Jenn Patrolla

Tumaas ang naitalang insidente ng sunog sa buong bansa na sanhi ng paputok mula December 31, 2023 hanggang January 1, 2024.

Sinabi ni Bureau of Fire Protection Spokesperson Fire Superintendent Annalee Atienza, na nakapagtala sila ng 81 insidente ng sunog mula sa nabanggit na panahon.

Mas mataas ito kumpara sa kaparehong panahon noong 2022, na aabot lamang sa 15 insidente ng sunog simula December 31 hanggang January 2022.

Dagdag pa ni Spokesperson Atienza, walang nasawi sa mga naitalang  mga sunog na kaugnay sa New Year’s revelry nitong 2023.

Paiigtingin pa ng pamahalaan ang mga ipinatutupad na hakbang upang matuldukan ang terrorism financing sa bansa.

Ito ay hinggil sa pagpopondo sa mga terorista o anumang aktibidad na nagdudulot ng kaguluhan at takot sa publiko.

Sinabi ni Anti-Money Laundering Council Executive Director Matthew David, na mayroong silang tatlong action items na tinututukan kaugnay sa terrorist financing.

Tulad ng pagtukoy dito ng mga law enforcement agency gaya ng PNP, NBI, NICA, at iba pa para malaman ang mga persons of interest o posibleng terrorist o terrorism financers.

Sa ngayon, tinututukan ng AMLC na maalis ang Pilipinas sa grey list ng global money laundering and terrorist financing watchdog na The Financial Action Task Force.

Inalerto na ng Philippine Embassy sa Japan ang Filipino community sa Yamagata, Japan kasunod ng malakas na lindol na tumama sa nabanggit na bansa.

Pinaalalahanan pa ng embahada ang mga Pilipino na maging mapagmatyag.

Kasunod na rin ito ng tsunami warning mula sa pamahalaan ng Japan.

Ang mga apektado Pilipino ay pinayuhan din na makipag-ugnayan sa lokal na pamahalaan ng Yamagata o maging sa Assistance to National Units ng Philippine Embassy.

Sapat ang suplay ng mga pagkain sa mga pamilihan sa Metro Manila hanggang sa pagsalubong ng bagong taon.

Ito ang tiniyak ng Department of Agriculture kung saan kabilang ang bigas, meat products, mga gulay, isda at prutas sa mayroong sapat na suplay.

Ayon sa DA, nag-iikot ang mga tauhan ng departamento kasama ang DTI at LGU upang matiyak na walang magaganap na pagtaas ng presyo ng mga bilihin lalo na’t mataas ang demand ng mga pagkain hanggang sa pagpasok ng bagong taon.

Sinusubaybayan ng DA ang Mega Q-Mart at Kamuning Public Market sa Quezon City para matiyak ang suplay at presyo ng pagkain.

Kaugnay dito, patuloy ang pakikipag-ugnayan ng DA, DTI at National Price Coordinating Council para matiyak na mananatiling stable ang suplay at hindi pagdagsa ng mga imported goods sa mga pamilihan.

Tututukan ng pamahalaan ang usapin hinggil sa isyu ng lesbian, gay, bisexual, transgender, queer, intersex at asexual matapos maglabas ni Pangulong Ferdinand Marcos Jr. ng executive order na lumikha ng isang espesyal na komite.

Sa ilalim ng EO 51 na pinirmahan ni Pangulong Marcos, ang Special Committee on LGBTQIA+ Affairs, na sasailalim sa reconstituted diversity and inclusion committee ay pangungunahan ng isang chairperson na may ranggong undersecretary at magkakaroon ng tatlong miyembro na may ranggo ng assistant secretary.

Mamimili ang pangulo ng tagapangulo at mga miyembro ng espesyal na komite mula sa mga kilalang organisasyon na kumakatawan sa komunidad ng LGBTQIA+.

Pangungunahan ito ng Department of Social Welfare and Development secretary at co-chaired ng mga kalihim ng DMW at ng DOLE.

Magsisilbi ring vice chairperson ang kalihim ng Department of the Interior and Local Government.

Nadagdagan pa ang bilang ng mga nabiktima ng mga paputok, ilang araw bago ang pagsalubong ng bagong taon.

Batay sa ulat ng DOH-Fireworks-related injury, kasalukuyang nasa 12 kaso ng fireworks-related injuries ang naitatala sa buong bansa matapos makapagtala ng panibagong 4 na kaso sa nakalipas na magdamag.

2 sa mga bagong kaso ay mga batang lalaki, na gumamit ng ilegal na paputok na piccolo at boga habang ang dalawang iba pa ay gumamit ng kwitis.

Patuloy namang nananawagan ang DOH sa mga LGU at mga lider ng pribadong sektor na mag-organisa na lamang ng mga community fireworks display sa halip na gumamit ng mga paputok.

Ikinalugod ng administrasyong Marcos ang pagbaba ng poverty incidence sa unang semestre ng 2023.

Batay sa ulat ng Philippine Statistics Authority, bumaba sa 16.4% ang poverty incidence  mula sa 18% sa kapaherong panahon noong 2021, katumbas ito ng 230,000 kabahayan na nakatakas sa kahirapan.

Ayon kay PSA Chief at National Statistician Claire Dennis Mapa, isang dahilan ng pagbaba ng mga mahihirap sa bansa ay ang pagtaas ng sahod ng mga manggagawa.

Mula 2021 hanggang 2023, bumaba ang antas ng kahirapan sa 15 mula sa 17 rehiyon sa bansa kabilang ang National Capital Region, Cordillera Administrative Region, Cagayan Valley, Central Luzon, Soccsksargen at Caraga.

Naitala naman ang pinakamataas na poverty incidence sa BARMM.

Tumaas ng 39% ang bilang ng mga namamatay dahil sa aksidente sa lansangan mula 2011 hanggang 2021.

Ito’y batay sa inilabas na ulat ng Philippine Statistics Authority mula 7,398 na namatay noong 2011 at umakyat ito sa 11,096.

Ayon kay Health Secretary Ted Herbosa, 84% sa mga namamatay ay lalaki habang ang aksidente sa kalsada rin ang isa sa pangunahing dahilan ng pagkasawi ng mga batang Pilipino.

Sinabi naman ni Transporration Secretary Jaime Bautista, binuo nila ang Philippine Road Safety Action Plan 2023-2028 para maisulong ang “road safety.”

Magiging mabisa aniya ang WHO Global Plan on Road Safety para sa pagpapatupad nito upang maiwasan ang pagkamatay at pagkapinsala ng mga tao sa mga aksidente.

Apatnapung libong trabaho ang nagbunga sa huling biyahe ni pangulong Ferdinand Marcos Jr. sa Japan.

Sinabi ni Labor Secretary Bienvenido Laguesma, na may mga investor na mga hapon ang maglalagak ng puhunan sa Pilipinas sa pagpasok ng 2024.

Dagdag pa ng kalihim, karamihan sa mga malilikhang trabaho ay mula sa power and renewable energy sector.

Maliban sa dagdag trabaho, posibleng bumaba rin ang presyo ng kuryente sa bansa dahil sa mga dagdag na power producers.

Dahil dito, aabot sa kabuuang 300,000 bagong trabaho ang magbubukas sa 2024 na naging bunga ng mga biyahe ni Pangulong Marcos ngayong taon.

Mayorya ng mga Pilipino ang umaasang bubuti ang kalagayan ng ekonomiya at direksyon ng bansa sa susunod na taon.

Ito ay batay sa inilabas na survey ng PUBLiCUS Asia sa 1,500 respondents na isinagawa mula November 29 hanggang December 4.

Ayon sa survey, aabot sa 43% hanggang 45% ang umaasang bahagyang uunlad ang kalagayan ng Pilipinas sa 2024.

Tumaas sa 43% ang nagsasabing uunlad sa ikatlong quarter ng taon hanggang 49% sa ika-apat na quarter ng taon.

40% hanggang 45% sa South Luzon at 41% 47% sa Visayas.

Bumaba naman sa 44% sa Mindanao na mula sa 50%.

Gayunpaman, ipinunto ng PUBLiCUS Asia na ang mga opinyon ng respondents hinggil sa direksyon ng bansa ay makabuluhang bubuti dahil tumaas mula 61% sa ikatlong quarter hanggang 66% sa ikaapat na quarter.