Gilbert Perdez

Nasa tamang landas ang economic agenda ni Pangulong Ferdinand Marcos Jr. isang taon matapos itong manumpa bilang ika-labimpitong presidente ng Pilipinas.

Ayon kay Department of Social Welfare and Development Secretary Rex Gatchalian, ang mga programang pang-ekonomiya ng administrasyon ay makatutulong sa pagtataguyod ng kapakanan ng bawat mamamayan at pagpapaunlad ng kabuhayan sa bansa.

Pinatitiyak aniya ni PBBM na mapoprotektahan ang mga mahihirap at vulnerable sectors, hindi lamang laban sa mga sakuna at kalamidad, kundi maging sa epekto ng mataas na presyo ng mga bilihin.

Sinabi ni Gatchalian na isa sa mga naging direktiba sa kanya ng Pangulo ay gawing simple at ilapit sa tao ang ayuda ng gobyerno.

Kaya naman, ibinida ng dating alkalde na sa ilalim ng kanyang pamumuno ay nakapagbukas agad sila ng mga sangay ng DSWD sa Bulacan, Antipolo, at maging sa hilaga, timog at silangang bahagi ng Metro Manila.

Napunta na sa isang bagong hukom ng Muntinlupa Regional Trial Court ang natitirang kasong kriminal laban kay dating Sen. Leila De Lima matapos maghain ng motions for inhibition ang akusado laban sa naunang huwes na may hawak dito.

Sa kanyang kautusan, itinakda ni RTC Branch 204 Judge Abraham Joseph Alcantara ang susunod na pagdinig sa kaso sa Hulyo 7.

Ang drug case laban kay De Lima ay unang hinawakan ni RTC Branch 256 judge Romeo Buenaventura pero boluntaryo itong nag-inhibit sa kaso. Maliban kay De Lima, kabilang din sa mga akusado si dating Bureau of Corrections chief Jesus Bucayu at maging ang mga bodyguards noon ng dating senadora na sina Ronnie Dayan at Joenel Sanchez.

Sinentensiyahan ng Sandiganbayan ng hanggang 7 taong pagkakakulong si Dating Puerto Princesa Mayor, Palawan Mayor Edward Hagedorn.

Ito’y dahil sa kabiguan nitong isauli ang 14 na assault rifles na pag-aari ng lokal na pamahalaan.

Batay sa hatol ni Associate Justice Ronald Moreno, napatunayan ng anti-graft court na guilty si Hagedorn sa kasong malversation kaya’t ‘perpetually disqualified’ o bawal na itong humawak ng anumang posisyon sa gobyerno. Pinatawan din ito ng multa na nagkakahalaga ng P490,000.

Nag-ugat ang kaso sa reklamo ni Mayor Lucio Bayron kung saan isiniwalat nito na sa dalawampung assault rifles ay anim lamang ang naisauli ni Hagedorn matapos ang kanyang termino bilang alkalde noong 2013.

Bukod dito, napatunayan din ng korte na ang mga isinauling armas ni Hagedorn ay “tampered” ang mga serial numbers at hindi ito ang mga orihinal na inisyu sa kanya.

Ibinasura ng Korte Suprema ang apela ng Manila Electric Co. o Meralco hinggil sa kaso na may kinalaman sa polisiya ng power firm.

Sa hatol ng Supreme Court, pinagtibay ng mataas na hukuman ang obligasyon ng Meralco na dapat naaabisuhan muna ang mga kustomer apatnapu’t walong oras o dalawang araw bago sila putulan ng kuryente.

Bagama’t wala pa itong natanggap ng korte ng desisyon, inihayag ng Meralco na matagal na itong nagpapatupad ng 48-hour notice rule para sa disconnection.

Ang kinukuwestiyon umanong insidente ay nangyari noong pang 1999.

Samantala, isinusulong naman ni Presidential Adviser for Poverty Alleviation Larry Gadon ang pag-review sa 48-hour notice rule dahil maaari aniyang hindi ito sapat, partikular sa ilang kaso na kinasasangkutan ng mga mahihirap na consumers.

Pinangunahan ni Pangulong Ferdinand Marcos Jr. ang inagurasyon ng Davao City Coastal Bypass Road o DCCBR Segment A.

Sa nasabing aktibidad, kasama ni PBBM si Vice President at Education Secretary Sara Duterte at iba pang kawani ng gobyerno.

Sa kanyang talumpati, sinabi ni Pangulong Marcos na patuloy lang ang pamahalaan, sa pangunguna ng Department of Public Works and Highways o DPWH, sa pagpapatayo ng mga imprastrakturang kagaya ng DCCBR na tiyak na mapapakinabangan ng taumbayan.

Maliban dito, binigyang-pugay din ng Presidente si dating Pangulong Rodrigo Duterte bunga ng proyektong ito na pasok sa high standard highway network na may layuning pagdugtungin ang mga malalaking isla ng bansa.

Humingi ng paumahin sa publiko ang Manila International Airport Authority o MIAA matapos tamaan ng panibagong power outage ang Ninoy Aquino International Airport (NAIA) Terminal 3.

Ayon kay MIAA officer-in-charge Bryan Co, bagama’t walang nakansela flights ay may pitong biyahe naman ang na-delay dahil sa insidente.

Sinabi ni Co na nagkaroon ng bahagyang power interruption na nakaapekto sa terminal kung saan agad ding naibalik ang suplay bandang alas- 1:29 ng hapon.

Una nang ipinaliwanag ng MIAA na naiwan ng isang Meralco personnel ang isang testing cable sa isa sa mga electric equipment na nagdulot ng power interruption.

Matatandaan na noong Enero 1 ngayong taon ay nagkaroon naman ng system glitch sa NAIA na nakaapekto sa daan-daang flights at anim na pu’t limang libong pasahero.

Pinaalalahanan ni Pang. Ferdinand Marcos Jr. ang ating mga kababayang Bikolano na sumunod sa mga rekomendasyon at evacuation instructions ng lokal na pamahalaan upang masiguro ang kaligtasan ng bawat isa.

Ginawa ni PBBM ang pahayag matapos isailalim sa state of calamity ang probinsya ng Albay dahil sa pag-aalburoto ng Bulkang Mayon,

Sinabi ni Pangulong Marcos na patuloy ang paglilikas sa mga pamilyang nakapaloob sa 6km permanent danger zone at pagdadala sa kanila sa mga evacuation centers.

Ipinagmalaki ng Presidente na nakaantabay na rin ang DSWD o Department of Social Welfare and Development para sa ihahatid nitong tulong tulad ng P114 million Quick Response Fund; P5 million funds na nasa Field Office Region V; at 179,000 Family Food Packs na nasa Disaster Response Centers.

Maliban sa mga preparasyong ito, idinadag ng Pangulo na maaasahang patuloy ang koordinasyon at pagtutulungan ng bawat ahensya kagaya ng Office of Civil Defense, Department of Agriculture, Department of Health, DENR, PHIVOLCS, at iba pa.

Nakapagtala ang Phivolcs ng bahagyang aktibidad sa Bulkang Taal sa Batangas.

Ayon sa Phivolcs, nagkaroon ng dalawang volcanic tremors nitong nakalipas na dalawampu’t apat na oras at pagbuga ng halos anim na libong tonelada ng sulfur dioxide sa bunganga nito.

May nakikita ring upwelling ng mainit na volcanic fluids sa main crater ng bulkan.

Nagkaroon naman ng plume o steaming na nasa 1,500 metrong taas at katamtamang pagsingaw.

Maliban dito, may nakikita ring ground deformation ang Phivolcs, maliban sa maikling pamamaga ng hilagang kanlurang bahagi ng Taal.

Sa ngayon, nakataas pa rin ang alert Level 1 sa Bulkang Taal.

Pinuri ni Quezon Representative Reynante Arrogancia ang ginawang pag-apruba ni Pangulong Ferdinand Marcos Jr. sa Masagana Rice Industry Development Program o MRIDP na tututok sa kapakanan ng mga magsasaka at magpapataas ng rice production.

Ayon kay Arrogancia, ang Masagana program ay patunay na prayoridad ng pamahalaang Marcos ang sektor ng agrikultura, kabilang ang mga magsasaka ng palay.

Sinabi naman ni Arrogancia na mahalagang alamin ng Department of Agriculture ang mahahalagang detalye para sa implementasyon ng programa.

Nangako rin ang mambabatas na susuportahan nito ang farm consolidation sa pamamagitan ng mga kooperatiba at maging ang aspeto ng mechanization.