Judith Estrada-Larino

Nagkasa ng sariling reward si Mayor Johnielle Keith Nieto ng Cainta, Rizal para sa doktor na makapagpapagaling ng maraming coronavirus disease 2019 (COVID-19) patients sa kaniyang bayan.

Itinaya ni Nieto ang isang buwan niyang suweldo bilang pabuya sa doktor na maraming mapapagaling na pasyente ng COVID-19.

Nagtalaga na ang lokal na pamahalaan ng 33 doktor para alagaan ang mga pasyente at sa ilalim ng referral system, araw-araw na kukumustahin ng bawat doktor ang kanilang mga pasyente —naka-home quarantine man o nasa pasilidad.

Naka-post na sa social media account ni Nieto ang pangalan ng mga doktor at kung ilan ang kanilang pasyente sa mga barangay.

Una nang inanunsyo ni Nieto ang paggamit nila ng cash donations na pambili ng Chinese herbal medicine na kanilang ipinamamahagi sa mga pasyente para makatulong sa kanilang agarang paggaling.

Ipinaalala ni Joint Task Force COVID Shield Commander Police Lt. General Guillermo Eleazar sa mga magka-angkas sa motorsiklo na magdala ng patunay na sa iisang bahay sila nakatira para hindi na masita.

Ayon kay Eleazar, tatanggapin ng mga otoridad ang kahit anong patunay na sa iisang bahay umuuwi ang mga magka-angkas sa motorsiklo tulad ng identification (ID) at barangay certification.

Maaari pa rin naman aniyang gamitin ang barrier ng magka-angkas na nakatira sa iisang bahay dahil ang iniiwasan naman sa ganitong paraan ay mass infection sa pamilya.

Gayunman, sinabi ni Eleazar na nananatili ang motorcycle barrier para sa mga magka-angkas na hindi nakatira sa iisang bahay at dapat ay authorized persons outside residence (APOR) ang angkas kahit hindi APOR ang driver.

Patuloy tayong sumunod sa ating protocol na ating ipinatutupad para sa ating kapakanan,” ani Eleazar sa panayam ng Balitang Todong Lakas.

Binigyang diin ni Eleazar na ang nasabing hakbang ay patunay na nakikinig ang National Task Force on COVID-19 sa mga concern ng publiko.

Umabot na sa 24,000 ang bilang ng mga Pinoy na nakauwi na sa bansa mula sa Saudi Arabia.

Ito’y bahagi ng patuloy na pagpapauwi ng pamahalaan sa mga distressed Overseas Filipino Workers (OFWs) ngayong nakararanas ang buong mundo ng pandemya dahil sa coronavirus disease 2019 (COVID-19).

Maliban sa Department of Foreign Affairs (DFA) chartered flights na nag-uuwi sa mga OFW, katuwang din ang mga commercial flights ng Philippine Airlines at Saudi Airlines.

Kaugnay nito, nag-abiso ang Embahada ng Pilipinas sa Riyadh na ang mga Pinoy na mayroon nang exit visas at walang kakayahang bumili ng tickets ay maaaring mag-request ng repatriation assistance sa embahada.

Naglabas na ng bagong school calendar ang Department of Education (DepEd) para sa school year 2020-2021

Ayon sa DepEd, October 5 magsisimula ang klase at magtatapos sa June 16, 2021 samantalang itinakda naman ang Christmas break sa December 20 hanggang January 3, 2021.

Muling binigyang diin ni Education Secretary Leonor Briones na walang face-to- face learning ngayong pasukan para na rin sa kaligtasan ng mga mag-aaral.

Pinapayagan naman ng DepEd ang mga pribadong paaralan na magsimula na ng kanilang klase kahit pa bago mag October 5 basta’t distance o online learning at hindi face to face classes.

Sinabi ni Briones na maaari pa ring ipa-enroll ng mga magilang ang kanilang mga anak sa mga paaralan na payag pang tumanggap ng late enrolees.

Sa ngayon ay nasa 23. 3 million na ang mga estudyanteng nakapagpatala para mag aral sa sistemang blended learning.