Muling idinepensa ni Pangulong Rodrigo Duterte ang war on drugs ng administrasyon sa pagsasabing layon nitong protektahan ang bansa laban sa salo’t na ipinagbabawal na gamot.
Ayon sa Pangulo, ang nagpapatuloy na kampanya laban sa illegal na droga ay para na rin sa kapakanan at kinabukasan ng mga kabataan.
Sa kasalukuyan ay may nakabinbin na reklamo laban sa Duterte administration sa International Criminal Court (ICC) dulot sa paratang na ‘crimes against humanity’.
Nakataas ang shellfish ban sa mga karagatang sakop ng Bataan.
Batay sa Advisory No. 61 ng Bureau of Fisheries and Aquatic Resources (BFAR), ang samples na nakolekta mula sa 5 bayan sa lalawigan ay positibo sa red tide toxin na umano’y nagdulot ng paralytic shellfish poisoning.
Sakop ng shellfish ban ang Hermosa, Orani, Samal, Abucay, Balanga City, Pilar, Orion, Limay, at Mariveles.
Dahil dito, ibinabala ng BFAR na lahat ng uri ng shellfish at alamang na hinango mula sa mga nasabing lugar ay hindi ligtas kainin.
Maaari naman umanong kainin ang mga isda ngunit tiyakin lamang na sariwa ito, nahugasan at naalis ang mga hasang bago lutuin.
Wala nang naitatalang aktibong kaso ng COVID-19 sa 39 na barangay sa Cebu City.
Ayon sa Emergency Operations Center (EOC), mahigit 200 kaso na lamang ang mayroon sa lungsod hanggang nitong ika-5 ng Nobyembre.
Pinakamarami ang COVID-19 cases sa Barangay Guadalupe, sinundan ng Barangay Talamban na may 11, kasunod ang Barangay Bacayan at Barangay Inayawan na parehong may 8 kaso.
Samantala, plano ng Cebu City LGU na luwagan pa ang restrictions bunsod ng patuloy na pagbaba ng bilang ng mga impeksiyon sa lungsod.
Pinadapa ng Denver Nuggets ang Houston Rockets sa score na 95-94 sa kanilang laro sa NBA.
Naipanalo ng Nuggets ang laban kahit nag-injury ang kanilang forward na si Michael Porter Jr. sa first quarter pa lamang ng laro.
Si Nikola Jokic ng bumida sa panig ng Denver matapos kumamada ng 28 points habang nagdagdag naman si Will Barton ng 15 points.
Patay ang 19 na indibidwal habang sugatan naman ang 9 iba pa sa malagim na aksidente sa Mexico City.
Ayon sa Federal Highway Authority, inararo ng isang cargo truck ang mga pumipilang sasakyan sa isang toll booth sa highway.
Ang nasabing highway ay daanan ng mga cargo trucks mula lungsod ng Mehiko patungong Puebla City.
Sa kasalukuyan, iniimbestigahan pa rin ang naturang aksidente.
Arestado ang 2 lalaki at 3 babae dahil sa umano’y pagbebenta ng daily time record o DTR na nagkakahalaga ng P30 sa mga residente ng Camarin, Caloocan.
Ayon sa Police Community Precinct 8, pinaglinis sa komunidad ang mga binigyan ng DTR at pinangakuang makakatanggap sila ng halos P7,500 mula sa isang senador.
Sinasabing nakahakot ng higit P4,000 ang mga indibidwal na sangkot sa nasabing modus.
Bagama’t itinanggi ng mga hindi pinangalanang suspek ang akusasyon, sasampahan pa rin ang mga ito ng kasong estafa.
Naglabas na ng ‘all points bulletin’ ang pulisya para sa agarang ikadarakip ng lalaking suspek sa pagpatay sa 5 miyembro ng isang pamilya sa Barangay Tarusanan, Milaor, Camarines Sur.
Ayon kay Col. Louie Dela Peña, tagapagsalita ng Camarines Sur police, tinutugis na nila ang prime suspect na si Arthur De Leon na siyang itinuturong pumaslang sa mga biktimang sina Romeo de Leon, 72; Samuel Cobilla Jr.; Noela Agliones, 7; Hobbie John Britanico, 6; at Robbie John Britanico, 4.
Tanging ang batang si Hades John Britanico ang nakaligtas sa krimen at patuloy itong nilalapatan ng lunas sa isang ospital.
Sa imbestigasyon, nanonood ng telebisyon ang mga biktima nang pumasok sa kanilang bahay ang salarin na nakasuot ng camouflage uniform at pinagbabaril ang mga ito gamit ang isang M16 rifle.
Pinaniniwalaan na ang matagal nang alitan sa lupa ang isa sa motibo ng gunman kaya pinatay ang mga biktima.
Nakatanggap ang Bangsamoro Autonomous Region in Muslim Mindanao o BARMM ng 6 milyong doses ng Johnson & Johnson vaccines at P162 million na halaga ng bigas na donasyon mula Japan.
Ayon kay Presidential Peace Adviser Carlito Galvez Jr., napaulat na mababa ang vaccination turnout sa BARMM kung kaya’t dinagdagan ang alokasyon ng bakuna sa rehiyon.
Nagpasalamat naman ang pamahalaang panlalawigan sa Japanese government, gayundin sa gobyerno dahil sa mga naturang donasyon.
Ipinaresto ng China ang dating hepe ng secret police na siyang namamahala noon sa seguridad ng Hong Kong at Macau.
Si Sun Lijun, dating Chinese vice-minister ng public security, ay isinailalim sa disciplinary investigation noon pang Abril pero tuluyan na itong ipinaaresto ng state prosecutor ngayong araw dahil sa kasong katiwalian.
Sinasabing natuklasan ng National Supervisory Commission ang pagtanggap ng suhol ni Sun, gayundin ang umano’y pagtatago nito ng ilang confidential materials.
Pinataob ng Brooklyn Nets ang Detroit Pistons sa score na 96-90 sa kanilang laro sa NBA.
Kumamada si Kevin Durant ng 29 points habang nagdagdag naman si LaMarcus Aldridge ng 16 points para sa Nets.
Sa isa pang laro, pinahiya naman ng New York Knicks ang Milwaukee Bucks matapos itong ilampaso sa score na 113-98 sa kanilang sariling bakuran.
Si Julius Randle ang nanguna sa Knicks sa pamamagitan ng kanyang 32 points.