Judith Estrada-Larino

Kinondena ng iba’t ibang LGBT (lesbian, gay, bisexual, and transgender) groups ang pagpapalaya ng korte kay US. Marine Lance Corporal Joseph Scott Pemberton na pumatay kay transgender woman Jennifer Laude noong 2014.

Ayon sa kanilang post sa Facebook, ipinaabot ng Lagablab LGBT Network ang kanilang galit sa nasabing desisyon ng korte dahil hindi sapat ang pagkakakulong nito para mabayaran ang ginawa kay Laude.

Sinabi naman ng LGBT group na Bahaghari na ang nasabing hakbang ng korte ay hindi lamang patunay nang patuloy na pakikibaka ng LGBT community sa Pilipinas kun’di ang paninindigan ng bansa na mas panigan ang Amerika kaysa Pilipino.

Magugunitang ipinag-utos ng  Olongapo City Court ang pagpapalaya kay Pemberton dahil sa good conduct time allowance (GCTA) rule.

Nangangailangan ng 20 bagong staff ang Department of Health (DOH).

Sinabi ng DOH na kabilang sa mga kailangang punan ay mga posisyong supervising administrative officer, financial analyst 2, information system analyst 2, information technology officer 1 at  chief administrative officer.

Bukod pa ito sa dalawang medical officer 5, administrative assistant 3, health program officer 2, senior health program officer, dentist 3 at dentist 4.

Maaaring ipadala ang application sa dohpersonnerl.recruitment@gmail.com o personal na isumite sa DOH sa San Lazaro Compound sa Rizal Avenue sa Maynila.

Itinakda sa ika-12 ng Setyembre ang deadline sa pagsusumite ng application.

Nagpapagaling pa rin sa kaniyang bahay si Department of the Interior and Local Government (DILG) Secretary Eduardo Año matapos makalabas ng ospital dahil sa coronavirus disease 2019 (COVID-19).

Sinabi ni Año na hinihintay pa niya ang resulta ng kaniyang swab test para malaman kung negatibo na siya sa naturang virus.

Maganda naman aniya ang kaniyang kalagayan maliban na lamang sa pag-ubo-ubo nya.

Una nang dinapuan ng COVID-19 si Año noong ika-31 ng Marso at gumaling ng ika-13 ng Abril, subalit dinapuan muli ng virus noong isang buwan habang nasa opisina niya sa Camp Crame.

Halos 50 opisyal ng barangay ang sinampahan ng reklamo sa Ombudsman.

Ayon kay DILG Undersecretary for Barangay Affairs Martin Diño ang mga nasabing barangay official ay hindi lamang sangkot sa iregularidad sa social amelioration program (SAP) kundi mga lumabag din sa quarantine protocols.

Walang naman binanggit si Diño kung sinu-sino ang mga aniya’y pasaway na opisyal ng barangay

Ang mga opisyal ng barangay aniya ang dapat manguna sa pagsunod sa mga quarantine measures para sumunod din ang mga residente.