kasabay nito, muling inalerto ng PAGASA ang publiko kaugnay sa dalawa hanggang tatlong bagyong posibleng pumasok sa bansa ngayong buwan.

Nagtaas na rin ng presyo ang ilang tindahan ng kakanin sa Lungsod ng Maynila.

Kasunod na rin ito nang pagsipa ng presyon ng mga pangunahing sangkap sa paggawa ng kakanin.

Nabatid na 50 pesos o nasa 450 pesos na ang presyo ng kada tray ng sapin sapin, cassava, rice cake, kutsinta at ube.

Ayon sa mga gumagawa ng kakanin, nasa 3,200 pesos na mula sa dating 1,900 pesos ang kada sako ng puting asukal kaya’t brown sugar na lamang ang ginagamit nila.

Bumaba na rin anila ang nakukuha nilang orders kada araw na nasa pitong tray na lamang mula sa dating 10 pataas.

Patuloy ang babala ng PAGASA hinggil sa makulimlim hanggang maulang panahon sa malaking bahagi ng Luzon.

Kasunod na rin ito nang namataang Low Pressure Area ng PAGASA sa katubigang bahagi ng Calauag, Quezon.

Kabilang sa mga lugar na makakaranas ng pag ulan ang Metro Manila, Central Luzon, CALABARZON, MIMAROPA, Bicol Region, Visayas, Zamboanga Peninsula, Pangasinan, Nueva Vizcaya, Quirino, Isabela at Mainland Cagayan.

Patuloy pa rin naman ang pag iral ng hanging Habagat na nakakaapekto sa Western section ng bansa.

Inilikas muna ang 125 pamilya mula sa Antique matapos bahain dulot ng malakas na ulang dala ng bagyong Ester.

Ang mga nasabing residente , ayon sa Antique Provincial Disaster Risk Reduction and Management Office ay  mula sa mga bayan ng Hamtic, San Jose at Sibalom kung saan nagkaruon ng pagguho ng lupa ang dalawang  barangay nito.

Kaagad namang nagpaabot ng tulong sa mga naapektuhang pamilya ang DSWD Region 6.