Judith Estrada-Larino

Inaasahang hihina ang Bagyong Gener sa susunod na 12 oras hanggang 24 oras matapos makapasok sa bansa kaninang alas-4 ng madaling araw.

Ayon sa PAGASA, ang sentro ng Bagyong Gener ay pinakahuling namataan sa layong 870 kilometro silangan, hilagang-silangan ng Basco, Batanes.

Taglay ng Bagyong Gener ang pinakamalakas na hanging umaabot sa 45 kilometro bawat oras malapit sa gitna at ma pagbugso na umaabot sa 55 kilometro kada oras.

Ang nasabing bagyo ay kumikilos sa bilis na 20 kilometro kada oras sa direksyong pa kanluran, timog-kanluran.

Sinabi ng PAGASA na mananatiling malayo sa Philippine landmass ang nasabing bagyo na hindi rin inaasahang magkakaroon ng direktang epekto sa bansa.

Wala na umanong balak ang Pangulong Rodrigo Duterte na dagdagan pa ang pressure kay PhilHealth President at CEO Ricardo Morales.

Kasunod na rin ito nang paggisa kay Morales sa mga umano’y bagong anomalya sa PhilHealth.

Ayon kay Presidential Spokesman Harry Roque, masyadong mabait ang pangulo lalo na’t may sakit si Morales kaya’t ayaw na ring dagdagan pa ng pangulo ang pressure sa pinuno ng PhilHealth.

Binigyang diin ni Roque na patuloy pa ring pinagkakatiwalaan ng pangulo si Morales dahil ebidensya ang hanap nito sa kontrobersya sa ahensya.

Handa ang ilang Overseas Filipino Workers (OFWs) sa Russia na sumalang sa clinical trial ng anti-coronavirus disease 2019 (COVID-19) vaccine ng nasabing bansa.

Bukod sa excitement, inihayag ni Nico Castor, lider ng Filipino association sa Russia, ang panalangin nilang maging epektibo ang Sputnik 5.

Marami aniyang mga Pilipino sa Russia ang tiwalang magiging mabisa ang Sputnik 5 kaya’t bukas din ang mga itong maging bahagi ng clinical trial sa nasabing bakuna kontra COVID-19.

Kinumpirma ng Malakaniyang ang paggamit sa 50% o kalahati ng mga pampublikong paaralan sa National Capital Region (NCR) bilang pansamantalang quarantine facility.

Sinabi ni Presidential Spokesman Harry Roque na nagkasundo ang DOH at Department of Education (DepEd) na gamitin muna ang ilang public schools na isolation centers.

Ayon kay Roque nananatili ang utos ng Pangulong Rodrigo Duterte na sa January 2021 pa ang pagbabalik ng face to face classes o kung mayroon nang bakuna kontra COVID-19.

Magpapasaklolo sa Anti-Money Laundering Council (AMLC) ang Senado para tugisin ang may-ari ng dialysis center na nakatanggap ng P45 milyon sa PhilHealth sa pamamagitan ng interim reimbursement mechanism (IRM).

Ayon kay Senador Panfilo Lacson ang B. Braun Avitum Philippines, Incorporated sa Benguet ang siya ring pangalan ng healthcare institution sa bank transaction nang magkamali ang PhilHealth sa pagdeposito ng P9.7 million sa Balanga Rural Bank noong 2009.

Subalit sinabi ni Lacson na ang dialysis center na sinasabing paborito o inuuna ng PhilHealth sa listahan na bigyan ng IRM funds ay hindi nakarehistro sa Securities and Exchange Commission (SEC).

Dapat aniyang makuha nila sa AMLC ang mga detalye ng nasabing bank account kahit pa sa isang executive session para matukoy kung sino ang nagbukas nito.

Magugunitang sa pagdinig ng Senado noong Martes inihayag ni dating PhilHealth Legal Counsel at whistleblower Atty. Thorrsson Montes Keith na si PhilHealth Senior Vice President Rodolfo Del Rosario ang may-ari ng B. Braun na itinanggi naman nito. — ulat mula kay Cely Ortega-Bueno (Patrol 19)

Sumirit na sa halos 144,000 ang kumpirmadong kaso ng coronavirus disease 2019 (COVID-19) sa bansa.

Ito ay matapos maitala ang 4,444 na bagong kaso ng COVID-19.

Ayon sa Department of Health (DOH), nasa 72,348 ang aktibong kaso mula sa kabuuang 143,749.

Sa datos mula sa 91 lisensyang laboratoryo 636 ang mga bagong gumaling sa COVID-19 kaya’t pumapalo na sa halos 69,000 ang total recoveries sa bansa.

Nasa 2,404 ang death toll matapos maitala ang 93 mga bagong nasawi sa nasabing virus.

JUST IN: Kaso ng COVID-19 sa bansa, nadagdagan pa ng 4,444 ngayong Miyerkules, Agosto 12.

Dahil dito, pumalo na sa 143,749 ang kabuuang bilang ng kumpirmadong kaso ng COVID-19 sa bansa | https://t.co/HHOy7zaafm pic.twitter.com/vz5otFLBZa

— DWIZ Newscenter (@dwiz882) August 12, 2020

Pumapalo na sa mahigit 23 million ang mga nag-enroll sa public at private schools para sa pasukan ngayong taon.

Ipinabatid ito ni Education Undersecretary Nepomuceno Malaluan sa pagdinig ng Senate Committee on Basic Education, Arts and Culture.

Sinabi ni Malaluan na inaasahan pa nilang dadami pa ang mag-e-enroll ngayong pasukan.

Nasa 380,000 naman aniya ng mga estudyante mula sa private schools ang lumipat sa public schools dahil nawalan ng trabaho ang kanilang mga magulang.

Ayon kay Malaluan, 33% ng mga paaralan ay nakapag-print na ng 50% ng self learning modules na pang unang quarter.

Sa pagtaya ng DepEd nasa 4 na milyon ang posibleng out of school youth ngayong school year. — ulat mula kay Cely Ortega-Bueno (Patrol 19)

Pinasasalo ni Transportation Secretary Arthur Tugade sa railway authorities ang mga empleyado ng LRT 1 na maaapektuhan ng lay off na ipatutupad ng Light Rail Manila Corporation (LRMC).

Sinabi ni Tugade na hindi dapat mawalan ng trabaho ngayong may pandemya ang mga mare-retrench na kuwalipikadong empleyado na pinapakuha niya sa PNR, LRTA at MRT 3.

Una nang inihayag ng LRMC na 100 empleyado nila ang maaapektuhan ng lay off matapos mabawasan ng 90% ang kanilang ridership dahil sa COVID-19 pandemic.