Judith Estrada-Larino

Handa ang Pilipinas na tumanggap ng refugees mula sa Afghanistan matapos na kontrolin ng Taliban ang nasabing bansa.

Ayon ito kay Presidential Spokesman Harry Roque dahil matagal nang mayroong jurisprudence o legal system ang bansa bago pa man mabuo ang convention hinggil sa pag welcome ng mga refugees bilang asylum seekers.

Sinabi pa ni Roque na batay din sa pahayag ng Korte Suprema, hindi magdadalawang isip ang Pilipinas na tanggapin ang mga indibidwal na lumalayas sa kanilang mga bansa dahil sa takot na ma-harass.

Nasa alert level 4 na ang sitwasyon sa Afghanistan nangangahulugang mandatory na ang evacuation.

Una nang nanawagan ang gobyerno sa 170 pinoys sa Afghanistan na mag-avail sa repatration para na rin sa kanilang kaligtasan.

Umalma ang Philippine Hospitals Association (PHA) sa anito’y arbitrary denial ng PhilHealth.

Kaugnay ito sa bilyun bilyong pisong halaga ng benefits claims na isa sa mga dahilan nang pag aray na ng mga ospital sa bansa.

Ipinabatid ni PHA President Dr Jaime Almora sa pagdinig ng House Committee on Health na mahigit 86 billion pesos ang claims ng mga ospital sa PhilHealth mula Enero 2020 hanggang Hunyo 2021.

Sa nasabing halaga P26-B pa lamang ang pinoproseso habang P46.6-B na ang naibalik sa mga ospital at halos P14-B naman ang denied.

Binigyang diin ni Almora na ang arbitrary denial ng PhilHealth sa pagbabayad ng claims ay malaking kawalan para sa mga ospital at morally wrong bukod pa sa labag ito sa batas dahil nagamit pa sana ito ng mga ospital  sa pagpapaayos ng kanilang mga pasilidad.

Ganito rin ayon kay Dr Gerry Gonzales, Board Member ng  sa Private Hospitals Association of the Philippines Incorporated (PHAPI) ang problema nila at tinitingnan nila aniya kung kakayanin pa nilang magpa sahod ng health workers.

Inamin ng PhilHealth na nagkulang sila kaya’t nabinbin ang pag-iisyu ng memorandum circular na may kaugnayan sa pag asikaso sa COVID-19 claims ng mga ospital.

Ang pag amin ay ginawa ni PhilHealth acting executive vice president at Chief Operating Officer Eli Dino Santos ..sa pagdinig ng house committee on health kaugnay sa resolusyon na nagpapa imbestiga sa kalituhan na idinulot ng issuance ng state health insurer ng circular hinggil sa pag-avail ng COVID-19 related benefit package.

Sinabi ni Santos kay Committee Chair Angelina Helen Tan na maraming dahilan at pangyayari na dapat ikunsider sa delays partikular na sa memorandum circular para sa pagbabayad ng probable cases bilang intermediate package.

Lumabas sa pagdinig na Nobyembre 2020 pa inilabas ng PhilHealth board ang kanilang resolution subalit Hunyo 2021 lang nang mailabas naman ang memorandum circular para rito.

Kinuwestyon din ni Tan ang pagiging retroactive ng bisa ng memorandum circular sa halip na proactive ang PhilHealth sa kanilang mga hakbang dahil umaaray na ang mga apektadong ospital.

Hindi aniya katanggap tanggap na inabot ng pitong buwan ang PhilHealth na mailabas ang circular lalo pat batid nito kung gaano katagal ang pag apela ng mga ospital at pahirap din ito sa mga pasyente sa kasagsagan ng pandemya.

Binanggit din ni Santos ang hinggil sa fraudulent claims.

Tiniyak ng Department of Energy (DOE) sa publiko na walang magaganap na rotational brownout sa 2022 National Elections.

Ayon kay Energy Undersecretary at Spokesperson Felix William Fuentebella batay sa advisory ng National Grid Corporation of the Philippines (NGCP) ang power reserves at hindi power supply ang inaasahang ninipis sa summer period sa susunod na taon.

Mas mataas aniya ang demand ng kuryente sa panahong yan partikular sa Mayo 19 hanggang 23 dahil sa kakulangan ng tubig sa hydro plants.

Sinabi ni Fuentebella na kahit manipis ang power reserves, mataas pa rin ito sa yellow line na nangangahulugan ng sapat na supply, walang yellow alert at walang interruption.

Tiwala ang manufacturer ng anti viral drug na Molnupiravir na makakakuha ng approval bilang posibleng gamot sa COVID-19 at mailabas na ito sa publiko sa taong ito.

Ayon kay Dr. Mary Ann Galang-Escalona ..Country Medical Lead ng Merck Sharp&Dohme (MSD) sa Pilipinas ang timeline ay naka depende sa findings ng clinical trial at interim analysis ng global team.

Ang Molnupiravir ay dinivelop ng msd sa Amerika at Canada at Ridgeback Biotherapeutics LP at target na makakuha muna ito ng emergency use authorization sa Amerika bago ikalat sa iba pang bansa.

Sinabi ni Escalona na nasa ikatlong yugto na ng clinical trials ang Molnupiravir sa Lung Center of the Philippines kung saan mayroong 15%.

Inihayag ni Lung Center Emergency Room at COVID 19 Triage Task Force Chief Dr. Randy Castillo na “promising” o may positibo ang resulta base sa paunang resulta ng clinical trials.

Magsisimula na rin ang clinical trial ng Molnupiravir sa Quirino Medical Memorial Center kung saan sampung pasyente ang kakailanganin.

Pumapalo na sa 12.56-M pinoys ang fully vaccinated na laban sa COVID-19.

Sa gitna na rin ito nang pagpapabilis ng vaccine roll-out para mapigil na kumalat partikular ang Delta variant ng Coronavirus.

Ayon sa National Task Force Against COVID 19, hanggang nitong Agosto 15 ay nasa 27,806,881 doses na ang nabigay kabilang na ang first at second dose o maging ang single dose vaccine.

Nasa 15,241,864 ang nakatanggap na ng first dose.

Ipinabatid ng task force na pumapalo sa 475,304 ang doses na naibigan araw araw sa nakalipas na pitong araw.

Tiwala naman ang Malakanyang na 50% ng populasyon ng Metro Manila ang nabakunahan na hanggang Agosto 20, huling araw nang pagpapatupad ng ECQ sa NCR.

Target ng gobyerno na mabakunahan ang hanggang sa 70-M pinoys bago matapos ang taong ito.

Dismayado ang isang grupo ng nurses sa Pangulong Rodrigo Duterte sa pag depensa nito kay Health Secretary Francisco Duque, III at sa DOH kaugnay sa deficiencies sa paggamit ng mahigit P67-B na COVID 19 funds.

Ayon kay Maristela Abenojar, pangulo ng Filipino Nurses United (FNU), maraming health workers ang hindi pa nakakatanggap ng kanilang mga benepisyo tulad ng special risk allowance, active hazard duty pay and meal, accommodation at transportation allowances gayung may mga pondo para sa COVID-19 response ang hindi maayos nagamit.

Paulit ulit na lamang ang nangyayari subalit walang positibong tugon ang gobyerno partikular ang DOH sa kanilang request na ibigay na ang mga benepisyong para sa mga health workers na mayroon ding mga pamilyang binubuhay.

Kasabay nito, kinumpirma ni Abenojar ang pakikiisa nila sa bantang mass protest ng ilang grupo ng health workers para igiit na mapasakamay ang kanilang mga benepisyo.

Umakyat na sa 450 hanggang 480 calls kada araw ang average na natatanggap ng One Hospital Command Center (OHCC).

Ipinabatid ito ni Treatment Czar Health Undersecretary Leopoldo Vega, sa gitna na rin nang pagsirit ng kaso ng COVID-19.

Tinawag na de javu ni Vega ang nangyayari ngayon sa naranasan ng bansa sa huling bugso nitong mga buwan ng Marso at Abril.

Ayon kay Vega, napansin nila ang pag-akyat ng bilang ng mga tawag sa OHCC partikular nitong nakalipas na Agosto 13 kung saan nasa 513 calls ang natanggap nila at maayos naman nilang napangasiwaan.

Gayunman, sa nakalipas na pagtaas ng kaso ng COVID-19 sinabi ni Vega na mayroon nang higit na kapasidad ang referral system para sa healthcare services na tumanggap ng mas marami o anumang dagsa ng mga tawag mula sa mga kaanak ng COVID-19 patients na kailangang magpa-admit sa mga ospital.

Papalo sa halos P6-B ang nakubrang extortion money ng CPP NPA sa unang tatlong taon pa lamang ng administrasyong Duterte.

Bahagi ito ng report ni National Intelligence Coordinating Agency (NICA) Director General Alex Paul Monteagudo sa NTF ELCAC kung saan pinakamalaking nakolektang extortion money ng mga komunista o nasa P3-B ay mula sa mining companies.

Mahigit P800-M naman aniya ang nakuha ng mga rebelde sa mga may ari ng palaisdaan, mahigit P700-M mula sa construction companies, mahigit P300-M ang mula sa transportation companies at mahigit P13-M mula sa telco habang P150-M ang nagmula sa iba’t ibang kumpanya.

Sinabi pa ni Monteagudo na mahigit P76-M ang naibigay ng mga pulitiko sa mga komunista bilang extortion money noong 2019 Elections habang P121-M naman ang nakumlimbat ng mga komunista sa mga mayayamang personalidad.

Ayon kay Monteagudo, dahil kabilang na sa listahan ng mga terorista ang CPP NPA maaari nang i-freeze at kasuhan ng Anti Money Laundering Council ang sinumang pulitiko at mga indibidwal na magbibigay ng extortion money sa mga rebelde.