Judith Estrada-Larino

Tila mababalewala ang unti-unti nang pagbawi ng ekonomiya ng bansa.

Ito ayon kay Edgardo Lacson, Acting President ng Philippine Chamber of Commerce and Industry (PCCI) ay kapag inabot pa o mapalawig pa ng tatlong linggo ang umiiral na ECQ sa Metro Manila.

Sinabi ni Lacson na tiwala siyang “over reaction” lamang sa tumataas na kaso ng Delta variant ng Coronavirus ang lumutang na five week lockdown.

Ang nasabing pahayag ni Lacson ay sinegundahan naman ng Financial Executives Institute of the Philippines.

Tinawag na fake news ni DTI Secretary Ramon Lopez ang napaulat na palalawigin pa ng tatlong linggo ang umiiral na ECQ sa Metro Manila.

Ayon kay Lopez, hindi pa napag uusapan ng IATF ang posibleng anumang extension ng ECQ sa NRC.

Tanging hanggang Agosto 20 lamang aniya ang napagkasunduan nilang pagpapatupad ng pinakamahigpit na quarantine classification sa Metro Manila kasunod nang pagsirit ng kaso ng COVID-19.

Niyanig ng magnitude 5.3 na lindol ang Tarragona, Davao Oriental pasado alas-9 kaninang umaga.

Anim na oras ito o kaninang alas-3 ng madaling araw matapos yanigin ng magnitude 5.2 na lindol ang bayan din ng Tarragona.

Ang nasabing lindol ay mayroong lalim na 21 kilometers at ang epicenter ay natukoy sa 135 kilometers silangan ng Tarragona.

Ayon sa Phivolcs, ang tectonic earthquake ay itinuturing na aftershock ng magnitude 7.1 na naramdaman noong Agosto 12 sa governor Generoso sa Davao Oriental.

Sugatan ang apat katao matapos araruhin ng isang dump truck ang ilang sasakyan at isang tindahan sa barangay San Jose, Antipolo City kaninang umaga.

Kuwento ng barangay tanod na rumesponde sa aksidente, nawalan ng preno ang truck sa overlooking at tuloy-tuloy na ito pababa sa pa-zigzag na daan at sumalpok sa isang tricycle at iba pang sasakyan bago dumiretso sa sari-sari store.

Mabilis namang nakuha ang mga sugatan sa sasakyan at ligtas ang driver at pahinante ng truck.

Kabilang sa mga nasugatan at nasa kritikal na kondisyon ang tricycle driver na kaagad isinugod sa ospital.

Ayon pa sa ilang saksi, yuping-yupi ang bubong at pader ng sari-sari store dahil sa lakas ng impact ng pagbangga ng truck na mayroong sakay na gypsum na ginagamit sa paggawa ng semento.

Nananawagan na ng dagdag na doktor at nurses ang ospital ng Biñan sa Laguna.

Ito’y ayon kay Dr .Melbril Alonte, medical director ng ospital ay para tulungan ang mga COVID-19 patients dahil pagod na pagod na ang mga doktor at nurses nila bagama’t hindi naman sila aniya susuko sa kanilang sinumpaang tungkulin.

Sinabi ni Alonte na puno ang buong ospital kung saan 50 kama ang inilaan sa COVID-19 patients, subalit umaabot na sila sa isandaan hanggang dalawandaang pasyente ng COVID 19.

Ipinabatid ni Alonte na mabilis na lumala ang kondisyon ng mga pasyente ngayon kumpara sa mga naunang kaso ng COVID-19 kung saan ilang araw lamang ay gumaganda na ang sitwasyong pang kalusugan ng pasyente.

Kasabay nito, inihayag ni Alonte na tuloy pa rin naman sila sa pagtanggap sa non-COVID-19 patients.

Nadagdagan pa ang mga lugar sa Muntinlupa City na isinailalim sa hard lockdown o extreme localized community quarantine dahil sa COVID-19.

Ipinabatid ni Tez Navarro ng Muntinlupa Public Information Office na dalawa pang lugar ang inilagay nila sa hard lockdown, kaya’t limang lugar na sa lungsod ang itinuturing na areas of concern habang umiiral ang ECQ sa Metro Manila.

Kahapon nagsimula ang dalawang linggong hard lockdown o hanggang Agosto 27 sa purok 3, Molera Compound sa barangay Sucat at purok 7, Beatriz compound, De Mesa L & B street sa barangay Alabang.

Sinabi ni City Health Office chief Dr. Juancho Bunyi na mayroong clustering of cases at mataas na COVID-19 attack rate ang mga lugar na naka-hard lockdown sa Muntinlupa na bibigyan ng food packs at kung saan din magsasagawa ng mass testing at magbabahay-bahay para mabakunahan ang mga residente.

Una nang inilagay sa hard lockdown ang block 8, Hills View at Mangga St., Lakeview homes sa barangay Putatan noong Agosto 12 at Agosto 10 ang Chico St., Laguerta sa barangay Tunasan.

Balik-bansa na ang mahigit tatlong daang OFW na stranded sa UAE.

Ayon sa DFA, ang 359 OFWs ay bahagi ng ika-10 repatriation flight mula sa UAE na isinulong ng gobyerno simula noong buwan ng Hulyo.

Tiniyak ng konsulado ng bansa sa UAE ang patuloy na pagpapauwi ng mga OFW doon sa kabila ng pagbabawal ng gobyerno na mga biyahero mula sa UAE na makapasok sa bansa para makaiwas sa delta variant ng COVID-19.

Gayunman, hinimok ni Consul General Paul Raymund Cortes, pinuno ng Philippine Mission sa Dubai at mga kalapit na Northern Emirates, ang mga OFW na huwag munang maghain ng repatriation request hangga’t hindi urgent ang kanilang sitwasyon.

Nagbukas ng tig-dalawang gate ang Ambuklao at Binga Dam sa Benguet.

Ayon sa PAGASA, ang water level sa Ambuklao dam, alas-sais ng umaga ay nasa 751.52 meters o malapit na sa 752-meter Normal High Water Level (NHWL).

Samantala, ang water level ng reservoir ng Binga dam ay nasa 574.22 meters at halos malapit na sa 575 meter NHWL.