Jopel Pelenio

Inilabas na ng Department of Education (DepEd) ang guidelines para sa enrollment ng 2022-2023 school year na magsisimula sa August 22.

Alinsunod sa DepEd order no. 35 ang mga bagong enrollment process na dapat sundin ng mga school heads, mga guro, at mga magulang na ipatutupad mula July 25 hanggang August 22.

Nakasaad din sa guidelines, na maaring gawin ang enrollment sa pamamagitan ng in-person, remote, at dropbox forms.

Ayon sa DepEd, na sa ilalim ng in-person mode, pwedeng magpa-enroll ng personal ang mga magulang at estudyante kaakibat ang mariing pagtalima sa minimum health and safety standards.

Para naman sa remote enrollments, maaring lumagda lamang ng digital forms at ipadala sa official email address o anumang messaging platforms ng eskwelahan.

Samantala, pwede namang mag-fill out na lamang ng form sa bahay at isumite ito nang personal sa mga drop boxes ng mga paaralan na papasukan ng estudyante.

Una nang sinabi ni Vice President at Education secretary Sara Duterte na parehong ipatutupad ang in-person classes at distance learning mula Agosto hanggang Oktubre, habang magsisimula naman ang limang araw na face-to-face classes sa buwan ng Nobyembre.

Giit ni VP Inday Sara na ligtas nang makapagbubukas ngayon ang mga klase dahil nailatag na ang lahat ng health protocols sa nakalipas na dalawang taon.

Muli nang binuksan sa mga motorista ang southbound lane ng EDSA-Kamuning flyover sa Quezon City, matapos itong isara ng halos isang buwan dahil sa isinagawang rehabilitasyon.

Ganap na ala-5:26 kahapon ng hapon nang tuluyan nang tanggalin ang mga plastic barrier na nakaharang doon.

Ayon sa MMDA, maari nang daanan ng lahat ng uri ng mga behikulo ang EDSA Kamuning flyover southbound lane.

June 25 nang isinara sa publiko ang flyover na ito dahil sa kinailangang kumpunihin ang mga bitak at lubak nito.

June 21 naman nang ipag-utos ni MMDA chairman Romando Artes ang pagsasara ng 30-meter stretch ng flyover para sa tatlumpong araw na pagkukumpuni.

Pahayag ni Artes, aabot sa halos 140,000 vehicles ang bumabaktas sa EDSA-Kamuning flyover kada-araw.

Hinimok ni Pang. Ferdinand Marcos Jr., ang mga Pilipino na magpabakuna na at tumanggap ng booster shots upang matiyak ang mataas na proteksyon kontra COVID-19.

Ginawa ni pang. Marcos ang apela sa kanyang social media post, isang araw matapos ang kanyang 7-days quarantine period makaraang mahawan sa ikalawang pagkakataon ng virus.

Sa vlog ng Pangulo, sinabi nito na wala na syang nararamdaman na anumang sintomas ng COVID19.

Sinabi pa ni Pang. Marcos, na buti na lamang at nakatanggap na sya ng bakuna at nabigyan narin ng booster shot, dahil kung hindi, maaring lumala ng tuluyan ang kanyang sakit.

Samantala, inihayag pa ng Presidente na kanyang ilulunsad ang massive campaign para sa pagpapabooster shot at pagpapapabakuna katuwang Department of Health (DOH), Department of the Interior and Local Government (DILG), at Department of Education (DepEd).

Dagdag pa ng Chief Executive na preparasyon na rin ito sa pagbabalik ng face-to-face classes at pagluwag ng iba pang mga safety protocols.

Inihayag pa ni Pang. Marcos na kung magiging matagumpay ang kampanyang ito, posibleng magtuloy tuloy na ang pagpapatupad nito.

Nakapagtala ng 20 volcanic earthquakes ang Mount Kanlaon sa nakalipas na 24- oras.

Ayon sa Philippine Institute of Volcanology and Seismology (PHIVOLCS), umabot na sa 151 tonnes ng sulfur dioxide ang ibinuga ng bulkan simula noong Mayo a-1 ng kasalukuyang taon.

Hindi naman nasukat ng ahensya ang taas ng pagbuga ng abo dahil sa natatakpan ito ng kaulapan.
Pahayag ng PHIVOLCS, nananatili ang Alert level 1, o mababang antas ng alerto sa Bulkang Kanlaon, bagamat bahagya itong tumaas o “slightly inflated.”

Patuloy namang ipinapa-alala ng ahensya na mahigpit na ipinagbabawal ang pagpasok sa four-kilometer radius permanent danger zone at pagpapalipad ng anumang sasakyang panghimpapawid malapit sa bulkan.

Dagdag ng PHIVOLCS, kabilang sa mga posibleng panganib na mangyari, ay ang biglaang steam-driven o phreatic eruptions.