Judith Estrada-Larino

Mahigit 3,000 ang nadagdag sa bilang ng kumpirmadong kaso ng coronavirus disease 2019 (COVID-19) sa Pilipinas.

Ayon sa Department of Health (DOH) pumapalo na sa 164,474 ang kabuuang kaso ng COVID-19 sa bansa matapos madagdag ang 3,314 na bagong kaso ng naturang virus.

Patuloy naman ang pagsirit ng recoveries sa COVID-19 na nasa 112,759 matapos madagdag ang 237 bagong gumaling sa COVID-19.

Rumehistro naman ang total deaths sa 2,681  nang maitala ang 18 bagong nasawi dahil sa naturang virus.

Pumapalo naman sa 49,034  ang aktibong kaso ng COVID-19 kung saan 91.1% ang mild cases,  6.5%  ang asymptomatic, 1% ang severe at 1.4%  ang critical condition.

JUST IN: Kaso ng COVID-19 sa bansa, nadagdagan pa ng 3,314 ngayong Lunes, Agosto 17.

Dahil dito, pumalo na sa 164,474 ang kabuuang bilang ng kumpirmadong kaso ng COVID-19 sa bansa | https://t.co/HHOy7zaafm pic.twitter.com/3xlNGhizmX

— DWIZ Newscenter (@dwiz882) August 17, 2020

Kasado na ang virtual meeting ngayong hapon ni Pangulong Rodrigo Duterte at Inter-Agency Task Force on Emerging Infectious Diseases (IATF-EID).

Ito ay matapos magpositibo muli sa COVID-19 si DILG Secretary Eduardo Año.

Sinabi ni Presidential Spokesman Harry Roque na kailangang mapangalagaan ang kalusugan ng Pangulo na sasalang naman din sa isang televised address mamayang gabi.

Ipinabatid ni Roque na nasa perpetual isolation ang Pangulong Duterte na maya’t maya ay isinasailalim naman sa RT PCR tests.

Ang Pangulong Duterte ay umuwi ng Davao City noong August 3 o bago ang ipinatutupad na modified enhanced community quarantine (MECQ) sa Metro Manila, Bulacan, Laguna, Cavite at Rizal.

Mahigpit na paiiralin ang “no mask, no face shield, no entry” policy sa lahat ng istasyon ng Light Rail Transit (LRT) at Manila Metro Rail Transit (MRT).

Ito, ayon sa pamunuan ng LRT at MRT, ay kasunod na rin ng kautusan ng Department of Transportation (DOTr) na pagsusuot ng face shield ng publiko sa lahat ng mga pampublikong sasakyan para na rin sa proteksyon at kaligtasan ng mga pasahero.

Sinabi ng LRT at MRT management na hindi papasukin sa loob ng istasyon at hindi pasasakayin ng tren ang mga pasaherong walang suot na face mask at face shield.

ABISO: MRT-3, nagpaalala sa “no mask and face shield, no entry” policy para sa mga pasahero ng tren. | via @dotrhttps://t.co/LXkD1z08nq

— DWIZ Newscenter (@dwiz882) August 17, 2020

Mahigpit pa ring ipinagbabawal ang pagsasalita o pakikipag-usap sa loob ng mga tren.

PASSENGER REMINDER: TALKING IS NOT ALLOWED ON THE TRAIN
Respiratory droplets ang isa sa mga karaniwang sanhi ng pagkalat ng COVID-19. Huwag makipag-usap sa katabing pasahero sa loob ng #LRT1. Ugaliin ang pagsusuot ng face mask at paggamit ng alcohol o sanitizer.#RideSafeOnLRT1 pic.twitter.com/4ldunIzqdD

— Light Rail Manila Corporation (@officialLRT1) July 9, 2020

Binalaan na ng Department of Trade and Industry (DTI) ang ilang kumpanya kaugnay sa pagbebenta ng overpriced face shields.

Ito, ayon kay DTI Secretary Ramon Lopez, ay kasunod na rin nang pag-iikot ng ilang tauhan nila na i-monitor ang bentahan ng face shields na obligado nang isuot kapag nasa pampublikong sasakyan at maging sa mga workplace.

Sinabi ni Lopez na ilang establishment ang nagbebenta ng lampas sa itinakdang suggested retail price (SRP) na P25 hanggang P50 kada isa.

Tiniyak ni Lopez ang patuloy na pagsasagawa ng inspeksyon sa mga pamilihan para mabatid kung sumusunod sa SRP ang mga ito sa pagbebenta ng face shields.

Multang P5,000 aniya hanggang P2-milyon ang kakaharapin ng mga establishment na susuway sa SRP ng face shield.