Binalaan ng Department of Trade and Industry (DTI) ang mga negosyanteng magsasamantala sa kampanyang buy local.
Kasunod ito ng nakaabot na sumbong sa DTI na pinapalitan umano ng ilang negosyante ang label ng imported products para palabasing gawa ito sa bansa.
Kabilang sa mga produktong ito ay bigas, manok, semento at ilan pang gamit pang construction.
Tiniyak ng DTI ang pagpapanagot sa mga tiwaling negosyante sa ilalim ng Republic Act 7394 o Consumer Act of the Philippines.
Nagpapasaklolo sa gobyerno ang recruitment agency ng mga Pinoy na sakay ng nawawalang Gulf Livestock 1 para humingi ng ayuda sa ibang bansa na mahanap ang 36 na nawawalang Pinoy seafarers.
Ipinabatid ni Elias Delos Reyes, Pangulo ng manning agency ng mga nasabing Pinoy Seamen na hiniling nilang makatulong ang Chinese at Korean government sa pagsasagawa ng search and rescue operations lalo na ang freighter ay nawala sa paligid ng international waters hindi naman talaga sa nasasakupan ng Japan.
Hindi pa rin aniya maituloy ng Japanese authorities ang search and rescue nito dahil sa bagyong Haishen.
Sinabi ni Delos Reyes na nakikipag-ugnayan na sila sa Philippine Overseas Labor Office (POLO) sa Japan para mag-follow up sa resumption ng search and rescue operations.
Umaasa sila aniyang matatagpuan pa ang mga nasabing Pinoy dahil lumalabas sa kuwento ng isang survivor na nasa ibabaw ng barko ang maraming kasamahan nila kasama ang kapitan nila.
Mula sa 39 na Pinoy crew na una nang napaulat na nawawala dalawa na ang nailigtas na kinilala ng DOLE na sina Jay-Nel Rosales at Sareno Edvarodo samantalang isa pang crew na sinasabing Pinoy ay natagpuan namang patay.
Tumataas ang kaso ng COVID-19 sa Western Visayas.
Ayon kay Health Expert Dr. Anthony Leachon karamihan sa mga dinadapuan ng virus sa Western Visayas ay mga authorized persons outside of residence (APOR), locally stranded individuals (LSI’s) at returning overseas Filipino’s.
Sinabi ni Leachon na ito ang dahilan kaya’t hindi pa dapat makampante kahit pa idineklara na ng UP OCTA research team na na-flatten na ang curve ng COVID-19 lalo na sa Metro Manila at CALABARZON Region.
Binigyang diin ni Leachon na mas mabuting magdeklara ng MECQ sa buong Western Visayas sa loob ng dalawang linggo hanggang isang buwan.
Subalit sa Metro Manila inihayag ni Leachon na dapat ituloy na lamang ang mindset ng voluntary ECQ para magpatuloy ang pagbaba ng infection rate.
Dismayado ang mga pasahero ng LRT line 1 kaninang umaga nang makitang sarado ang Roosevelt Station.
Una nang inanunsyo ng Light Rail Manila Corporation (LRMC) ang pansamantalang pagsasara ng LRT 1 Roosevelt Station mula September 5 hanggang December 28 para sa konstruksyon ng common station upang maserbisyohan ang LRT 1, MRT 3, MRT 7 at Metro Manila Subway.
Ayon sa mga pasahero abala ang pagsasara ng Roosevelt Station dahil kailangan pa nilang mag-bus mula rito para makarating ng Balintawak Station.
Samantala sa LRT 1 Balintawak Station alas 5:00 pa lamang ng madaling araw ay mahaba na ang pila ng mga pasahero na kadalasang sumasakay ng tren sa Roosevelt Station patungo ng Balintawak.
Mas humahaba pa ang pila dahil sa ipinatutupad na physical distancing.
Pinag-iingat ng gobyerno ang mga Pilipinong nasa Birmingham, England matapos ang insidente ng pananaksak doon na ikinasawi ng isa katao.
Magugunitang isang suspek ang bigla na lamang umatake sa mga tao at pinagsasaksak ang mga ito.
Sa abiso naman ng embahada ng bansa sa London walang Pinoy na nadamay sa nasabing insidente.
Gayunman pinapayuhan ang mga Pinoy na maging maingat at iwasang magtungo sa lugar na pinangyarihan ng pananaksak hangga’t hindi pa normal ang sitwasyon.
Tiniyak din ng embahada ang mahigpit na monitoring sa mga Pilipino sa lugar.
Sinisimulan na ng DENR na patambakan nang dinurog na dolomite rocks mula sa Cebu ang bahagi ng baywalk sa Manila Bay.
Ito ayon kay DENR Undersecretary Benny Antiporda ay bahagi ng planong gawing mala Boracay ang Manila Bay.
Umalma naman dito si Greenpeace Philippine Campaigner Sonny Batungbacal dahil hindi malilinis ng pagtatapon ng synthetic white sand sa Manila Bay ang maduming kapaligiran nito.
Dinagsa naman ng mga negatibong komento ang nasabing hakbangin ng DENR kung saan ilang netizen ang nagsabing pagsasayang lang ng pera ang nais mangyari ng ahensya at sa halip ay dapat linising mabuti at ayusin ang mga tubo na lalabasan ng tubig patungong Manila Bay.
Welcome sa Palasyo ang panukalang bigyan ng emergency power ang Pangulong Rodrigo Duterte para maresolba ang korapsyon sa PhilHealth.
Ayon kay Presidential Spokesman Harry Roque nagpapasalamat ang Palasyo sa suporta ng lehislatura sa pagpupursige ng Pangulo na maisaayos ang bansa.
Isa rin naman aniyang abogado ang Pangulo kaya’t batid nito ang saklaw ng kaniyang kapangyarihan.
Subalit sinabi ni Roque na bilang may akda ng Universal Health Law nais niyang buwagin sana ang PhilHealth at palitan ng national health service para matanggal na ang lahat ng mga tauhan ng ahensya.
Nagtakda ang Department of Education (DepEd) ng bilang ng oras na dapat gugulin ng mga estudyante sa paggamit ng gadget ngayong ipinatutupad ang online learning sa gitna ng COVID-19 pandemic.
Batay sa department memorandum ipinabatid ni Education Undersecretary Alain Pascua na isang oras lamang ang dapat magugol ng mga mag-aaral sa kinder para magamit ang kanilang device.
Sinabi ni Pascua na ang mga mag-aaral namang nasa grades 1 hanggang 5 ay pinapayagang gumamit ng gadget ng isa at kalahating oras samantalang hanggang dalawang oras ang para sa grades 6 hanggang 8.
Ang mga nasa grades 9 hanggang 12 ay uubra namang makagamit ng kanilang gadget hanggang dalawang oras sa umaga at dalawang oras din sa hapon.
Ang screentime guidelines ay ibinase sa American Academy of Pediatrics at World Health Organization (WHO).
Una nang inihayag ng child development specialists na hindi advisable sa mga bata na gumugol ng mahabang oras sa paggamit ng kanilang gadget dahil makakasama ito sa kanilang mata at hindi makakaintindi ng kanilang mga leksyon.
Dumistansya ang Malakaniyang sa panukalang ideklara ang September 11 kada taon bilang special non-working holiday sa Ilocos Norte bilang paggunita sa kapanganakan ng dating Pangulong Ferdinand Marcos.
Subalit sinabi ni Presidential Spokesman Harry Roque na iginagalang ng Pangulong Rodrigo Duterte ang desisyon ng mga kongresista.
Ayon kay Roque bago naman maging batas ang nasabing panukala dapat muna itong makapasa sa Kamara at Senado.
Aprubado na sa third and final reading ang panukala ni Ilocos Norte Representative Angelo Marcos Barba na pamangkin ng dating Pangulong Marcos na dapat mabigyang pugay ang kaniyang tiyuhin dahil matalino ang mga plano at maganda ang mga nagawa sa bansa.
Ikinagalak ng Palasyo ang pagbaba ng bilang ng mga Pilipinong walang trabaho sa bansa.
Ito ayon kay Presidential Spokesman Harry Roque ay dahil mas marami na ang nakapagtrabaho nang muling buksan ang ekonomiya ng bansa.
Subalit nakiusap ang Palasyo sa mga manggagawa na patuloy lamang sumunod sa mga itinakdang health protocol para makatiyak na makakaiwas sa COVID-19.
Batay sa ulat ng Philippine Statistics Authority (PSA) mula 17.7% o 7.3 million na walang trabaho noong Abril nasa 10% o 4.6 million na lamang ang walang trabaho noong Hulyo kahit na nagpapatuloy ang pandemya sa COVID-19.
Nabatid na ang National Capital Region (NCR) bilang sentro ng ekonomiya ang nakapagtala ng pinakamataas na bilang ng mga nawalan ng trabaho.