Jenn Patrolla

Naaalarama si House Committee on Basic Education and Culture Chairman at Pasig City Representative Roman Romulo sa ulat na mataas na bilang ng mga ‘functional illiterate’ o hirap umunawa sa pagbabasa ang mga senior at junior high school graduate noong nakaraang taon.

Kasunod ito ng inilabas ng Philippine Statistics Authority sa pagdinig ng Senado na aabot sa halos labing siyam na milyong Pilipino na nagtapos ng nasabing baitang ang hirap umunawa.

Inamin sa DWIZ ni Congressman Romulo na mali ang education system ng bansa dahil sa labis na aralin ng mga mag-aaral.

Kaya naman umapela ang mambabatas sa deped na dapat paganahin na ang National Educators Academy of the Philippines upang sanayin ang mga guro sa pagtuturo ng mga basic sa pagbabasa at pagsusulat.

Nananatiling pangunahing alalahanin ng mga botante ang paglikha ng mga trabaho at food security sa bansa.

Ayon sa survey ng Social Weather Stations, 93% ng mga pilipino ang nagsabing iboboto nila ang mga kandidatong may adhikain na palakihin ang mga oportunidad sa trabaho, paunlarin ang agrikultura at tiyakin ang food security.

91% naman ang nagsabing susuportahan nila ang kandidatong may layuning palakasin ang healthcare system sa bansa.

Kabilang din sa mga nangungunang advocacies ang karapatan ng mga manggagawa at kapakanan ng mga OFW,  pagbabawas ng kahirapan, pagkontrol sa presyo ng mga pangunahing serbisyo at bilihin.

Gayundin ang pantay-pantay na access sa edukasyon, at pagtugon sa mga epekto ng pagbabago ng klima at pagpapahusay ng kahandaan sa kalamidad.

Isinagawa ang survey noong April 11 hanggang 14 sa 1,800 respondents sa iba’t ibang panig ng bansa.

Gagawin nang taon-taun ang paghahandog ng libreng sakay sa mga pangunahing mass transit sa Metro Manila

Ito ang inanunsyo ni Transportation Secretary Vince Dizon kasabay ng pagtangkilik ng mga pasahero sa apat na araw na libreng sakay sa MRT-3, LRT 1 at 2.

Layon nitong bigyang parangal ang mga manggagawang pilipino bilang pagdiriwang ng Labor Day tuwing Mayo a-uno.

Inaasahan ng DOTR na magiging bahagi na ito ng taunang pagdiriwang ng Labor Day, at plano rin nila ang pagpapalawak ng ganitong mga insentibo sa iba pang sektor ng pampublikong transportasyon sa mga susunod na taon.

Dadalo si Vice President Sara Duterte sa preliminary investigation ng Department of Justice dahil sa reklamong inihain laban sa kanya ng National Bureau of Investigation.

Ito’y matapos matanggap ni VP Sara ang summons mula sa office of the prosecutor dahil sa reklamo ng NBI hinggil pahayag nitong ipapatay si Pangulong Ferdinand Marcos Junior, First Lady Liza Araneta-Marcos, at House Speaker Martin Romualdez.

Ayon kay VP Sara, haharap siya sa DOJ pero tinatapos lang ng kanyang kampo ang counter-affidavit.

Una nang sinabi ni Prosecutor General Richard Fadullon na isasagawa ang preliminary investigation Mayo 9 hanggang 16.

Nakatakdang simulan ngayong buwan ang pagrerepaso sa minimum wage rates sa ilang rehiyon.

Ito ang kinumpirma ni Labor Bureau of Local Employment Head Assistant Secretary Patrick Patriwirawan Junior alinsunod sa utos ni Pangulong Ferdinand Marcos Junior na itaas ang sahod ng mga manggagawang Pilipino.

Ayon kay Patriwirawan, handa ang Department of Labor and Employment na ipatupad ang dalawandaang pisong legislated wage hike sakali maipapasa ito ng kongreso at aprubahan ni PBBM.

Patuloy naman anya nakikipagdiyalogo ang kagawaran sa iba’t ibang sektor kasama ang labor sector and employer sector bago maipatupad ang taas-sahod ng mga obrero.

Naniniwala ang Department of Justice na may mabigat na ebidensiya ang prosecutors na nagsampa ng kasong human trafficking si dating Presidential Spokesman Harry Roque.

Ayon kay Justice Secretary Jesus Crispin Remulla, marapat na sagutin ni Roque ang kasong kinakaharap niya.

Nilinaw pa ng Kalihim na maaaring masagot lamang ito kapag nakauwi na ang dating presidential spokesman.

Magugunitang kabilang si Roque na sinampahan ng human trafficking dahil iniuugnay ito sa operasyon ng iligal na Philippine Offshore Gaming Operator sa Pampanga.

Tiniyak ng Department of Agriculture na hindi mahahaluan ng pulitika ang bentahan ng bente pesos kada kilo ng bigas sa Visayas.

Kasunod ito ng pambabatikos ni Vice President Sara Duterte na istratehiya lamang ng pamahalaan ang 20 pesos rice project para manalo sa halalan ang mga kandidatong nasa ilalim ng alyansa para sa bagong Pilipinas.

Sa panayam ng DWIZ, sinabi ni Agriculture Assistant Secretary Genevieve Velicaria – Guevarra, na mahigpit na ipinababawal ng commission on elections na gamitin ng mga kandidato ang 20 pesos na bigas para sa pangangampanya.

Umakyat na sa mahigit 7,000 indibidwal o katumbas ng 14,000 pamilya ang naapektuhan ng pagputok ng Bulkang Bulusan.

Batay sa pinakahuling tala ng Department of Social Welfare and Development Field Office, may pinakamaraming apektado ay mula sa bayan ng Irosin na nakapagtala ng 8,158 pamilya o 40,776 katao mula sa 22 barangay.

Sinundan naman ng Juban, na may 2,934 pamilya o 14,671 katao mula sa 10 barangay habang 1,925 pamilya o 9,625 katao sa Casiguran.

Samantala, dalawang bayan ang nakapagtala ng mga residenteng nailikas sa mga evacuation centers, kabilang ang Irosin, na may 6 na pamilya at labing tatlong pamilya sa Juban.

Patuloy namang nagsasagawa ng koordinasyon ang mga lokal na pamahalaan, DSWD, at iba pang ahensya ng gobyerno upang matiyak ang kaligtasan at mga pangangailangan ng mga naapektuhang residente.

Binalaan ng Commission on Elections ang mga kandidato na huwag maging epal o samantalahin ang pagbebenta ng bente pesos na bigas sa Visayas.

Ayon kay COMELEC Chairman George Erwin Garcia, magkakaroon lamang ng problema kung may mga “epalitikong” makikita sa bentahan ng murang bigas.

Maaari rin anyang ituring itong vote buying.

Sa ngayon, nakikipagtulungan na ang D.A. sa lokal na pamahalaan ng Cebu para maibenta ang mas abot-kayang halaga ng bigas.

Ibinulgar ni Senate Majority Leader Francis Tolentino ang troll farm operations na pinopondohan ng China upang siraan hindi lamang ang mga personalildad na itinuturing na anti-China kundi maging ang gobyerno at ang buong bansa.

Sa pagdinig ng Senate Special Committee on Admiralty and Maritime Zones, iprinisinta ni Tolentino ang kontrata ng Chinese Embassy sa Infinitus Marketing Solutions Incorporated para sa operasyon ng mga keyboard warriors na nilagdaan noong August 2023.

Ipinakita rin ni Tolentino ang isang tseke na nagkakahalaga ng P930,000 na kabayaran ng Chinese embassy sa korporasyon.

Sinabi ng Senador na ilan sa mga naging trabaho ng keyboard warriors na magkomento sa mga post at magpakalat ng mga impormasyon pabor sa China.

Ilan sa mga tinukoy ni Tolentino na aktibidad ng warriors o troll farms ang mga isyu o banat laban sa mga batas kaugnay sa West Philippine Sea gayundin ang mga banat kay Pangulong Ferdinand Marcos Jr.

May mga operasyon din ang keyboard warriors laban kay Cong. Ace Barbers matapos umano itong maglabas ng mga pahayag labnan sa China.—ulat mula kay Cely Ortega-Bueno (Patrol 19)