Jopel Pelenio

Hindi umano aabutin ng isang oras ang magiging State of the Nation Address ni Pang. Ferdinand Marcos Jr., bukas, July 24, 2023.

Ayon kay House Speaker Ferdinand Martin Romualdez, base sa kanyang impormasyon, posibleng abutin lamang ng 45 minutes ang gagawing pag-uulat sa bayan ng Pangulo.

Pagdating naman sa lalamanin ng talumpati ni PBBM, sinabi ni Romualdez na wala syang anumang detalye ukol dito.

Pero kung pagbabasehan aniya ang unang taon ng administrasyong Marcos, maganda ani Speaker ang itinatakbo ng ekonomiya dahil sa naging mabilis ang pagtaas ng Growth Domestic Product (GDP) ng bansa.

Samantala, inihayag ni Speaker Romualdez na bukas, nakatakda nang magconvene ang mga miyembro ng House of Representatives kasabay ng kanilang pagdalo sa ikalawang SONA ni Pang. Marcos.

Pinayagan ng Quezon City Government ang Grupong Bayan na magkasa ng kilos protesta sa Commonwealth Avenue bukas, kasabay ng ikalawang pag-uulat sa bayan ni Pang. Ferdinand Marcos Jr.

Base sa permit na inisyu ng QC LGU, papayagan lamang ang bayan na maglunsad ng demonstrasyon mula Commonwealth Avenue hanggang Tandang Sora Avenue, simula 8AM hanggang 12NN ng tanghali.

Ayon sa lokal na pamahalaan, hindi nila pipigilan ang pagnanais ng grupo na maglunsad ng aktibidad, subalit dapat lamang na tumalima ang mga ito sa mga guidelines na inilatag ng Inter-Agency Task Force of the Management of Emerging Infectious Disease (IATF), at siguruhin hindi mababalam ang maayos na daloy ng trapiko sa lugar.

Samantala, aabot naman sa 25,000 personnel ang ipakakalat ng Philippine National Police (PNP) sa loob at labas ng Batasang Pambansa upang mapanatili ang peace and order sa mismong SONA ng Pangulo.

Inaprubahan ni Pang. Ferdinand Marcos Jr. ang hakbang na kanselahin na ang klase at trabaho sa mga government offices bukas,  July 24, 2023.

Bunsod ito ng inaasahang pagtama sa bansa ng tropical storm Egay at ng ikakasang transport strike bukas.

Ito ang nakasaad sa Memorandum Circular na inilabas ng malakanyang at nilagdaan ni Executive Secretary Lucas Bersamin.

Samantala, tuloy naman ang operasyon ng mga ahensya ng gobyerno na may kaugnayan sa pagbibigay ng basic and health services at preparedness and response sa panahon ng kalamidad o sakuna.

Ipinauubaya naman ng pamahalaan sa pamunuan ng mga private schools at mga pribadong kumpanya ang pagdedeklara ng suspensyon.

Tiniyak naman ng Malakanyang na nakalatag na ang mga contingency plans para sa mga maaaring maapektuhan ng bagyo at ng ikakasang transport strike bukas, kasabay ng ikalawang pag-uulat sa bayan ni Pang. Bong Bong Marcos Jr.

Pitong libong Lalamove drivers sa National Capital Region (NCR) ang nakatakdang magsagawa ng “strike booking,” o hindi tatanggap ng anumang online booking sa second State of the Nation Address ni Pang. Bong Bong Marcos Jr., bukas, July 24, Araw ng Lunes.

Ayon sa ilang Lalamove drivers, nais nilang ipakita ang kanilang pagkadismaya sa napakababa umanong booking fees, na tinawag ng mga itong ‘unfair charges.’

Inirereklamo din ng mga driver ang mga promo na ibinibigay sa mga Lalamove users dahil sa kanila ikinakaltas imbes na sa kumpanya.

Maliban sa Metro Manila, makikiisa din sa protesta ang mga Lalamove drivers mula sa mga lalawigan ng Batangas, Quezon, Laguna, Cebu at Davao.

Apela ng mga ito, aksyunan ang kanilang mga hinaing.

Tikom naman ang bibig ng pamunuan ng Lalamove hinggil sa mga panawagang ito ng kanilang mga drayber.

Pinigil ng mga otoridad ang mga demonstrador na nagtangkang maglunsad ng kilos protesta sa US Embassy sa Lunsod ng Maynila.

Ayon sa ulat, nasa 180 na indibidwal ang nagsagawa ng demonstrasyon, na sinimulan sa Chinese Embassy sa Makati City.

Subalit hindi na natuloy ang plano ng grupo na magkasa ng protesta sa harap ng Embahada ng Estados Unidos matapos harangin ng mga tauhan ng Manila Police District.

Dahil dito, nagtungo na lamang sa Quezon Boulevard ang mga ito upang doon ituloy ang kanilang programa.

Ilan sa mga isinisigaw ng mga demonstrador ang mga isyung may kinalaman sa salary increase ng mga ordinaryong manggagawa, pagpapatigil sa mga quarrying operation, at pagbuwag umano sa National Task Force to End Local Communist Armed Conflict (NTF-ELCAC).

Una nang sinabi ng Philippine National Police (PNP) na kanilang ipatutupad ang maximum tolerance sa mga makikiisa sa kilos protesta sa araw ng ikalawang State of the Nation Address (SONA) ni Pang. Ferdinand ”Bongbong” Marcos Jr., bukas.

Tuloy ang transport strike ng grupong Manibela sa mismong araw ng ikalawang State of the Nation Address (SONA) ni Pang. Ferdinand “BongBong” Marcos Jr., bukas, July 24, 2023.

Ayon sa grupo, sisimulan nila sa isang martsa malapit sa Commonwealth Avenue ang kanilang 3-Day protest.

Layun ng ikakasa nilang transport strike na tutulan ang December 31 deadline para sa consolidation phase ng PUV Modernization Program.

Pahayag ng Manibela, nais ng kanilang transport group na magkaroon ng tigil-pasada na lalahukan ng nasa 4K tsuper mula lamang sa Metro Manila.