Judith Estrada-Larino

Inatasan ng DOTr ang Philippine Coastguard na palawigin ang deployment ng K9 units sa lahat ng railway facilities at stations sa Metro Manila.

Kasunod ito ng kambal na pagsabog sa Jolo, Sulu kung saan 15 ang nasawi.

Ipinabatid ng coastguard na apat napung K9 units ang itatalaga sa mga istasyon at pasilidad ng LRT-1, LRT-2, MRT-3 at PNR para sa mas istriktong security measures.

Kabilang sa K9 units ang K9 handlers, working dogs, veterinarians at explosive ordnance disposal specialists at suportado rin ng operations officers at quick response teams.

Sinabi ni Transportation Secretary Arthur Tugade na mahalagang ma protektahan ang mga pasahero laban sa banta ng terorismo.

Tiniyak naman ni Coastguard Commandant Admiral George Ursabia, Jr. Ang kahandaan nila sa pagbibigay ng suporta upang pagtibayan ang seguridad sa rail networks.

Magmumula sa 10 barangay sa bansa na nakapagtala ng pinakamataas na kaso ng coronavirus disease 2019 (COVID-19)  ang mga tatanggap ng bakuna sa ilalim ng Solidarity Trial World Health Organization (WHO).

Ipinabatid ito ni DOST Secretary Fortunato Dela Peña batay na rin sa inaprubahang resolusyon ng IATF.

Ayon kay Dela Peña 1,000 katao kada barangay na mayruong pinakamataas na kaso ng COVID-19 ang kuwalipikadong sumalang sa Solidarity Trials.

Sinabi ni Dela Peña  na ang independent clinical trials ng mga pribadong kumpanya ay itatalaga sa trial zones para sa pantay at makatuwirang pamamahagi ng bakuna para maiwasan ang kumpetisyon sa recruitment ng mga isasalang sa trial.

Sinegundahan ng Malakanyang ang pahayag ni House Speaker Alan Peter Cayetano na hindi dapat pagkaabalahan ng MTRCB ang pag-regulate sa Netflix.

Dahil dito pinayuhan ng Palasyo ang MTRCB na ikunsider ang nasabing pahayag ni Cayetano.

Ayon kay Presidential Spokesman Harry Roque panahon ng budget hearing kaya’t mahirap balewalain ang pahayag ng Kongreso lalo nat ito ang nag-a apruba sa pondo ng isang ahensya at tungkulin nitong matiyak na nagagastos ng tama ang pondo ng taumbayan.

Gayunman nilinaw ni Roque na iginagalang ng Palasyo ang nasabing plano ng MTRCB.

Inamin ni Energy Secretary Alfonso Cusi na dadaan pa sa maraming pag-aaral ang paggamit ng nuclear power plant bilang isa sa posibleng pagkunan ng supply ng kuryente.

Sa isinagawang budget deliberations ng Kamara sinabi ni Cusi na patuloy na tinututukan ng Inter Agency Committee na binuo ng Pangulong Rodrigo Duterte ang pag-aaral sa Nuclear Power Program.

Isa lamang aniya ang nasabing programa na kinukunsider sa paghahanap ng mapagkukunan ng enerhiya para matiyak ang energy security sa bansa.

Hindi naman kumbinsido si Bayan Muna Party-list Representative Eufemia Cullamat na makakabuti para sa consumers ang paggamit ng nuclear power plant.

Bukod sa peligrong dulot nito inihayag ni Cullamat na magpapalala lamang ang nuclear power program sa dependency ng Pilipinas sa importation ng energy source.

Katulad ng coal at gas aangkatin din mula sa ibang bansa ang uranium na gagamitin para sa pagpapatakbo ng nuclear power plant.

Naka-self isolate na si Presidential Spokesman Harry Roque.

Ito ay matapos magpositibo sa COVID-19 ang isa sa security detail ni Roque.

Sinabi ni Roque na wala naman siyang nararamdamang sintomas subalit kailangan pa rin aniya niyang sumunod sa protocol.

Kahit naka-self isolate tiniyak ni Roque na tuloy ang kaniyang trabaho.

Patuloy ang pag-akyat ng kumpirmadong kaso ng coronavirus disease 2019 (COVID-19) sa bansa.

Ipinabatid ng Department of Health (DOH) na pumapalo na sa 238,727 ang kaso ng COVID-19 matapos madagdag ang 1,383 na bagong infections at itinuturing na pinakamababang kaso simula noong Hulyo.

Kabilang sa nakapagtala ng pinakamataas na bagong kaso ng COVID-19 metro Manila – 525, Laguna – 137, Batangas – 99, Negros Occidental – 77 at Cavite – 69.

Naitala naman sa 184,906 ang total recoveries na nadagdagan ng 230 na mga bagong gumaling sa COVID-19.

15 ang nadagdag sa death toll na nasa 3,890 na.

Rumehistro naman sa 49,931 ang active cases kung saan 88.3% ang mild, 8.3% ang asymptomatic, 1.4% ang severe at 2% ang critical condition.

Inaasahang lalagdaan na ng Pangulong Rodrigo Duterte sa mga susunod na araw ang panukalang Bayanihan To Recover As One Act kung saan nakapaloob ang P165 billion COVID-19 relief package.

Ayon kay Presidential Spokesman Harry Roque kinukonsulta na ng Palasyo ang mga ahensya ng gobyerno hinggil sa laman ng panukalang Bayanihan 2 na una nang iniendorso ng Pangulo sa kongreso.

Matapos ratipikahan ng Senado at Kamara noong isang buwan nakasaad sa panukala ang pagbibigay ng P50-B sa government financial institutions tulad ng Landbank of the Philippines, Development Bank of the Philippines, Philippine Guarantee Corporation at Small Business Corporation para sa kaukulang loan sa mga sektor na apektado ng COVID-19 pandemic.

Bibigyan din batay sa panukala ng lima hanggang 8,000 ang mga pamilyang mababa ang kita sa mga lugar na naka-lockdown, OFW’s at maging displaced workers.

Naglaan din ng P13.5-B para sa health related responses 4-B para sa tourism industry at 3-B bilang cask for work programs at ayuda sa displaced workers.

Pinare-recompute ni Olongapo City RTC Judge Roline Ginez-Jabalde sa Bureau of Corrections (BuCor) ang Good Conduct Time Allowance (GCTA) ni US Marine Lance Corporal Joseph Scott Pemberton.

Kasunod na rin ito nang isinagawang motion for reconsideration ng kapatid nang pinaslang na transgender na si Jennifer Laude.

Hihintayin pa naman ng husgado ang ihahaing motion for reconsideration ng DOJ bago magpasya hinggil dito.

Batay sa 7 pahinang motion for reconsideration ng private complainant sinabi nitong hindi dapat palayain si Pemberton dahil walang patunay sa good conduct nito habang nakapiit at walang katibayan na lumahok ito sa anomang rehabilitation activities na certified ng time allowance supervisor bukod pa sa wala ring katibayan ng kinakailangang recommendation mula sa management screening and evaluation committee

Iginiit din ng kampo ni Laude na self serving ang computation na isinumite sa korte gayundin ang ibinigay ng Bureau of Corrections dahil sa purong computation lamang at walang material basis.

Ayon naman sa kampo ni Pemberton walang merito ang mosyon ng kapatid ni Laude.

Sa isinumiteng opposition naman ni Atty. Rowena Garcia Flores, abogado ni Pemberton nakasaad na hindi sumunod sa kinakailangang requirements sa ilalim ng rules of court ang kampo ni Laude at hindi naipaliwanag sa mosyon kung bakit mali ang computation ng BuCor sa good conduct ng US serviceman.

Binabantayan din ng mga tauhan ng BuCor si Pemberton at ang mga ito ang maaaring magpatunay ng good conduct ng sundalong Amerikano habang nakakulong.

Nakatulong ng malaki ang dalawang linggong pagsailalim muli sa Metro Manila sa MECQ para bumaba ang infection rate ng COVID-19.

Binigyang diin ito sa DWIZ ni Prof. Guido David ng UP OCTA Research Team dahil may koneksyon ang paG-flatten ng COVID-19 curve sa pagpapairal ng MECQ.

Sinabi ni David na mula 1.5 noong Agosto ay bumaba sa 0.94 ngayong Setyembre ang reproduction number ng COVID-19 cases sa NCR.

Nilinaw ni David na kapag na-flatten na ang curve hindi ito nangangahulugang wala nang kaso ng virus.

Sa pagtaya ng UP research team sa katapusan ng Setyembre ay posibleng nasa 310 o 330,000 na ang COVID-19 cases sa bansa.

Hindi ibig sabihin na kumokonti ngayon, na nagpa-flatten na wala tayong problema, ibig sabihin lang n’yan nagsisimula palang yung proseso matagal pa ‘yan bago kumonti yung bilang na manageable, so mga 2 months, 3 months in-anticipate natin yung ginagawa natin pero ang magandang balita dyan nasa tamang direksyon na tayo, hindi na tayo pataas ng kaso,” ani David. — panayam mula sa Balitang Todong Lakas.