Gilbert Perdez

Isiniwalat ng isang digital advisory firm na papalo sa limang bilyong tao o higit sa 60% ng populasyon sa mundo ang aktibo ngayon sa iba’t ibang plataporma ng social media o socmed.

Sa pinakahuling quarterly report ng Kepios, umakyat sa 3.7% ang mga users ng social media ngayong taon kumpara noong 2022.

Nasa 5.19 bilyong tao o 64.5% ng world population ang gumagamit ng internet.

Gayunman, ipinaliwanag ng Kepios na malaki ang pagkakaiba ng nakakagamit ng teknolohiya, batay na rin sa kinaroroonang rehiyon sa mundo.

Inihalimbawa ng kompanya ang central Africa kung saan isa sa labing-isang tao sa east at central Africa ang nakakagamit ng social media na malayo sa India na may isa sa 3 tao na gumagamit ng socmed.

Binanggit din na gumugunot ang mga netizens ng 2 oras at 26 minuto kada araw.

Sa kasalukuyan, may tatlong social media applications ang Meta na kinabibilangan ng WhatsApp, Instagram at Facebook na pinakapamoso sa Pilipinas.

Iginiit ng isang abogado na maaaring dumirekta sa International Criminal Court (ICC) ang pamilya ng mga biktima ng ‘war on drugs’ para magsumite ng kanilang mga ebidensya.

Ang pahayag ay ginawa ni Atty. Kristina Conti, ICC assistant to counsel at secretary general ng National Union of Peoples’ Lawyers-National Capital Region, makaraang tumanggi ang gobyerno ng Pilipinas na makipagtulungan sa muling pagbubukas ng imbestigasyon.

Sinabi ni Conti na inaasahan niya na may mga hawak na kopya ng police at SOCO reports ang pamilya ng mga biktima na maaari nilang dalhin sa ICC.

Nasa 7,000 dokumento ang una nang isinumite ng Philippine National Police (PNP) na may kaugnayan sa mga nakabinbin na kaso sa Supreme Court sa isyu ng Oplan Tokhang.

Pinaghahanap ng mga awtoridad ang isang senior citizen na hinihinalang nalunod habang tumatawid sa ilog sa bayan ng Lope De Vega, Northern Samar.

Kinilala ng Municipal Disaster Risk Reduction and Management Office ang biktima na si Eddie Carias, 62 taong gulang.

Sa imbestigasyon, galing sa Barangay Caynaga si Carias pero sa kabila ng mataas na water level sa ilog ay tumawid pa rin ito kaya’t natangay ng rumaragasang agos ng tubig.

Ipinagmalaki ng Bureau of Customs (BOC) na nahigitan nila ang kanilang revenue collection target sa unang bahagi ng taon.

Ayon sa BOC, nakapagtala ito ng P433.4 bilyon na revenue collection mula Enero hanggang Hunyo ngayong taon.

Mas mataas ito ng 3.04 %o P12.768 bilyon kumpara sa naunang target na P420.7 Bilyon na sinasabing bunga ng pinahusay na sistema sa pagtukoy sa customs’ value.

Sinabi pa ng customs na ito’y bilang tugon sa 5-point priority program na direktiba ni Pangulong Ferdinand Marcos Jr.

Pinanindigan ng Department of Justice ang ginawa nitong pagbasura sa mga reklamong murder laban sa 17 pulis na isinangkot sa pagpatay sa isang mag-asawa sa Batangas na binansagang “Bloody Sunday.”

Sa isang resolusyon, ibinasura ng DOJ panel of prosecutors ang motion for reconsideration na inihain ni Rosenda Lemita dahil sa kakulangan ng merito.

Ang anak ni Lemita na si Ana Mariz “Chai” Lemita-Evangelista at mister na si Ariel Evangelista ay napatay sa loob ng isang cottage sa Nasugbu, Batangas sa ikinasang sabay-sabay na pagsisilbi ng ‘search warrants’ ng mga awtoridad sa Batangas, Cavite, Rizal at Laguna kung saan umabot sa siyam na mga aktibista ang nasawi noong March 7, 2021.

Ayon sa mga pulis, nanlaban ang mag-asawa kaya’t napilitan silang gumanti na ikinamatay ng mga ito.

Subalit nakita umano ng sampung taong gulang na anak ng mag-asawang Evangelista na kinaladkad ang mga ito patungo sa isang bahay at nakarinig na lang ito ng sunod-sunod na putok ng baril.

Gayunman, ipinaliwanag ng DOJ na walang nangyaring ‘conspiracy’ dahil hindi naman na-establish kung sino ang bumaril sa mag-asawa habang hindi naman nagtugma ang bala ng baril na nakita sa bangkay ng mag-asawa sa inisyu na armas sa mga pulis.

Itinalaga ni Pangulong Ferdinand Marcos Jr. si Retired Court of Tax Appeals (CTA) Associate Justice Erlinda Piñera Uy bilang bagong miyembro ng Judicial and Bar Council (JBC).

Batay sa appointment paper na nilagdaan ni PBBM nitong Hulyo 21, papalitan ni Uy si Atty. Franklin Demonteverde na napaso ang termino noong Hulyo 9.

Si Uy ay magiging kinatawan ng Integrated Bar of the Philippines (IBP) sa JBC.

Manunungkulan si Uy hanggang Hulyo 9,2027 sa konseho na siyang naatasang sumala ng mga aplikante sa hudikatura.

Makakasama naman ni Uy sa lupon si Chief Justice Alexander Gesmundo na nagsisilbi bilang ex-officio chairperson.

Maliban kina Uy at Gesmundo, kabilang naman sa mga incumbent members ng council sina Justice Secretary Jesus Crispin Remulla, ex-officio member; Sen. Francis Tolentino, Congress; Nesauro Firme, academe; ex-SC Justice Jose Catral Mendoza, retired SC justices; at Toribio Ilao Jr., private sector.

Magdodoble-Kayod ang Department of Agrarian Reform o DAR upang mapalakas ang kanilang crop insurance program dahil sa nakaambang El Niño phenomenon na banta rin sa farming sector.

Ayon kay DAR Secretary Conrado Estrella III, kasama sa mga prayoridad nila ang pagtulong sa mga agrarian reform beneficiaries o ARBs upang makabawi mula sa pagkalugi dulot ng mga kalamidad.

Nabatid na ang insurance coverage ay hindi limitado sa mga nasirang pananim kundi saklaw din nito ang buhay ng mga ‘insured’ na magsasaka at maging ang kanilang pamilya.

Inalis na ng PAGASA [Philippine Atmospheric, Geophysical and Astronomical Services Administration] ang lahat ng storm signals habang napapanatili ng Tropical Depression Dodong ang lakas nito at tinutumbok ang West Philippine Sea.

Ayon sa Weather Bureau, makakaranas pa rin ng mga pag-ulan ang Ilocos Region, MIMAROPA (Region 4B), Zambales at Bataan.

Mararanasan din ang paminsan-minsang pag-ulan sa Metro Manila, Cavite, Batangas, Tarlac, Pampanga, Bulacan, at Western Visayas.

Maging ang Cagayan Valley, Cordillera Administrative Region, Bicol Region at nalalabing bahagi ng Central Luzon at Calabarzon ay makakaranas din ng pabugso-bugsong pag-ulan at thunderstorms.

Samantala, huling namataan si “Dodong” sa layong 305 kilometro kanluran ng Sinait, Ilocos Sur na may lakas ng hanging aabot sa 65 kph malapit sa gitna at pagbugsong aabot sa 80 kph.

Kumikilos ito pa-hilaga hilagang kanluran sa bilis na sampung kilometro bawat oras.

Ayon sa PAGASA, inaasahang lalabas ng Philippine Area of Responsibility o PAR ang bagyo ngayong hapon.

Inanunsiyo ng Malacañang na kanselado ang pagbisita ni Pangulong Ferdinand “Bongbong” Marcos Jr. Sa Luna, Apayao ngayong araw, Hulyo 15.

Ayon kay Presidential Communications Office Sec. Cheloy Garafil, ito’y dahil sa masamang lagay ng panahon dulot ng tropical depression Dodong.

Si PBBM ay nakatakda sanang dumalo sa pagdiriwang ng 36th Cordillera Day.

Subalit nabatid na inirekomenda ng Presidential Security Group (PSG) kay Pangulong Marcos na kanselahin na muna ang biyahe dahil sa masamang panahon.

Sakop ng Cordillera Administrative Region (CAR) ang Abra, Apayao, Benguet, Ifugao, Kalinga, Mountain Province at Baguio City.

Kumpiyansa si Pangulong Ferdinand “Bongbong” Marcos Jr. na magiging communist-insurgency free ang Northern Samar sa pagtatapos ng taon.

Ginawa ni PBBM ang pahayag sa kanyang pagbisita sa 803rd Infantry Brigade sa Camp Juan Ponce matapos makatanggap ng ulat hinggil sa success rate ng militar sa pagpapahina at pagbuwag sa communist fronts sa probinsya.

Pinuri rin ng Pangulo ang pagpupursige ng mga sundalo upang magtagumpay sa kanilang counter-insurgency operations.

Kasabay nito, hinamon ni Pangulong Marcos ang militar na sikaping mahikayat ang mga rebelde na magbalik-loob sa pamahalaan habang nangako rin ito ng buong suporta o tulong mula sa gobyerno.