Judith Estrada-Larino

Makikipagpulong si Philippine National Police (PNP) Chief Rodolfo Azurin sa National Police Commission (NAPOLCOM) para plantsahin ang sistema ng appointment at promotion ng mga opisyal ng PNP.

Kasunod na rin ito nang nilagdaan resolusyon ni NAPOLCOM Chairman at Department of the Interior and Local Government  (DILG) Secretary Benjamin Abalos kung saan pinapaalalahanan ang PNP na isumite muna sa NAPOLCOM para sa kaukulang kumpirmasyon  ang promotion ng 3rd level officials, batay na rin sa direktiba ng komisyon.

Sinabi ni Azurin na mayruon nang naunang kasunduan ang PNP at NAPOLCOM nuong panahon ni yumaong dating NAPOLCOM Vice Chair Rogelio Casurao na uubrang mag-promote ang PNP ng mga opisyal nito kahit wala pang kumpirmasyon ang komisyon.

 Subalit handa naman anya silang makipag-usap sa NAPOLCOM para maayos ang sistema sa pagpo-promote ng PNP officers.

Makatatanggap ng dagdag-sahod ang migrant workers sa Taiwan epektibo nitong nakalipas na August 10.

Ayon sa DOLE, kabilang sa mga makakakuha ng dagdag-suweldo ay mga bagong dating at mga pumirma ng bagong kontrata pagkatapos ng August 10.

Ipinabatid ng POLO o Philippine Overseas Labor Office na P6,000 ang dagdag-suweldo ng migrant workers tulad ng mga Pilipino mula sa dating 31,000 pesos.

Binuksan na sa mga motorista ang Cavitex C5 link Flyover extension simula alas-6 ng umaga kahapon.

Ang nasabing Flyover extension ay magpapabilis ng biyahe mula sa Taguig City patungong Parañaque City at pabalik.

Ang mga sasakyang magmumula sa Parañaque City ay maaaring gumamit ng Cavitex C5 link Flyover extension sa Mercivlle sa harap ng Shell C5 Southlink sa barangay Moonwalk

Nuong isang buwan ay binuksan na sa mga motorista ang bahagi ng nasabing flyover extension na nag-uugnay sa Merville Village at E. Rodriguez Avenue na kapwa nasa Parañaque City.

Mas mabilis at magaang dalhin ang digital id.

Ayon ito kay DICT Secretary Ivan John Uy kayat isinusulong nila ang pag i-isyu ng digital version ng national id habang patuloy pa ang printing ng cards.

Sinabi ni Uy na uubra namang ma verify sa app o data base ang digital version ng national id.

Una nang inihayag ng Philippine Statistics Authority na mahigit limampung milyong pilipino na ang nakakuha ng Philsys cards kasama na ang nasa 14.3 million cards na naipamahagi ng ahensya nuong Hunyo.

Balik kalsada na ang nasa mahigit 55,000 jeep.

Ipinabatid ito ni Piston President Mody Floranda matapos buksan muli ang mga una nang ipinasarang ruta bilang paghahanda sa pagbubukas ng klase sa August 22.

Ayon kay Floranda, malaking factor din sa paglarga muli ng mga jeepney ang pagbaba ng presyo ng krudo na sana aniya ay magtuluy tuloy pa.

Kasabay nito, sinabi ni Floranda na inaayos pa ng maraming operators ang pagbabalik operasyon na nangangailangan ng 40 hanggang 50 thousand pesos matapos ang dalawang taong pagkakatengga.

Welcome sa Department of Education ang imbestigasyon ng Kamara kaugnay sa umano’y overpriced laptop na binili para sa mga public school teacher.

Naniniwala ang DepEd na kailangang malinawan kaagad ang usapin sa ngalan na rin ng transparency at accountability kahit pa sangkot lamang sa usapin ang audit observation memorandum.

Sa kanilang 2021 annual audit report, tinawagan ng pansin ng COA ang DepEd sa mga mamahaling laptop na binili nito sa halagang P2.4B sa pamamagitan nang paghati sa bilang ng mga dapat na teacher beneficiaris sa buong bansa.

Patay ang isang mag ama sa sunog na Orani, Bataan.

Ang mag ama, ayon sa mga otoridad ay na trap sa sunog na tumagal ng halos isang oras bago naapula.

Tinulungan na ng mga residente, gamit ang mga timba at hose ang mga bumbero sa pagpatay sa nasabing sunog.

Iniimbestigahan na ng mga otoridad ang dahilan ng naturang sunog na tumupok din sa 15 kabahayan.

Nananatili ang Alert Level 1 sa Israel.

Ayon ito sa DFA matapos magdeklara ng tigil putukan ang gobyerno nito at mga militanteng palestino.

Umaasa ang DFA na magtutuluy tuloy na ang ceasefire para na rin sa katahimikan ng gaza strip at ng lahat.

Ang ceasefire kung saan nagsilbing mediator ang  Egypt ay idineklara nuong Linggo ng Israel at Palestinian Jihad Militant Group matapos ang ilang araw na air strikes at rocket attacks.

-ulat mula kay Raoul Esperas (Patrol 45), at sa panulat ni Judith Estrada- Larino

Napuno ng mga awit ang huling gabi ng burol ng dating Pangulong Fidel Ramos.

Kabilang sa naging bahagi ng tribute kay FVR sa pamamagitan nang pag awit ng mga paborito nitong kantang Maalala Mo Kaya at Minamahal Kita ng Spanish Filipina Operatic Soprano na si Andion Fernandez.

Kinilala rin ni dating SSS Chairman Renato Valencia ang galing ng dating pangulo sa pagpapatakbo ng ekonomiya.

Samantalang nagbigay pugay rin kay FVR ang mga negosyanteng sina Jaime Augusto at Fernando Zobel De Ayala.

Ang dating pangulo ay hinatid na sa kanyang huling hantungan sa Libingan ng mga Bayani matapos ang ibigay ditong military honors.

Idineklarang persona non grata sa Aklan si Congressman Lray Villafuerte kasama ang tatlo pang kongresista.

Kaugnay ito sa isinusulong ng mga kongresista na House Bill 1085 o Proposing the Creation of Boracay Island Development Authority as a Government Owned and Controlled Corporation.

Bukod kay Congressman Lray Villafuerte, inaprubahan ng Aklan Sangguniang Panlalawigan (SP) ang resolusyong ideklara ring persona non grata sina Tsuyoshi Anthony Horibata ng First District ng Camarines Sur, Miguel Luis Villafuerte ng 5th District ng CamSur at Nicolas Enciso, III ng Bicol Saro Partylist Group.

Binigyang diin ng SP Aklan na walang pinagkaiba ang House Bill 1085 sa House Bill 09286 na inihain noong 18th Congress subalit hindi umusad.

Ang hakbang anito ng mga nasabing kongresista ay kawalan ng respeto sa mga Aklanons.

Una nang inalmahan ng mga opisyal ng lalawigan at mga residente ang pagbuo ng Bida Bill kung saan mapupunta sa national government ang pagpapatakbo sa isla ng Boracay.