Jenn Patrolla

Tinawag ni Vice President Sara Duterte na “too little, too late” ang imbestigasyon ng Senado sa flood control projects.

Ito ang binigyang-diin ng Bise Presidente dahil matagal nang alam ng pamahalaan ang problema sa katiwalian sa flood control projects.

Ayon kay Vice President Duterte, hindi lamang sa kasalukuyang administrasyon umiiral ang isyu kundi sa mga nagdaang pamahalaan pa.

Pinagdudahan din ng ikalawang pangulo ang biglaang malawakang imbestigasyon na aniya’y maaaring may ibang motibong nakatago.

Sinuspinde ng Land Transportation Office ang driver’s license ng isang rider sa loob ng 90-araw matapos mag-viral sa social media ang video nitong sumasayaw sa ibabaw ng kaniyang motorsiklo habang nakahinto sa trapiko sa isang pampublikong kalsada.

Batay sa paligid na ipinakita sa video, lumilitaw na kinuha ito malapit sa kanto ng Osmeña Highway at Senator Gil J. Puyat Avenue sa Makati City.

Ayon kay LTO chief, Assistant Secretary Vigor Mendoza II, naglabas na sila ng show cause order laban sa naturang rider at sa may-ari ng motorsiklo bilang tugon sa direktiba ni Pangulong Ferdinand Marcos Jr. na tugisin ang mga pasaway na motorista.

Batay sa show cause order na pirmado ni LTO Intelligence and Investigation Division Chief Renante Melitante, inaatasan ang rider na magpaliwanag kung bakit hindi siya dapat ituring na “improper person to operate a motor vehicle,” na may pinakamabigat na kaparusahan na tuluyang pagbawi ng lisensya.

Itinakda ang pagdinig sa Agosto a-bente at inutusan ang rider na isuko ang kanyang driver’s license bago o sa mismong araw ng hearing.

Kinumpirma mismo ni Attorney Michael Poa, isa sa mga legal counsel ni Vice President Sara Duterte na tatalima sila sa utos ng Korte Suprema at magsusumite ng paliwanag.

Kasunod ito ng inilabas na press briefer ng Korte Suprema hinggil sa inihaing motion for reconsideration ng House of Representatives sa impeachment ni VP Sara.

Sa utos ng Kataas-taasang Hukuman, iminungkahi nito na magbigay ng komento sina Vice President Sara Duterte at Atty. Israelito Torreon ukol dito sa loob ng 10 araw mula nang matanggap ang notice.

Ikinalugod ng kampo ni Vice President Sara Duterte ang desisyon ng Korte Suprema na nagdedeklarang labag sa Konstitusyon ang Articles of Impeachment laban sa pangawalang pangulo.

Ito’y dahil sa paglabag sa one-year bar rule sa ilalim ng Article I 11 Section 3(5) ng 1987 Constitution.

Ayon kay Attorney Micheal Poa, isa sa mga legal counsel ni VP Sara, pinagtibay ng Korte ang kanilang paninindigan na ang ika-4 na reklamo sa impeachment ay walang legal na basehan.

Ang unanimous decision ay tagumpay ng rule of law at nagsisilbing paalala sa limitasyon ng kapangyarihang gamitin ang proseso ng impeachment.

Gayunman, handa pa rin ang kampo ng Bise Presidente na harapin ang mga paratang sa tamang panahon at forum.

Pumayat at hirap nang kumain si dating Pangulong Rodrigo Duterte.

Ito ang ibinahagi ni Vice President Sara Duterte matapos bisitahin ang kanyang ama sa International Criminal Court sa The Hague, Netherlands.

Ayon kay VP Sara, nahihirapan ang dating pangulo sa pagkain dahil hindi ito katulad ng mga pagkaing Pinoy.

Nahihirapan din ang nakatatandang Duterte dahil sa malamig na klima sa nabanggit na bansa.

Hindi rin nawala ang pagka-miss ng dating pangulo sa mga pamilya at mga kaibigan, kaya’t may mga araw na magaan ang pakiramdam nito at may mga araw rin na hirap siya.

Sa ngayon, patuloy na umuusad ang imbestigasyon ng  madugong war on drugs ni dating Pangulong Duterte.

Posibleng manatili sa South America si dating Pangulong Rodrigo Duterte, sa oras na payagan ng International Criminal Court ang hirit nitong temporary interim release.

Ayon kay Justice Secretary Jesus Crispin Remulla, karaniwang inililipat ng ICC sa South America ang mga pansamantalang pinalalayang akusado.

Kaya’t posibleng doon din mapunta si Duterte, taliwas sa pahayag ng abogado ng dating pangulo na may isang hindi pinangalanang bansa na pumayag nang tumanggap sa kanya habang dinidinig ang  kasong crimes against humanity kaugnay ng kampanya kontra droga.

—ulat mula kay Jun Samson (Patrol 24)

Iginiit ni Kabataan Partylist Representative Raoul Manuel na hindi dapat palayain sa International Criminal Court detention center si dating Pangulong Rodrigo Duterte, kahit ito’y pansalamanta lamang.

Ayon sa Mambabatas, tila may bombang naghihintay na sasabog sa paglaya ng dating pangulo, na tiyak na magiging viral content material na gagamitin ng paid troll army.

Layon nito anya bully-hin, takutin, at sirain ang morale ng mga pamilya ng mga biktima ng extra judicial killings na nais lumahok sa proseso ng ICC.

Dahil dito, humirit si Representative Manuel sa malakanyang na huwag pairalin ang pag-iwas sa gulo dahil isang paraan ito ng pag-iwas sa hustisya.

 Inaasahang haharap sa plenaryo ng Senado sa Lunes ang labing-isang kongresista na miyembro ng panel of prosecutors sa isasagawang impeachment trial laban kay Vice President Sara Duterte.

Ayon kay Attorney Arnel Bañas, Deputy Secretary at spokesman ng Senado, ipababasa sa mga kongresista ang impeachment cases na kanilang isinampa laban sa Bise Presidente.

Sa ngayon, wala pa anyang natatanggap ang Senado na written confirmation na pupunta ang mga kongresista.

Pero may written acknowledgment na si House Speaker Martin Romualdez na natanggap nila sa Kamara ang sulat ni Senate President Chiz Escudero ukol sa gagawin sa Lunes.

Dagdag pa ni Attorney Bañas, na kailangang harapin ng congressmen-prosecutors sa Lunes dahil kailangan ito para masimulan ang impeachment trial.

 —ulat mula kay Cely Ortega-Bueno (Patrol 19)

Mahigit isandaang driving school ang sinuspinde ng Land Transportation Office sa nakalipas na dalawang linggo dahil sa samu’t saring paglabag.

Ayon kay  LTO Chief Assistant Secretary VIgor Mendoza II, lumabag ang mga ito sa  hindi pagpapakita o hindi pagsunod sa tamang teoryatikal na pagsasanay sa pagmamaneho.

Karamihan sa mga sinuspinde ay sa Central Luzon, Calabarzon, at Metro Manila.

Dahil dito, pinagpapaliwanag ng ahensya ang mga driving school upang marinig ang kanilang panig.

Samantala, sinabi ni Transportation Secretary Vince Dizon na makikipagpulong ang kanilang ahensya sa mga concerned groups ngayong linggo upang talakayin ang mga rekomendasyon ukol sa kaligtasan sa kalsada.

Posibleng hindi na kakailanganin ang mga magsasaka sa Pilipinas.

Ito ang ikinababahala ni Raul Montemayor, National Manager ng Federation of Free Farmers Cooperatives Incorporated dahil sa patuloy na pag-angkat ng pamahalaan ng bigas.

Sa panayam ng DWIZ, sinabi ni Montemayor, na umabot sa tatlo hanggang  kwatro pesos ang ibinaba ng presyo ng palay, na nagiging dahilan ng pagkalugi ng mga magsasaka.

Samakatuwid, bumagsak sa trese hanggang 15 pesos ang presyo ng palay ngayong taon, na mas mababa kumpara sa 18 pesos noong 2024.

Isa sa tinitignang dahilan ng pagbagsak ng presyo ng palay ay ang sobrang supply ng bigas dahil sa importasyon, paglakas ng piso kontra dolyar at bagsak-presyo ng imported rice.