Jenn Patrolla

Target ng Metropolitan Manila Development Authority na palawigin ang operating hours ng MRT at LRT ngayong holiday season.

Ito’y matapos makipag-ugnayan sila sa Department of Transportation para sa  panukalang pagpapalawig sa operating hours ng mga railways upang may masakyan pauwi ang mall workers at shoppers matapos na pahabain ang mall hours.

Sinabi ni MMDA Acting Chairman Don Artes, na handa na rin ang ahensya sa inaasahang pagsisikip ng trapiko habang papalapit ang Pasko.

Nakahanda rin anya ang MMDA sakaling magkaroon pa ng transport strikes sa harap ng nalalapit na deadline para sa consolidation ng PUJs sa Disyembre 31.

Nauna nang naglabas ang LTFRB ng Memorandum Circular na nagkakansela sa permits ng PUVs na hindi nag-consolidate ng kanilang prangkisa sa January 1, 2024.

Nilagdaan ang dalawang memorandum of cooperation sa pagitan ng Japan at Pilipinas matapos ang bilateral meeting nina Pangulong Ferdinand Marcos Jr. at Japanese Prime Minister Fumio Kishida sa Prime Minister Office sa Tokyo, Japan.

Sinaksihan mismo ng dalawang lider ang pagpirma sa dalawang memorandum of cooperation.

Batay sa ulat ng Japan-ASEAN Summit Secretariat, ang unang memorandum of cooperation ay ang patuloy na ugnayan upang magkaroon ng maagang conclusion sa negosasyon para sa reciprocal access agreement at para mas mapaganda pa ang kooperasyon ng Philippine Coast Guard at Japanese Coastguard.

Pinirmahan mismo nina Philippine Coastguard Commandant Ronnie Gil Gavan at Japan Coastguard Commandant Ishii Shohei ang dalawang memorandum of cooperation.

Pinirmahan din ang isa pang memorandum of cooperation  na nagpapalakas sa ugnayan ng Pilipinas at Japan para sa energy transition at decarbonization, maging ang pagpapatuloy at promotion ng infrastructure cooperation. - mula sa ulat ni Gilbert Perdez (Patrol 13)

Naghahanda na ang National Grid Corporation of the Philippines dahil sa bagyong Kabayan.

Ayon sa NGCP, kabilang sa kanilang paghahanda ay ang pagtiyak ng mga kagamitan sa komunikasyon, pagkakaroon ng hardware materials at supplies na kailangan para sa mga aayusing pinsala sa mga pasilidad.

Nagtalaga rin ang NGCP ng mga line crew sa strategic areas upang mapadali ang agarang restoration work.

Ikinasa ito ng integrated disaster action plan ng NGCP upang matiyak ang kahandaan ng lahat ng power transmission facilities na inaasahang maaapektuhan ng bagyo.

Tutulungan ng pamahalaan ang mga magsasaka at indibidwal na maaapektuhan ng El Niño phenomenon.

Ito ang iginiit ni Pangulong Ferdinand Marcos Jr. kung saan irerehistro ang mga apektado ng tagtuyot sa iba’t ibang livelihood programs.

Sinabi ni PBBM, na magpapatuloy ang Assistance to Individuals in Crisis Situation ng DSWD at TUPAD ng DOLE para sa mga magsasaka na masisira ang pananim.

Tiniyak ng pangulo na magpapatupad ang pamahalaan ng kahalintulad na mga programang ginawa sa pagtugon sa inflation.

Partikular dito ang whole-of-nation approach bilang paghahanda sa El Niño na inaasahang tatagal hanggang second quarter ng 2024.

Nagbanta ang farmers group na Federation of Free Farmers na lulubha ang krisis sa bigas sa susunod na taon.

Ito ang binigyang diin ni FFF National Chairman Raul Montemayor bunsod ng patuloy na pagtaas ng halaga ng  retail price ng bigas kahit na panahon ng anihan ng palay sa bansa.

Ayon sa opisyal, makakaranas ang Pilipinas ng kakulangan ng suplay ng bigas sa buwan ng Pebrero at Marso sa susunod na taon.

Anya, kahit may peak palay harvest season simula October 2024 ay mayroong magaganap na pagtaas sa retail price ng bigas dahil hindi marami ang ani ng palay ng mga magsasaka ngayon.

Gayunman, umabot sa ₱58 ang kada kilo ng imported well-milled rice habang ₱69 ang kada kilo ng imported premium rice at ₱65 kada kilo ng imported special rice.

Apatnapu’t walong porsyento ng mga Pilipino ang tiwalang bubuti ang kanilang buhay sa susunod na labindalawang buwan.

Ito’y batay sa isinagawa ng Social Weather Stations mula  September 28 hanggang October 1.

Ayon sa survey, 4% ng respondents ang naniniwalang hindi magbabago ang kalidad ng kanilang buhay, habang 6% ang nagsabing lalala ito sa susunod sa labindalawang buwan.

Samantala, ang natitirang 7% ay hindi nagbigay ng sagot sa nasabing usapin.

Tinawag ng SWS na “optimists” ang mga Pilipino na naniniwalang bubuti ang kalidad ng kanilang pamumuhay, habang “pessimists” naman ang mga nagsabing lalala ang kanilang pamumuhay sa susunod na 12 buwan.

Ang survey ay isinagawa sa pamamagitan ng face-to-face interviews sa 1,200 adults sa buong bansa.

Nananatili ang commitment ng Marcos administration upang mapaangat ang sektor ng agrikultura sa pamamagitan ng mga irrigation project.

Ito’y matapos pangunahan ni Pangulong Ferdinand Marcos Junior ang iba’t ibang programa kaugnay sa irigasyon sa Central Luzon, Nueva Ecija.

Ayon kay PBBM, patuloy ang effort ng pamahalaan upang mapaangat ang sektor ng agrikultura partikular ang pagpaparami ng rice production sa Nueva Ecija na pangunahing pinagkukunan ng bigas ng buong bansa.

Patunay anya ito sa commitment ng kanyang administrasyon para ma-develop ang modern infrastructure system ng magpapaganda ng sektor ng agrikultura.

Sa oras na matapos ang  pinasinayaang Balbalungao Small Reservoir Irrigation Project, magbibigay ito anya ng patubig sa halos isang libong ektartang sakahan sa naturang lalawigan at makikinabang ang mahigit limandaang magsasaka.

Minimal lamang ang magiging epekto ng tigil-pasada na ikinasa ng piston ngayong araw kontra “jeepney phase out.”

Ito ang sinabi ni MMDA Acting Chairperson Don Artes sa bago sa ikakasang transport strike kasabay ng matinding demand sa sasakyan dulot ng Christmas rush at payday Friday.

Ayon sa opisyal, hindi ganoon karami ang sasamang tsuper at operator sa tigil pasada.

Una nang sinabi ng PISTON na pamumunuan nila ang malawakang tigil-pasada ng mga public utility vehicles upang tutulan ang itinakdang December 31 deadline ng gobyerno para makapagkonsolidate sa ilalim ng mga kooperatiba.

Sisimulan na ng Maharlika Investment Fund ang pamumuhunan sa National Development Fund na siyang sasagot sa kinakailangan ng bansa at paglikha ng trabaho.

Ayon kay Maharlika Investment Corporation President at CEO Joel Consing, sa oras na makakuha ang MIF ng sobrang pondo, maaaring i-roll out ang iba pang investment opportunities kabilang ang fixed income instrument, domestic at corporate bonds.

Anya, nakalaan mismo ang blueprint ng MIF sa turismo, infrastructure, digital infrastructure at agro-forestry industrial urbanism.

Giit ng MIC Chief, magsisimula muna sa  National Development Fund sa unang lima hanggang pitong taon at kapag may excess funds na ay maaari na itong mag-invest sa markets.

Sa ngayon, may initial funding ang MIF na ₱75-B mula sa Land Bank at DBP at inaasahang aakyat sa ₱125-B.

Nakapagtala ang Department of Health ng anim na mga kaso ng e-cigarette or vaping use-associated lung injury o evali sa bansa ngayong taon.

Ito ay batay sa ulat ng  Philippine College of Chest Physicians mula Abril hanggang Hulyo sa kasalukuyang taon.

Ayon sa DOH, ang evali ay isang medical condition kung saan ang mga pasyente ay natutukoy na may respiratory illness o lung injury na may kaugnayan sa paggamit ng electronic cigarettes o vaping products.

Dahil dito, nanawagan ang kagawaran sa mga medical experts na kaagad na ireport sa kanila ang mga maitatalang evali cases.

Makatutulong din anya kanilang pag-rerport sa collective efforts upang sugpuin ang pagkalat ng sakit.