Judith Estrada-Larino

Tanging ang Bangsamoro Autonomous Region in Muslim Mindanao (BARMM) lamang sa buong bansa ang wala pang naitatalang kaso ng Delta variant ng Coronavirus.

Ayon ito kay Dr. Alethea de Guzman, Director ng DOH Epidemiology Bureau ay bagamat hindi nangangahulugang hindi pa nakaabot sa BARMM ang mabagsik na strain ng COVID-19 lalo pat kakaunti pa lamang ang sample na nakukuha nila sa nasabing rehiyon.

Kasabay nito, nilinaw ni de Guzman na mahirap magdeklara ng community transmission ng Delta variant sa buong bansa dahil magkakaiba ang profile ng kada rehiyon na nakakapagtala ng kaso nito kayat pinag aaralan pa nila ito.

Tulad na lamang aniya sa Delta cases sa NCR at Calabarzon na hindi magkakaugnay dahil nanggaling ang mga ito sa ibat ibang lugar.

Isang Duterte lamang ang tatakbo sa 2022 national elections.

Ito ayon kay Presidential Spokesman Harry Roque ang nais bigyang diin ng Pangulong Rodrigo Duterte matapos niyang kumpirmahin ang tuluyang pagsabak sa Vice Presidential Elections sa 2022.

Sinabi ni Roque na ang pagdeklara ng Pangulo na tatakbo siya sa eleksyon bilang Vice President ay salig sa paniniwala niyang hindi sasabak sa 2022 national elections ang anak na si Davao City Mayor Sara Duterte-Carpio bilang pagpapakita na rin ng delicadeza.

Gayunman, nilinaw ni Roque na wala pang pinal na impormasyon hinggil dito hanggang pagsapit ng buwan ng Oktubre kung kailan itinakda ang paghahain ng Certificate of Candidacy ng mga tatakbo sa 2022 elections.

Dobleng habambuhay na pagkabilanggo ang hatol ng korte kay dating Police Master Sergeant Jonel Nuezca na pumatay sa mag inang Sonia at Frank Anthony Gregorio sa Paniqui, Tarlac nuong nakalipas na taon.

Batay sa desisyon ni Judge Stela Maria Asuncion, napatunayang guilty beyond reasonable doubt si Nuezca para sa kasong two counts ng murder.

Pinagbabayad din ng korte ng halos isang milyong piso si Nuezca bilang danyos sa mga naulila ng mga biktima.

Magugunitang nagkasagutan ang mag ina at si Nuezca na dahilan nang pamamaril ng dating pulis sa mag ina.

Inaasahang sisirit pa at papalo sa pinakamataas na bilang ang mga bagong kaso ng COVID-19 sa mga susunod na linggo.

Ayon ito kay DOH Epidemiology Bureau Director Dr. Alethea De Guzman na nagsabi pang ang pagtaas ng COVID-19 cases sa taong ito ay nagsimula sa huling bahagi ng pebrero hanggang unang bahagi ng marso subalit naitala ang climax nito sa unang linggo ng Abril.

Ipinabatid ni de Guzman na nagsimula sa average na 5,000 kada araw ang naitalang COVID-19 cases at sa mga susunod na araw o linggo ay maaaring makita ang pagtaas pa ng kaso lalo nat hindi pa nararamdaman ang buong epekto ng ECQ.

Inamin ni de Guzman na mahirap tantyahin ang bilang ng mga kaso ng COVID-19 dahil nag iiba iba ang bilang linggu linggo.

Inaprubahan ng City Council ng Muntinlupa ang ordinansang nagpaparusa sa mga magtatangkang magpaturok ng booster shots.

Nakasaad sa ordinansa ang limang libong pisong multa at pagkakulong ng anim hanggang siyam na buwan ng mapapatunayang nagtatangkang magpa booster shot o ikatlong turok ng bakuna kontra COVID-19.

Una nang ibinabala ni MMDA Chairman Benhur Abalos na makukulong ang sinumang magpapaturok ng booster shots.

Sinimulan na ng kamara ang deliberasyon nito sa panukalang 2022 national budget.

Pinagtuunan ng pansin ng House Committee on appropriations sa unang araw ng budget deliberation ang pondo sa susunod na taon ng Development Budget Coordination Committee (DBCC) na binubuo ng DBM, DOF, NEDA at BSP.

Lunes nang isumite ng DBM sa kamara ang 2022 national expenditure program kung saan nakapaloob ang P5.024 trillion budget para sa susunod na taon.

Pinaghahanda na ng PNP ang mga miyembro nito kaugnay sa 2022 national elections.

Ito ayon kay PNP Chief Police General Guillermo Eleazar ay upang mapigilan ang anumang tangkang paghahasik ng gulo ng ilang grupo o indibidwal para sirain ang integridad at kredibilidad ng isasagawang halalan.

Kasunod nito ay inatasan ni Eleazar ang lahat ng unit at area commanders para magsagawa ng accounting ng loose firearms gayundin sa mga private armed groups na inaasahan aniyang mabubuhay kapag eleksyon.

Dapat aniyang mapigilan kaagad ang mga iligal na aktibidad ng CPP-NPA dahil tiyak na sasamantalahin ng mga ito ang panahong ito para makapagpalakas ng puwersa dahil sa kinokolektang pera ng mga ito.

Uumpisahan na rin namin ang pakikipag ugnayan sa Armed Forces of the Philippines para naman sa lugar na may matinding presensya ng mga malalaking armadong grupo. Lalo na ang CPP-NPA-NDF na kumikita ng napakalaking halaga sa pamamagitan ng paniningil ng permit to campaign at permit to win fees sa mga kandidato

Si PNP Chief Police General Guillermo Eleazar, sa panayam ng DWIZ.

Ikinukunsider ni dating senador Ferdinand Bongbong Marcos ang pagtakbo sa pagka Pangulo o pangalawang Pangulo at maging sa pagka senador.

Ayon ito kay Senador Imee Marcos kaya’t patuloy na umiikot ang kanyang kapatid at patuloy na nagsasagawa ng konsultasyon.

Sinabi ni Marcos na kung siya ang tatanungin bilang manang o ate, ayaw na niyang tumakbo si bongbong sa pagka Presidente dahil magiging mahirap ang sitwasyon.

Binigyang diin ni Marcos na magiging malaking karangalan naman kung magiging ka-tandem ni Davao City Mayor Sara Duterte-Carpio ang kanyang kapatid.

Tinawag ni Marcos na marriage made in heaven kapag nagkatuluyan sina Sara at Bongbong dahil hawak nila ang solid north habang solid south naman ang nasa panig ng mga Duterte.

Inaresto ng mga otoridad ang isa sa mga suspek na nang hablot sa celfon ng aktres at vlogger na si Alex Gonzaga sa Barangay Guadalupe Nuevo, Makati City.

Sinabi ni Makati Sub Station 7 Commander Police Captain Edison Mabaet na nasa loob ng kanyang sasakyan ang aktres nang tangayin ng tatlong suspek ang celfon nito.

Hawak aniya ni assistant ng aktres ang celfon para kunan ang isang billboard sa EDSA nang hablutin ito ng mga suspek na kaagad namang hinabol ng driver ni Gonzaga kasama ang mga nagpapatrulyang pulis kaya’t naaresto ang isa sa mga suspek.

Gayunman, hindi naman kaagad narekober sa suspek ang celfon ng aktres kayat nagsagawa ng follow up operation ang mga otoridad kung saan narekober ang gamit ng aktres.

Nahabol naman ng mga otoridad ang celfon ng aktres na ibebenta na sana ng 80,000 pesos.

Pinalaya na rin ang suspek dahil hindi na nagsampa ng kaso ang aktres matapos marekober ang kanyang celfon.

Umalma ang International Vaccine Institute (IVI) ang anito’y hindi makatuwirang pamamahagi ng COVID-19 vaccine sa mga mahihirap at mayayamang bansa.

Ayon kay IVI Director General Jerome Kim, ang naobserbahan nilang mabagal na pamamahagi ng bakuna sa mga mahihirap na bansa tulad ng Sub-Saharan Africa at kawalan ng testing ay magiging daan pa para kumalat ang COVID-19.

Sinabi ni Kim na hindi nagkukulang ang bilang ng bakuna dahil kada linggo ay nakakapag produce ang manufacturers ng 300 million doses ng bakuna.

Natapos na aniya ng mga mayayamang bansa ang 70% ng kanilang populasyon habang isang porsyento pa lamang ng populasyon ng mga mahihirap na bansa ang nababakunahan.

Tiwala si Kim na magpapaubaya ang ilang mayayamang bansa para mabigyan din ng pantay na supply ng bakuna ang mga mahihirap na bansa.