Judith Estrada-Larino

Walang otoridad ang Pangulong Rodrigo Duterte para pigilan ang Commission on Audit (COA) na gawin ang trabaho nitong protektahan ang public funds at isapubliko ang paggastos nito.

Binigyang diin ito ni Congressman Edcel Lagman matapos batikusin ng Pangulong Duterte ang COA sa pagbubunyag nito sa deficiencies ng DOH sa halos P68-B COVID-19 fund nito.

Ayon kay Lagman, ang COA ay Independent Constitutional Agency na hindi accountable sa pangulo ng bansa.

Ang obligasyon aniya ng COA ay ilantad ang mga katiwalian o maling paggamit public funds ng mga ahensya ng gobyerno.

Anim sa pitong nasawi sa COVID-19 sa Asian Hospital and Medical Center sa Muntinlupa nitong nakalipas na buwan ay hindi bakunado.

Ipinabatid ito ni Dr. Jose Acuin, Medical Chief ng Asian Hospital na nagsabi ring ang isa sa mga nasawi ay nagka-COVID wala pang dalawang linggo matapos itong makatanggap ng ikalawang dose.

Patunay ito aniya ng malaking epekto nang pagbabakuna sa mortality rate o mga nasasawi dahil sa COVID-19.

Ayon pa kay Acuin, mahigit 84% ng COVID-19 patients ng ospital ay hindi pa nakakabunahan.

Naabot na aniya nila ang bed capacity para sa COVID- 19 cases kaya’t nag-aalok na lamang ng telemedicine para sa mga pasyenteng pinayagang mag-isolate sa kanilang mga bahay.

Nagkakaroon na ng epekto sa bilang ng COVID-19 cases ang pinaiiral na ECQ sa Metro Manila.

Ito ayon kay Dr. Ted Herbosa, Special Adviser sa National Task Force against COVID-19 ay dahil nasa halos 900 na lamang ang average na bagong kaso ng COVID-19 mula sa NCR bagamat tatlong araw na halos nasa mahigit 14k ang mga bagong kaso ng nasabing virus sa buong bansa.

Yung sa NCR , mas konti na parang 100 lang , the day before so parang it’s lower, iyong dami ng kaso ngayon sa iba’t ibang parte ng Pilipinas. Kasi iba ang surge ng ating outbreak ngayon. Iyong cases maraming lugar na nagko-contribute, so ang lockdown natin sa NCR diba, diba nag-ECQ tayo sa NCR. So iyon, kapag doon mo brineak down, bumaba siya. So may kaunting epekto ang ECQ na ginawa natin at sana magtuloy-tuloy na ang pagbaba ng numero ng kaso,” pahayag ni Herbosa.

Kasabay nito, kumbinsido si Herbosa na malaking factor sa pagsirit ng kaso ng COVID-19 ang delta variant ng coronavirus.

Gayunman, ipinabatid sa DWIZ ni Herbosa na hindi pa maituturing na pre dominant ang delta variant dahil mas marami pa rin ang kaso ng Alpha at Beta variants.

Talagang Delta na ang nagko-contribute, diyan sa number of cases, hindi natin madetermine as you said, nasi-sequence naman natin maliit na porsyento lang… so prino-project lang natin yung ganon nasa 800 ba 900  na yung delta o nasa 2000. Ang bilis humabol ng delta, kasi a week before halos wala iyan, sa samples parang more than 40% nung sample parang delta ang contribution.

Tuloy- tuloy ang puspusang pagkilos ng gobyerno para maiuwi sa bansa ang nasa mahigit 100 Pilipino na nasa Afghanistan pa.

Tiniyak ito ni Presidential Spokesman Harry Roque matapos maibalik sa bansa ang 32 Pinoy at target pang mapauwi ang labing siyam na iba pa.

Kasunod na rin ito nang tuluyang pagsakop ng taliban militants sa capital city ng Kabul matapos i-pull out ni US President Joe Biden ang US troops sa Afghanistan.

Pinayuhan ni Roque ang mga Pilipino na kaagad makipag-ugnayan sa embahada ng gobyerno sa nasabing bansa para sa agarang repatriation ng mga ito.

Ipinabatid ng DFA na kasado na ang flight ng 30 mula sa 130 Pinoys sa Afghanistan patungong Doha, Qatar.

Nakaalerto na ang COMELEC kaugnay sa posibleng contactless bilihan ng boto ngayong new normal.

Ayon kay COMELEC Commissioner Rowena Guanzon naghahanda na sila sa posibleng vote buying sa pamamagitan ng online money transfer systems kaya’t nakikipag-ugnayan na rin sila sa BSP hinggil dito.

Tiniyak ni guanzon na tuluy tuloy ang kanilang trabaho para sa 2022 national elections maging ang pag a aral sa mga iligal na aktibidad sa panahaon ng halalan.

Sa ngayon aniya kinukunsulta na nila ang UP School of Economics at iba pang experts para matutukan ang mga pagbabagong kaakibat ng kasalukuyang  sitwasyon at kung paano mapapanagot sa batas ang mga lumalabag sa election laws.

Binalaan ng DILG ang local officials kaugnay sa pagpapatupad ng no ayuda policy sa mga lumabag  sa quarantine.

Kasunod na rin ito nang nadiskubreng pagpapairal ng nasabing patakaran ni Mayor Arman Dimaguila ng Biñan City sa Laguna.

Ayon kay DILG Spokesman at Undersecretary Jonathan Malaya, labag sa batas ang pagharang ng sinuman ng ayuda na dapat munang ibigay bago magpataw ng parusa ang Local Chief Executives sa mga quarantine violators.

Ang ayuda ay nasa P1,000 ang halaga subalit umaabot naman sa P5,000 ang multa sa mga pasaway sa quarantine.

Dismayado si Health Secretary Francisco Duque, III sa tila agarang pagbasura ng kongreso sa paliwanag ng ahensya hinggil sa nabiting risk allowance at benepisyo ng medical workers.

Ayon kay Duque, sana ay maipaliwanag na sa kongreso sa imbestigasyon nito ang hinggil sa mga naturang benepisyo ng medical workers sa gitna na rin ng patuloy na paglaban sa COVID-19 partikular sa pinangangambahang Delta variant ng Coronavirus.

Binigyang diin ni Duque na dokumentado ang lahat ng mga kinukuwestyong allowances ng medical workers at ang pondo para rito ay hindi naman nakatengga lamang sa DOH.

Muling ipinabatid ni Duque na ang trabaho ng DOH Regional Offices na i-download ang mga pondo sa mga ospital kaya’t ang mga pinuno nito ang siyang magbabayad sa kanilang medical frontliners.

Aapela ang local government ng Marinduque sa IATF para maitaas ang kanilang quarantine classification kasunod nang pagsirit ng kaso ng COVID-19 sa lalawigan.

Ayon kay Marinduque Governor Presbitero Velasco, dapat na mag GCQ na sila mula sa MGCQ dahil nasa alert level 3 na ang kanilang probinsya matapos tumaas ang kaso ng infection na posibleng itinulak ng Delta variant ng Coronavirus.

Ipinabatid ni Velasco na hanggang nitong Agosto 12 ay nakapagtala sila ng 1,155 cases samantalang nitong Mayo ay nasa 390 cases lamang na patunay ng doble o tripleng pagtaas ng kaso ng virus kaya’t nahihirapan silang i-manage ito na tila na overwhlem ang pasilidad nila.

Nakahanda na aniya silang ilabas ang kautusan kaugnay sa GCQ status na ipatutupad sa loob ng dalawang linggo.