Jenn Patrolla

Walang kakulangan ng tubig sa summer season.

Ito ang tiniyak ng  Metropolitan Waterworks and Sewerage system sa mga lokal na pamahalaan ng bansa.

Ayon kay M.W.S.S Division Manager Patrick Dizon , inatasan na nila ang ibang ahensya na magpatupad ng mitigating measures noong nakaraang taon.

Magugunitang hiniling ng M.W.S.S sa National Water Resources Board na taasan ang water elevation ng Angat Dam mula sa 212 hanggang sa 214 meters.

Dagdag ng M.W.S.S official, na ang karagdagang dalawang metro ay titiyak ng sapat na suplay ng tubig sa panahon ng tag-init.

Una nang inatasan ng Department of the Interior and Local Government ang mga LGU na hikayatin ang kanilang constituents na magtipid ng tubig.

Plano ng transport group na Piston at Manibela na magsagawa muli ng 11 araw na tigil-pasada.

Ito’y bilang pagtutol pa rin sa PUV modernization program ng pamahalaan.

Ayon kay Piston President ka Mody Floranda, umaasa sila na madinig ng korte ang kanilang hinanain lalo na sa kahalagahan ng transport sector sa bansa.

Dagdag pa ng grupong Piston, hindi lamang mga driver at operator ang maaapektuhan kundi maging commuters.

Maliban dito, sa inilabas ng Land Transportation Franchising and Regulatory Board, nasa mahigit 300 ruta sa Metro Manila ang hindi na-consolidate.

Samantala, muling magsasagawa ng panibagong imbestigasyon ang house committee on transportation kaugnay sa PUV modernization sa Enero 24 . – sa panunulat ni Charles Laureta

Pumalo na sa sesenta pesos ang kada kilo ng presyo ng bigas.

Ito’y sa gitna ng patuloy na pagtaas ng presyo ng mga pangunahing bilihin sa bansa.

Batay sa huling monitoring ng bantay-presyo ng Department of Agriculture, tumaas sa 2 pesos ang kada kilo ng retail price ng local special rice, na mula sa P68  ang kada kilo.

Umabot naman sa P67  ang kada kilo ng local premium rice habang nasa P57 ang local well-milled rice at ang local regular rice naman ay nasa P53 kada kilo.

Inihayag ni Federation of Free Farmers National Manager Raul Montemayor na umabot sa P30  kada kilo ang farmgate price ng palay sa Tarlac.

Una nang nagbabala si Bantay Bigas Spokesperson Cathy Estavillo na posibleng tumaas ang bilang ng mga nagugutom sa bansa, dahil sa patuloy na pagtaas ng presyo ng mga bilihin.

Mas lalamig pa ang panahon sa susunod na linggo.

Ito ang kinumpirma ni Joey Figuracion, climatologist ng PAGASA dahil sa inaasahang amihan surge o bumabang temperatura.

Ayon kay Figuracion, naitala ang pinaka malamig na temperatura nitong Enero 11, na aabot sa 12.1°C sa La Trinidad, Benguet at mababang temperatura na 20.2°C sa Metro Manila.

Asahan namang iinit ulit ang panahon sa oras na may surge na maitatala sa bansa.

“Generally peaceful” ang pagdiriwang ng pista ng Itim na Nazareno.

Ayon kay PNP National Capital Region Police Office Director Major General Jose Melencio Nartatez Jr., ito’y dahil naging maayos ang koordinasyon sa pagitan ng security forces at stakeholders gaya ng local government unit ng Maynila, mga deboto at simbahan.

Bagama’t may mga naitalang sugatan na aabot sa pitong daang katao.

Wala namang naitalang malalang krimen sa pagdiriwang ng pista ng Black Nazarene, kahapon.

Sarado na ang ilang kalsada sa Maynila para sa Traslacion 2024.

Simula ngayong araw hanggang bukas, sarado ang lansangan ng Bonifacio Drive mula sa Andas Circle hanggang sa Padre Burgos, maging ang Katigbak Drive at South Drive.

Hindi rin madadaanan ang kahabaan ng Roxas Boulevard mula Katigbak hanggang U.N. Avenue at ang kahabaan ng Padre Burgos mula Roxas Boulevard hanggang sa Jones, McArthur at Quezon Bridges.

Isinara na rin ang kahabaan ng Finance Road mula Padre Burgos Avenue hanggang Taft Avenue at ang Maria Orosa Street mula T.M. Kalaw hanggang Padre Burgos.

Naka-activate naman ang incident management team ng Manila Disaster Risk Reduction and Management Office.

Pirmado na ni Pangulong Ferdinand Marcos Jr. ang Republic Act No. 11976 o ang “Ease of Paying Taxes Act.”

Ito’y kabilang sa mga priority bills ni Pangulong Marcos na binanggit sa kanyang State of the Nation Address noong 2022 at 2023.

Suportado ng bagong pinirmahang batas ang 8-point socioeconomic agenda ng administrasyon sa pamamagitan ng pangongolekta ng mas maraming buwis.

Aamiyendahan nito ang ilang mga section ng National Internal Revenue Code of 1997 para ma-update ang sistema ng pagbubuwis sa Pilipinas.

Kabilang dito ang classification ng mga taxpayers sa micro, small, medium, at large, electronic o manual filing ng returns at pagbabayad ng buwis sa Bureau of Internal Revenue.

Ipagpapatuloy sa senado ang pagdinig kaugnay sa pag-rebyu ng prangkisa ng National Grid Corporation of the Philippines sa Miyerkules, Enero 10.

Ito’y partikular sa nangyaring power outages sa Panay Island, na lubhang naapektuhan ang ilang negosyo.

Naniniwala si Senador Raffy Tulfo na ang malawakang brownout sa Panay Island ay dahil sa kapalpakan ng NGCP kung saan hindi na-maintain ang stability ng grid na bahagi ng kanilang tungkulin.

Paliwanag ng Sen. Tulfo, hindi ito ang unang beses na naganap ang pagbagsak ng kuryente sa Panay kaya naman iginiit ng senador na dapat nang rebyuhin ang prangkisa ng NGCP.

Pinag-aaralan na ng Department of Agriculture ang pagpapataw ng suggested retail price sa bigas sa gitna ng patuloy na pagtaas ng presyo nito.

Ayon kay Agriculture Spokesperson Arnel De mesa, makatutulong ang SRP upang matiyak na magiging abot-kaya ng mga mamimili ang presyo ng bigas.

Sa inilabas na ulat ng Philippine Statistics Authority, nakapagtala ng pinakamabilis na pagtaas ang rice inflation sa loob ng labing apat na taon noong buwan ng Disyembre nang nakaraang taon.

Batay sa datos ng PSA, ang average na presyo ng regular milled rice noong December 2023 ay nasa ₱48.50 ang kada kilo mula sa ₱46.73 noong November 2023, na mas mataas kumpara sa ₱39.63 kada kilo noong December 2022.

Patuloy na nadaragdagan ang bilang ng mga namatay sa malakas na pagyanig sa Japan.

Batay sa ulat, sumampa na sa mahigit 70 katao ang nasawi habang 400 ang sugatan sa pagyanig kaninang umaga.

Libu-libo namang residente ang nakararanas ng power outages dahil sa pag-collapse ng ilang gusali at kabahayan.

Nahihirapan na rin ang mga otoridad na magsagawa ng rescue operation dahil sa malakas na pag-ulan sa Japan.

Nabatid na ang Noto Peninsula ang pinakamatinding tinamaan ng 7.5 magnitude na lindol.

Samantala, muli namang hinikayat ng Department of Migrant Workers ang mga Pilipino sa Japan na naapektuhan ng malakas na lindol na makipag-ugnayan sa DMW Office sa Osaka.

Ito’y upang mabigyan ng agarang tulong sa gitna ng krisis na kinakaharap ng mga Pilipino sa Japan.

Kabilang na rito ang mga sumusunod na numero:

DMW-OWWA Japan Help desk (lokal) 1348

DMW-OWWA Japan Help desk (abroad) +632 1348

DMW-MWO-Osaka +81 7022756082 o +81 7024474016