Nakaranas ng mga pag-ulan ang ibat ibang lugar sa bansa dulot ng Low Pressure Area (LPA) at ng Intertropical Convergence Zone (ITCZ).
Ayon sa weather bureau PAGASA, namataan ang LPA kahapon, 695 kilometers silangang bahagi ng Guiuan, Eastern Samar.
Dahil dito, maulap na papawirin na may kasamang mga pag-ulan at pagkidlat ang naranasan sa Davao Region at Soccsksargen.
Habang nakaranas rin ng sama ng panahon ang Metro Manila at nalalabing bahagi ng bansa.
Umabot na sa mahigit P37 million ang halaga ng mga nasirang agrikultura sa bansa, matapos ang mga naranasang pagbaha sa ibat-ibang lugar dahil sa mga pag-ulan.
Base sa ulat ng Department of Agriculture (DA), nasa 1,559 na mga magsasaka ang labis na naapektuhan sa mga lugar ng Sultan Kudarat, Sarangani, at Zamboanga del Sur sa Mindanao, habang nakaranas naman ng flashfloods sa bahagi ng Banaue, Ifugao sa Northern Luzon.
Winasak naman ng mga pagbaha ang 882 metric tons na mga pananim mula sa 1,700 hectares na agricultural area.
Labis ding naapektuhan ang mga aning palay, livestock at high-value crops.
Patuloy namang inaalam ng DA ang kabuuang halaga ng mga nasira sa sektor ng agrikultra.
Walang diskwento sa delivery fees ang mga senior citizen at persons with disabilities (PWDs) pagdating sa kanilang mga online transactions.
Ayon kay Department of Social Welfare and Development (DSWD) assistant secretary Rommel Lopez, saklaw lamang ng mga diskwento para sa mga online transaction ng mga Senior Citizen at PWD ang mga pangunahing bilihin, mga mahahalagang produkto at mga serbisyo.
Matatandaan na ilang ahensya ng gobyerno ang nag-isyu ng joint memorandum circular na naglalayong mabigyan ng 20% discount ang mga senior citizen at mga may kapansanan, kasama na dito ang dagdag na 8% Value-Added Tax (VAT) exemption para sa kanilang mga online purchases, phone calls, at mobile applications.
Pahayag ni Lopez, hindi naka-itemize ang delivery charges para sa mga binibiling produkto online ng publiko.
Gayunman, kasama sa mga mayroong diskwento, ang mga gamot at mga medikal na suplay na pinahihintulutang bilhin ng Department of Health, kabilang na ang mga professional fee ng mga manggagamot, dental fees, diagnostic at laboratory fee sa mga pribadong ospital, medical facilities, outpatient clinics at home healthcare services.
Upang makakuha naman aniya ng diskwento sa merchant ang mga senior citizen at PWDs, bago mag-oder online, kailangang makapagpakita sila ng mga dokumento, gaya ng scanned copy o screenshot ng kanilang ID at ang harap at huling pahina ng kanilang purchase booklet.
Pahayag ni Lopez, maari silang makakuha ng diskwento sa pagbili ng mga nasabing item kapag umabot ito sa mahigit P1,300 per calendar week, sa online at offline transactions, at walang carryover ng hindi kanilang mga unused amount.
Hindi naman aniya saklaw ng P1,300 limit ang mga restaurants.
Nakapagtala ang bansa ng 2,578 new COVID-19 infections kahapon.
Ayon sa Department of Health (DOH), ito na ang pinakamataas na tally cases simula noong buwan ng Pebrero.
Dahil dito, umakyat na sa kabuuang 3,730,545, ang COVID cases sa bansa.
Lumalabas sa DOH data, na umabot na sa 18,990 ang active infections mula sa 18,090 nitong nagdaang Biyernes.
Base sa talaaan ng health department nasa 9,294 ang new cases sa Metro Manila sa nakalipas na dalawang linggo, na sinundan ng CALABARZON na mayroong 5,057, Central Luzon – 2,092, Western Visayas – 2,055, at Central Visayas – 863.
Maraming pasyente naman ang nakarekober mula sa viral disease, dahilan upang pumalo na sa 3, 650, 914, ang kabuuang bilang ng mga gumaling, habang nananatili naman sa 60, 461 ang binawian ng buhay.
Kumpiyansa si Veteran boxing analyst Atty. Ed Tolentino na magtatagumpay sa kanyang first title defense para sa WBC World Featherweight Champion si Mark Magsayo laban kay Rey Vargas na gaganapin sa Alamodome San Antonio, Texas, USA ngayong darating na Linggo, July 10, 2022.
Prediksyon ni Tolentino, magiging 50-50 ang laban na ito dahil magaling din aniya na boksingero si Vargas na isang Undefeated former World Champion.
Pero mayroon aniyang kalamangan dito si Magsayo dahil sa maraming kahinaan si vargas kaya naman maaring magkaroon ng mga knockdonws sa mga unang round ng laban.
Naniniwala ang Veteran Boxing Analyst na mas mabilis at mas malakas si Magsayo.
Kailangan lamang aniya na magawa nito ng tama ang kanilang game plan at maging mapagpasensya hanggang sa mahuli ang kahinaan ni Vargas.
Tiwala din si Tolentino na hindi aabutin ng 12rounds ang labang ito at posibleng mapabagsak ni Magsayo si Vargas pagdating ng eight rounds.
Inilarawan ni US Secretary of State Antony Blinken na constructive o produktibo ang kanilang naging pag-uusap ni Chinese Foreign Minister Wang Yi, na naglalayong mapigilan ang paglala ng bilateral tension ng Estados Unidos at China.
Ayon kay Blinken, sa kabila nang ‘di pagkakaunawaan ng kani-kanilang mga bansa, tiwala siya na naging makabuluhan, matapat at mabunga ang naganap na pagpupulong na tumagal ng limang oras.
Hindi lamang aniya makabubuti para sa China at US ang resulta ng meeting kundi makatutulong rin ito para sa kaayusan ng bawat nasyon sa mundo.
Giit ni US Secretary of State na committed sila na mapanatili ang maayos na relasyon, kumpetisyon at diplomatikong pakikipag-ugnayan sa Beijing.
Umabot sa P118-B ang nakolekta ng Bureau of Customs (BOC) mula sa Duties and Taxes sa unang anim na buwan ng kasalukuyang taon na galing sa nine billion liters ng marked fuel.
Alinsunod sa Tax Reform for Acceleration and Inclusion (Train Law), kailangang isagawa ang fuel marking upang mabawasan ang talamak na Oil smuggling sa bansa.
Sa pamamagitan nito agad na malalaman ng pamahalaan kung dumaan sa tamang proseso ng pagbabayad ng buwis ang mga dumadating na imported fuel.
Ayon sa BOC, na naka-base ang kanilang hakbangin na ito sa pagnanais na masugpo ang illegal oil trading at makolekta ang rightful duties and taxes na para sa gobyerno.
Pinapurihan ng Commission on Human Rights (CHR) ang hakbang ng Bureau of Jail Management and Penology (BJMP) na ma-decongest ang mga bilangguan sa bansa.
Ginawa ng CHR ang pahayag kasunod nang panawagan na sanay magpasa ang bagong administrasyon ng batas na bubuo sa National Preventive Mechanisms (NPM).
Matatandaan na sinabi ni BJMP spokesperson Jail Supt. Xavier Solda, na bumaba na sa 397% ang congestion rate sa mga piitan ngayong buwan ng Hulyo.
Subalit ayon kay CHR executive director atty. Jacqueline Ann De Guia, na medyo mabagal ang pagbaba ng Jail decongestion ngayong taon dahil base sa Commission on Audit (COA) annual audit reports, umabot sa 403% noong 2020 ang pagbaba ng jail congestion sa bansa mula sa dating 438% sa taong 2019.
Dahil aniya sa slow improvement na ito nananatili paring hamon ang siksikan ng mga bilanggo sa mga BJMP na nagdudulot ng negatibong impact sa mga Persons Deprived of Liberty (PDL) dahil maaring hindi na masunod ang manual on habitat, water, sanitation at kitchen in jails at ang united nations standard minimum rules for treatment of prisoners.
Bunsod nito hinimok ng CHR ang pamahalaan na madaliin ang isinasagawa nilang decongestion sa pamamagitan ng penal reform, gaya ng non-custodial alternatives to detention for minor cases, pagpapabilis ng pagpapalaya sa mga qualified detainees at ang pagtatayo ng mga bagong pasilidad.
Inamin ni Barbie Forteza sa lie detector challenge vlog ni Bea Alonzo na naging crush nito ang former love team na si Andre Paras.
Sa latest vlog, makikita na naging honest at diretso ang pagsagot ni Barbie sa lahat ng tanong na ibinato sa kanya ni Bea.
Pero pagdating sa katanungan hinggil sa kung mayroon itong paghanga o crush kay Andre, tila natigilan at kinabahan ang aktres.
Ngunit makalipas ang ilang segundo agad na pabulong na sumagot si Barbie ng mga katagang “Yes” o Oo.
Matatandaan na nagsama sina Barbie at Andre sa mga programa ng GMA na “That’s My Amboy” at “The Half Sisters.”
Kasalukuyang in relationship si Barbie sa kanyang hunk actor boyfriend na si Jak roberto.
Kinumpirma ng Office of the Vice President (OVP) na pinagpaplanuhan na na nila ang paglipat sa kanilang new headquarters sa Mandaluyong City.
Ayon kay Vice President spokesperson Reynold Munsayac, pinaghahandaan na nila ang paglilipat sa kanilang bagong opisina kasama ang mga co-terminos, casual, at permanent employees ng OVP.
Pahayag ni Munsayac, mas magiging episyente at maayos ang kanilang trabaho lalo na’t karamihan sa mga OVP employees ang naninirahan lamang malapit sa Mandaluyong.
Very accessible din aniya ang lokasyon nito dahil malapit lamang sa mga major roads at mass transportation facilities.
Mananatili din ani Munsayac ang opisina ni Vice Pres. Sarah Duterte sa Department of Education sa Pasig City, na malapit lamang sa Mandaluyong.