Lumakas ang piso kontra sa dolyar sa unang pagkakataon matapos ang apat na taon.
Kasunod ito nang pagpalo sa 48.92 ng halaga ng piso kontra sa dolyar sa ikalawang araw ng trading week.
November 10, 2016 nang magsara sa 48. 66 ang halaga ng piso kontra sa dolyar.
Ang malakas na piso ay nangangahulugang makakabili na ang Pilipinas ng imports sa mas magandang rates.
Tinututukan ng mga otoridad ang lahat ng anggulo para malaman ang motibo sa pagpaslang sa dalawang lalaki kabilang si NDFP Consultant Randall Randy Echanis sa Novaliches, Quezon City noong Lunes.
Ayon kay PNP Spokesman Brigadier General Bernard Banac hindi pa nila isinasantabi ang personal na motibo o pagnanakaw sa nasabing krimen.
Posible aniyang mabura na ang anggulong robbery dahil wala namang nawalang gamit ng mga biktima.
Una nang inihayag ng Anak Pawis Party List Group na si Echanis kasama ang isang kapitbahay nito ay pinatay ng mga otoridad sa isang paupahan sa Novaliches.
Nanawagan si Bishop Luis Antonio Cardinal Tagle sa frontliners na bigyang halaga ang pagpapahinga.
Sa isinagawa niyang recollection for Filipino frontliners, binigyang diin ni Tagle na hindi dapat santuhin ng frontliners ang kanilang trabaho dahil mahalagang makapagpahinga rin ang mga ito.
Habang nagpapahinga aniya ay dapat ding pagnilayan ng frontliners ang ginagawa nila na malaking sakripisyo para sa sambayanan.
Hindi dapat tumaas ng P50 ang kada isa ng face shield.
Ayon ito kay Health Undersecretary Maria Rosario Vergeire, base na rin sa kanilang rekomendasyon na suggested retail price (SRP) ng bawat isang face shield, na isinumite kay Health Secretary Francisco Duque III bago ipadala sa Department of Trade and Industry (DTI).
Sinabi ni Vergeire na walang dapat ikabahala ang publiko dahil tinitiyak nilang hindi tataas ang presyo ng face shield base na rin sa materials na ipinaabot sa kanila.
Ang kanila anyang rekomendasyon sa SRP ng face shield ay ibinase nila sa isang maliit na survey matapos makipag-ugnayan sa mga expert hinggil sa gagamiting materyales sa paggawa ng face shield.
Una nang hiniling ng DTI sa Department of Health (DOH) na magkasa ng SRP sa face shield matapos itong sumirit sa mahigit P50 kada isa.
Inaasahang darating sa ika-17 ng Agosto ang unang batch ng mga Overseas Filipino Workers (OFWs) mula sa Lebanon.
Ayon sa Department of Foreign Affairs (DFA), 400 Pinoy ang sakay ng unang chartered flight mula sa Lebanon.
Kasabay ding iuuwi ang labi ng apat na Pinoy na nasawi sa pagsabog sa Beirut.
Tiniyak ni Migrant Workers Affairs Undersecretary Sarah Lou Arriola ang mga susunod pang chartered flights sa Lebanon para ma-accommodate ang iba pang nais umuwi sa bansa.
Isinailalim na simula ngayong araw na ito sa complete lockdown ang Rizal Memorial Complex sa Maynila at PhilSports Complex sa Pasig City.
Ayon sa Philippine Sports Commission (PSC), nagpositibo ang isang staff nila sa coronavirus disease 2019 (COVID-19) kaya’t kailangan nilang magsagawa ng disinfection sa dalawang sports complex.
Mag-aabiso na lamang ang PSC kung kailan na uubrang buksan ang Rizal Memorial Complex gayundin ang PhilSports Complex.
Halos P74-bilyon na ang naipapamahaging ayuda sa ikalawang bahagi ng social amelioration program (SAP).
Ayon sa Department of Social Welfare and Development (DSWD), mahigit 13-milyong pamilya ang nakinabang na sa nasabing tulong pinansyal ng gobyerno sa gitna na rin nang nararanasang coronavirus disease 2019 (COVID-19) pandemic.
Sinabi ng DSWD na bumilis ang pamamahagi ng SAP fund matapos gamitin ang digital payment para iwas-hawa na rin sa COVID-19.
Ang Russia na ang kauna-unahang bansang nakapagparehistro ng bakuna kontra coronavirus disease 2019 (COVID-19) at idineklara na ang kahandaang magamit ito.
Ito ay bagamat lumutang ang mga agam-agam ng maraming scientists sa mabilis na paggamit sa naturang bakuna bago ang phase 3 trials na kadalasang tumatagal ng tatlong buwan at tini-test sa libo-libong katao na anila’y posibleng mag-back fire sa lahat.
Binigyang diin ni Russian President Vladimir Putin na dumaan sa mga kinakailangang test at napatunayang epektibo ng nasabing bakuna na may hatid na matagal na immunity mula sa COVID-19.
Ipinabatid pa ni Putin na isa sa kaniyang mga anak na babae ay tinurukan na ng nasabing bakuna at maayos na ang pakiramdam nito.
Sinabi ni Putin na ang kaniyang anak na may lagnat na 38 degrees celsius ay unang tinurukan ng nasabing bakuna na nagpababa sa 37 degrees celsius na lamang na lagnat nito kinabukasan.
Matapos ang ikalawang pagturok ng bakuna inihayag ni Putin na bahagyang tumaas ang temperatura ng kaniyang anak subalit unti-unti nang bumuti ang pakiramdam nito at nagkaroon na ng mataas na antibodies.
Tiniyak ng Russian authorities na kabilang sa priority na maturukan ng nasabing anti COVID-19 vaccine ang medical workers, guro at iba pang itinuturing na risk groups.
Nilinaw ni Putin na hindi sapilitan ang pagpapaturok ng naturang bakuna na ang bulto-bultong produksyon ay sisimulan sa susunod na buwan samantalang sa Oktubre naman inaasahang gugulong ang mass vaccination.
Posibleng pumalo pa sa mahigit 7,000 ang mga kaso ng coronavirus disease 2019 (COVID-19) sa bansa sa mga susunod na araw.
Babala ito ng Philippine College of Physicians (PCP) matapos pumalo sa halos 7,000 ang itinuturing na all-time high record ng mga bagong kaso ng naturang virus kahapon.
Ayon kay Dr. Mario Panaligan, pangulo ng PCP, malaking epekto sa kabuuang kaso ng COVID-19 ang backlogs at incubation period ng nasabing virus.
Mahirap aniyang sabihing nangangalahati na ang kaso dahil hindi pa naman nakikita ang totoong epekto nang pagsailalim muli ng Metro Manila at iba pang karatig lalawigan sa modified enhanced community quarantine (MECQ).
Sinabi ni Panaligan na tatagal pa ng ilang linggo bago tuluyang makita talaga ang epekto ng MECQ at kahit aniya sabihing hindi na iiral ang community quarantine, kung pabaya naman ang lahat, hindi malayong bumalik ang dami ng mga nagkakasakit.
Binigyang diin ni Panaligan ang kahalagahan ng masusing koordinasyon sa lahat ng mga ahensya ng gobyerno bagamat mayroong mga direktiba ang Department of Health ang hindi kaagad naipapatupad ng local government units.
Kasado na sa August 17 ang clinical trial ng bansa sa Japanese anti influenza drug na avigan bilang investigational medicine kontra coronavirus disease 2019 (COVID-19).
Ayon ito kay Department of Health (DOH) Undersecretary Maria Rosario Vergeire bagamat mayruon pang isinapinal na ilang legal documents.
Sinabi pa ni Vergeire na isandaang COVID-19 patients ang sasailalim sa trial na isang uri ng open label multi centered randomized comparative study.
Sa ilalim nito ay makakatanggap ng existing supportive case ang unang50 pasyente samantalang ang 50 iba pa ay bibigyan ng parehong supportive care na may kasamang avigan.
Inihayag ni Vergeire na hindi maaaring basta na lamang sumali ang sinumang pasyente dahil mayruong mga requirements para mapabilang sa clinical trial.