Magkakaroon ng rollback sa presyo ng mga produktong petrolyo sa susunod na linggo.
Ayon sa mga source mula sa industriya, bababa ng P1.10 hanggang P1.20 ang halaga ng kada litro ng gasolina habang P0.60 hanggang P0.70 sa diesel.
Aabot naman sa P0.65 hanggang P0.75 ang magiging tapyas-presyo sa kada litro ng ga-as o kerosene.
Bago ito, matatandaang nagkaroon ng sampung linggong serye ng oil price hikes na naging dahilan upang magtaasan ang presyo ng mga pangunahing bilihin.
Naglabas ng isang international arrest notice ang Tunisia laban sa dati nitong pangulo na si Moncef Marzouki.
Gayunman, hindi binanggit ng TAP state news agency kung ano ang kasong kinakaharap ng dating lider.
Noong nakaraang buwan ay ipinag-utos ni Tunisian President Kais Saied sa justice ministry na imbestigahan ang pitumpu’t anim na taong gulang na dating lider kasunod ng panawagan nito sa France na huwag suportahan ang kasalukuyang rehimen.
Giit naman ni Marzouki, hindi na niya ikinagulat ang pagpapalabas ng arrest warrant laban sa kanya at tinawag pa niya itong na isang uri ng paninindak sa lahat ng mga Tunisians.
Mahigit dalawang milyong pisong halaga ng hinihinalang shabu ang nasabat ng mga awtoridad mula sa tatlong tulak umano ng droga, kabilang ang isang Food Panda rider, sa ikinasang buy-bust operation sa Scoop St., Fourth Estate, Brgy. San Antonio, Parañaque City.
Maliban sa delivery rider na si Rene Robido, timbog din ang iba pang suspek na sina Angela Arichea at Razal Doronila, parehong nakatira sa nasabing lugar.
Nakumpiska mula sa mga suspek ang ilang sachets ng umano’y shabu na nagkakahalaga ng higit 2 million pesos, isang timbangan, isang libong pisong buy-bust money, at dalawang cellphone.
Mahaharap ang mga suspek sa kasong paglabag sa Comprehensive Dangerous Drug Act of 2002.
Naghimas ngayon ng malamig na rehas na bakal ang dalawang kilabot umanong holdaper matapos madakip ng mga awtoridad sa Makati City.
Ang mga suspek na sina Joel Trigero at Roman Jhay Bituon ay nahuli sa dragnet operation ng Makati City Police Station sa Estrella St. malapit sa Edsa kasunod ng holdapan na naganap sa isang convenience store sa Brgy. Palanan.
Bukod sa paglabag sa curfew at wala ring lisensya, nahulihan din sina Trigero at Bituon ng dalawang baril at mga bala.
Ang mga suspek na ngayo’y nahaharap sa kasong roberry ay positibo ring kinilala ng mga personnel ng Mini-Stop na siyang humoldap sa kanila.
Mahigit 100,000 pisong halaga ng hinihinalang shabu ang nasabat mula sa tatlong drug suspects sa ikinasang Oplan Galugad ng mga awtoridad sa Parañaque at Las Piñas.
Sa operasyon sa NAIA Ave., Brgy. Sto. Niño, Parañaque, huli sa akto si Esnaira Compania habang inaabot kay Aurora Adriano ang ilang pakete ng umano’y shabu na nagkakahalaga ng higit 129,000 pesos.
Sa hiwalay namang Oplan Galugad ng Las Piñas City Police Station sa Edsa St. Barangay Manuyo 1, naaresto ang suspek na si Jonathan Dequit kung saan nakumpiska mula rito ang halos limang libong pisong halaga ng hinihinalang shabu.
Kapwa sasampahan ng kasong paglabag sa Comprehensive Dangerous Drugs Act ang mga naturang suspek.
Nahulog sa kamay ng mga awtoridad ang mag-asawang tulak umano ng ipinagbabawal na droga sa ikinasang buy-bust operation sa Brgy. Pinagsama, Taguig City.
Kinilala ang mga suspek na si Yolanda Flores, 37 taong gulang, manikyurista, at Wargil Fallarcuna, 42 taong gulang, at kapwa nakatira sa nasabing lugar.
Isang pulis ang nagpanggap na buyer kaya’t nadakip ang mag-asawa kung saan nasabat mula sa mga ito ang limang sachets ng umano’y shabu na nagkakahalaga ng 98,600 pesos, isang pitaka, at maging ang tatlong daang pisong buy-bust money.
Sasampahan ang mga suspek ng kasong paglabag sa Comprehensive Dangerous Drugs Act of 2002.
Arestado ang isang 34 na taong gulang na babae dahil sa pagkakasangkot sa kasong carnapping sa Muntinlupa City.
Matapos ang isinagawang surveillance operations, si Glenda Panganiban ay nadakip sa East Service Road sa Alabang ng pinagsanib na pwersa ng District Anti Carnapping Unit (DACU), District Intelligence Division (DID) at Muntinlupa Sub Station 3.
Si Panganiban ay hinuli sa bisa ng warrant of arrest na ipinalabas ng Muntinlupa Regional Trial Court o RTC Branch 204 dahil sa kasong paglabag sa Republic Act 10883 o New Anti-Carnapping Act of 2016.
Aabot sa 180,000 pesos ang inirekomendang piyansa ng korte para sa pansamantalang kalayaan ng akusado.
Patay ang isang barangay captain matapos pagbabarilin ng hindi pa nakikilalang salarin sa Jaen, Nueva Ecija.
Kinilala ni Central Luzon police director Brig. Gen. Mathew Baccay ang biktima na si Zoilo de Belen, 56 na taong gulang, ng Barangay Lambakin.
Sa imbestigasyon, nagdidilig ng mga halaman ang biktima sa boundary ng barangay nang paulanan ng bala ng mga armadong lalaki na sakay ng isang kotse bago mabilis na tumakas sa hindi matukoy na direksiyon.
Inaalam pa ang motibo sa naturang pamamaslang.
Nasungkit ng nag-iisang mananaya mula San Carlos City sa Pangasinan ang jackpot prize sa 6/49 Super Lotto.
Ayon sa Philippine Charity Sweepstakes Office o PCSO, natumbok ng bettor ang winning combination na 05-03-10-17-43-49 na may katumbas na premyong nagkakahalaga ng higit 125 million pesos.
Labinlimang mananaya naman ang nakahula sa limang kombinasyon kaya’t kapwa nanalo ang mga ito ng tig-50,000 piso.
Ang 6/49 Super Lotto ay binobola tuwing Martes, Huwebes, at Linggo.
Naniniwala ang isang grupo ng mga public utility vehicle (PUV) drivers sa San Juan City na malabong magbebenepisyo sila sa fuel subsidy ng gobyerno.
Ayon kay Rolando Miguel Carrasco, lider ng San Juan-Kalentong-Little Baguio Drivers and Operators Association, posibleng ang mga PUV operator lang ang makikinabang sa ayuda dahil sinasabing ipapangalan ito sa kanila at hindi sa mga tsuper.
Binigyang diin ni Carrasco na dapat nakapangalan sa mga driver ang subsidy dahil hindi lang naman ang mga operator ang bumibili ng diesel sa araw-araw nilang operasyon.
Matatandaang inanunsiyo ng pamahalaan na aprubado na ang isang bilyong pisong fuel subsidy para sa mga PUV driver kasunod ng pagsipa ng presyo ng mga produktong pretrolyo.