Judith Estrada-Larino

Inaasahan na ng Philippine Hospital Association (PHA) na magiging malaking problema ang pangako ng PhilHealth na pagbabyaad ng claims sa pamamagitan ng Debit Credit Payment Mechanism (DCPM).

Sinabi ni Dr. Jaime Almora, Pangulo ng PHA na mag aaway sila ng kanilang mga duktor sa nasabing mekanismo ng PhilHealth.

Ayon kay Almora, nais nilang idaan sa proseso ang pagbabayad sa normal at mabilisang paraan dahil hindi lamang mga ospital kundi mga duktor din ang nagkaka problema.

Sa ilalim ng DCPM, uunahing bayaran ng PhilHealth ang 60% ng claims ng mga ospital at ibang healthcare facilities sa mga lugar na kinilala ng IATF bilang high risk o critical risk sa COVID-19.

Nakumpleto na ng lungsod ng Maynila ang pamamahagi ng financial assistance sa mga apektado ng ECQ sa Metro Manila mula August 6 hanggang 20.

Nasa mahigit P1.5 milyon ang naibigay na cash aid sa halos 400,000 pamilya sa lungsod ng Maynila.

Nabigyan din ang mahigit 11,000 pamilya ng transport groups at mahigit 1,000 pamilya pa mula sa vulnerable sectors.

Uubra nang ipalabas ng regional offices ng DOH ang special risk allowance (SRA) ng health workers sa mga ospital.

Sinabi ni Dr. Ted Herbosa, consultant ng National Task Force Against
COVID-19 na ang pondo ay maaari nang i-download sa mga ospital na siyang magbibigay ng listahan ng SRA recipients.

Una nang nagbanta ng mass protest ang Alliance of Health Workers kapag nabigo ang DOH na ibigay ang lahat ng kanilang mga benepisyo at kumpensasyon sa medical frontline workers hanggang August 31.

Iniimbestigahan na ng DOLE ang reklamo ng 240 construction workers sa Quezon City na ini-lockdown ng kanilang employer matapos mag positibo sa COVID-19 ang isa sa kanilang kasamahan .

Sa isinagawang swab test ng Quezon City Epidemiology and Surveillance Unit, nag positibo sa COVID-19 ang 30 iba pa sa mga naturang construction workers.

Sa reklamo ng construction workers, ikinulong sila sa lugar at hindi pa pinasuweldo ng employer na millenium erectors corporations.

Sinabi ng DOLE na dapat mabigyan pa rin ng suweldo ang sinumang manggagawang maiipit sa lockdown.

Iimbestigahan ng CHR ang pagpaslang sa isang abogado sa Cebu City.

Sinabi ni Atty. Jacqueline De Guia, Spokesperson ng CHR na magde-deploy sila ng quick reaction team para tutukan ang pagpaslang kay Atty. Rex Fernandez.

Binigyang diin ni de Guia na walang karapatan ang sinuman para pumatay o sagkaan ang karapatan ng taong mabuhay.

Bumaba ang bilang ng arawang pagbabakuna kontra COVID-19 dahil sa limitadong manpower.

Ayon ito kay Dr. Ted Herbosa, consultant ng National Task Force Against COVID-19 matapos bumaba sa 300,000 hanggang 400,000 ang pagbabakuna kumpara sa dating 700,000 kada araw.

Sinabi ni Herbosa na hindi na supply ng bakuna ang problema kundi ang mga taong magbabakuna.

Dahil dito, sinuportahan ni Herbosa ang plano ng CHED at DOH na himukin ang medical students na mag-volunteer bilang vaccinators.

Dalawa pang ospital ang nagsara matapos hindi mabayaran ng PhilHealth.

Ayon ito kay Dr. Jose Rene De Grano, Pangulo ng Private Hospitals Association of the Philippines Incorporated (PHAPI) kayat nasa apat na ang mga pribadong ospital na nagsara dahil sa utang ng PhilHealth.

Isa sa mga ospital na ito ay nasa Samar at tatlo ay mula sa Davao del Sur.

Sinabi ni de Grano na bini-verify pa nila ang napaulat na dalawa pang maliit na ospital sa Davao del Sur ang nagsara na rin.

Ang mga apektadong pasyente aniya ay dinala na sa iba pang ospital at healthcare facilities samantalang nag apply naman sa ibang ospital ang mga healthcare workers na nawalan ng trabaho.

Irerekomenda ng IATF sa Pangulong Rodrigo Duterte ang pagbabalik ng face to face classes sa mga lugar na mayruong mababang kaso ng COVID-19.

Ayon ito kay Presidential Spokesman Harry Roque dahil mas maraming benepisyo ang nakita ng IATF kaysa panganib ng pagbabalik ng face to face classes.

Dapat aniyang mailatag na ng IATF ang rekomendasyon nito hinggil sa pagbabalik ng face to face classes para makapagpasya ang Pangulong Duterte bago ang pagbubukas ng klase sa susunod na buwan.

Una nang lumabas sa survey ng Sequre Educ Movement o movement for safe, equitable, quality and relevant education sa mga estudyante sa public schools na 66% sa mga ito ang kakaunti ang natutunan sa ilalim ng distance learning dahil sa kakulangan ng access sa computers at internet connection dulot na rin ng mahal na singil.

Pinaaga ng Alliance of Health Workers ang naunang taning na ibinigay nito sa DOH para maibigay na ang kanilang mga benepisyo.

Taliwas ito sa naunang September 1 deadline ng nasabing grupo para makuha ang kanilang mga benepisyo at hindi na ituloy ang bantang mass protest.

Ayon kay Robert Mendoza, Pangulo ng grupo, nagkausap na sila ng mga lider ng ibat ibang samahan ng healthcare workers at nagpasya silang paagahin o gawing bukas na, biyernes ang taning na ibinigay nila dahil tila wala aniya silang aasahang magandang balita mula sa gobyerno.

Kasabay nito, ipinabatid ni Mendoza na hindi masaya ang healthcare workers sa pagdinig ng senado dahil naka focus lamang ito sa Special Risk Allowance  (SRA) samantalang pinagdadamot aniya ng gobyerno ang iba pang benepisyo nila.

Hinimok ni Health Undersecretary At Treatment Czar Leopoldo Vega ang PhilHealth na i-prioritize ang pagbabayad sa COVID-19 cases claims ng mga pribadong ospital.

Sa gitna na rin ito ng banta ng mga private hospitals na kakalas na sa ugnayan sa PhilHealth dahil sa mga hindi nababayarang utang sa kanila.

Ayon kay Vega, ang ibabayad ng PhilHealth ay malaking tulong para makapagpatuloy ng operasyon ng mga pribadong ospital na nalugi na ng husto.

Una nang nagpalabas ng circular ang PhilHealth na nagsususpind sa
COVID-19 claims na kailangan pang imbestigahan.