Judith Estrada-Larino

Pinaiimbestigahan ng Makabayan bloc sa Kamara ang kontrobersyal na white sand project ng DENR.

Isinulong ng Makabayan bloc ang House Resolution 1194 na naglalayong masilip ng Kamara ang suitability at sustainability ng manila bay rehabilitation program partikular na sa pagbubuhos ng crushed dolomite boulders sa baybayin.

Nakasaad din sa resolusyon ang pagtutol ng pambansang lakas ng Kilusang Mamamalakaya ng Pilipinas, Kalikasan Peoples Network for the Environment, Oceana at Greenpeace sa proyekto dahil sa sinasabing impact nito sa kalusugan at kapaligiran gayundin ang hindi nararapat na paggamit sa pondo.

Maging ang ilang miyembro ng Academe ay nagpahayag na maaaring maghain ng writ of kalikasan sa Korte Suprema ang mga kritiko para mapatigil ang proyekto.

Una nang idinipensa ni DENR Secretary Roy Cimatu sa pagdinig ng panukalang 2021 budget ng ahensya sa kamara na hindi delikado sa kapaligiran at kalusugan ng publiko ang dolomite sand sa Manila Bay.

Uubra nang ibigay sa ibang broadcast companies ang mga frequency ng ABS-CBN matapos mabasura ang franchise renewal ng Kapamilya Network.

Ayon kina House Legislative Franchises Committee Vice Chairmen Jonathan Sy-Alvarado at Mike Defensor pwede nang i-alok ang Kapamilya frequencies sa ibang franchise applicants dahil hindi irereserba ng Kongreso ang nasabing frequencies hangga’t makakuha muli ng prangkisa ang media giant.

Sinabi ni Defensor na technically ay naibalik na sa estado ang frequencies ng ABS-CBN.

Ipinabatid naman ni Alvarado na nakatanggap ng impormasyon ang komite na ilang broadcast companies na ang nagpaabot ng interes sa ABS-CBN frequencies.

Kakayanin pa ng gobyerno na magbigay ng pinansyal na ayuda sa mga naapektuhan ng coronavirus disease 2019 (COVID-19) hanggang 2021.

Tiniyak ito ni Presidential Spokesman Harry Roque matapos lumabas ang pag aaral ng World Health Organization na wala pang malawakang immunization sa 2021 kahit na may magawa nang bakuna ang Amerika.

Sinabi ni Roque na naging konserbatibo ang Department of Finance sa paggastos ng pera ng bayan kayat mayruon pang madudukot na pondo sakaling tumagal pa ang pandemya.

Kasado na ang bawas-singil ng Meralco ngayong buwan.

Ayon sa Meralco mababawasan ng P6. 23 centavos kada kilowatt hour o  nasa P8.4288 kada kilowatt hour ang singil sa kuryente ngayong buwan mula sa P8.4911 per kilowatt hour nuong isang buwan.

Nangangahulugan ito na P12.00 ang makakaltas sa bayarin sa kuryente ng mga kumukunsumo ng 200 kilowatt hour ngayong buwan.

Sinabi ng Meralco na bumaba ang singil sa kuryente dahil sa nabawasang demand sa kasagsagan ng community quarantine period.

Ang singil sa kuryente ngayong buwan ay maituturing na pinakamababa sa nakalipas na tatlong taon o simula nuong September 2017.

Posibleng sa second quarter pa ng 2021 magkaroon ng bakuna kontra coronavirus disease 2019 (COVID-19) sa bansa.

Ipinabatid ito ni Dr. Jaime Montoya, executive director ng Philippine Council for Health and Research Development, base na rin sa pagtaya ng experts at may approval ng Food and Drug Administration.

Sinabi pa ni Montoya na kapag naging available na ang anti-COVID-19 vaccine, 20% ng total demand nito ang makukuha ng bansa sa pamamagitan ng COVAX.

Ang COVAX na pinangingunahan ng Coalition for Epidemic Preparedness Innovations, Gavi at World Health Organization ay global initiative ng mga bansa at manufacturers sa buong mundo para tiyaking magkakaroon ng pantay na access sa COVID-19 vaccine ang lahat ng bansa.

Aabot ng P500 hanggang P1,000 ang kada turok ng bakuna na dalawang dose ang ibibigay sa isang indibidwal sa pagitan ng 20 hangggang 28 araw.

Kasabay nito, muling pinayuhan ni Montoya ang publiko na sumunod sa health and safety protocol.