Gilbert Perdez

Itinanghal ang Pilipinas bilang ‘Emerging Muslim-friendly Destination’ para sa taong 2023 sa ginanap na prestihiyosong Halal in Travel Global Summit 2023.

Ayon kay Tourism Secretary Christina Frasco, ang titulo ay iginawad sa bansa dahil sa naibigay nitong ‘unique needs’ at ‘preferences’ sa mga Muslim travelers.

Sa Halal in Travel Global Summit 2023 ay kinikilala ang mga lugar o destinasyon, organisasyon, kompanya at indibidwal na nagkaroon makabuluhang impact sa Muslim lifestyle travel segment.

Nag-isyu si Pangulong Ferdinand Marcos Jr. ng Executive Order na nag-aamyenda sa komposisyon ng Public-Private Partnership Governing Board o PPPGB.

Ang hakbang ay ginawa ng Presidente upang mapalakas ang private sector participation sa mga usaping may kinalaman sa PPP, kabilang ang mga malalaking proyekto ng pamahalaan.

Batay sa Executive Order No. 30 na nilagdaan ni PBBM nitong Hunyo 2, binanggit na ang PPPGB ay kabibilangan ng Socio-Economic Planning Secretary bilang Chairperson, Secretary of Finance bilang Vice-Chairperson habang magiging miyembro din ang mga kalihim ng mga departamento ng Finance, Budget and Management, Justice, Trade and Industry, at Executive Secretary.

Nakasaad din sa direktiba na magtatalaga ang pangulo ng isang kinatawan mula sa pribadong sektor.

Nagbigay ng paliwanag si DICT Sec. Ivan John Uy kung bakit hindi pa gumagana ang ilang features sa bagong lunsad na eGov super app.

Ayon kay Uy, hindi biro ang 455 na mga ahensya ng gobyerno, 114 state universities and colleges (SUCs),  1,600 local government units at higit 100 GOCCs na kanilang ipapasok sa super app.

Sinabi ni Uy na rasonable na lahat ng ahensyang ito ay maipapasok nilang lahat agad sa super app sa loob lamang ng sampung buwan mula nang simulan nila itong itatag.

Sa ngayon, unti-unti aniyang ginagawa ito o sa kada yugto.

Nasa inisyal na yugto pa lamang aniya sila para magamit ang ibang ahensya na handa na sa kanilang serbisyo.

Inilarawan pa ni Uy ang super app project bilang evolving product at tiniyak naman ng kalihim na patuloy silang magdaragdag  ng iba pang ahensya at features sa super app hanggang sa makumpleto ito sa hinaharap.

Pinangunahan ni Department of Migrant Workers Secretary Susan Ople ang pagpapasara sa isang travel consultancy agency sa Quezon City dahil sa umano’y illegal recruitment.

Ayon kay Ople, ang OVM Visa Assistance and Travel Consultancy na matatagpuan sa Barangay Pasong Tamo ay nag-aalok ng trabaho sa Poland at Malta.

Natuklasan na nanghihingi pa umano ng P460,000 ang OVM sa mga aplikante bilang processing fee.

Ngunit nilinaw ng kalihim na ang ahensya ay wala sa listahan ng mga lisensiyadong recruitment agency.

Binigyang diin pa ni Ople na may zero-tolerance policy ang DMW sa mga illegal recruiters at human traffickers.

Inanunsiyo ng Philippine Space Agency o PhilSA na ilulunsad na ng Pilipinas ang Maya-5 at Maya-6 cube satellites o cubesats ngayong weekend.

Ayon sa PhilSA, ang cubesats ay pagkakawalan sa International Space Station sa pamamagitan ng SpaceX Falcon 9 bandang 12:34 a.m. bukas, Hunyo 4.

Nabatid na ang dalawang cubesats ay binuo sa ilalim ng Space Technology and Applications Mastery, Innovation & Advancement o STAMINA4Space Program sa tulong ng Department of Science and Technology, UP Diliman, PhilSA, at Kyushu Institute of Technology of Japan.

Habang naglalakbay sa kalawakan ang Maya-5 at 6 ay kukunan nila ng larawan ang mundo at may on-board image processor ang mga ito na magagamit sa pag-classify ng mga litrato.

Nakakatanggap din ng mensahe o radio packets ang dalawang cubesats dahil sa nakakabit dito na amateur radio communication system.

Kanselado ang ilang flights ngayong araw, Mayo 27, dahil sa masamang panahon.

Ayon sa flight advisory no. 1 ng MIAA o Manila International Airport Authority, hindi tuloy ang biyahe ng Philippine Airlines PR 437/438 nagoya-manila-nagoya dulot ng unfavorable weather condition.

Ang kanselasyon ng flight ay ginawa bilang pag-iingat sa mga pasahero at crew ng eroplano.

Sa hiwalay namang abiso, nabatid na kanselado rin ang flights cebgo o dg 6881/6882 patungo at pabalik ng surigao at maynila.

Pinapayuhan naman ang mga pasahero na makipag-ugnayan sa kanilang airline companies para sa rebooking at refund ng kanilang FLIGHT.

Nananatili ang lakas ng super typhoon Betty habang kumikilos pa-kanluran hilagang kanluran.

Ayon sa 10:00 a.m. Weather advisory ng PAGASA, huling namataan ang sentro ng bagyo sa layong 1,170 km silangan ng gitnang Luzon.

Taglay nito ang lakas ng hanging aabot sa 195 km kada oras malapit sa gitna at pagbugso na papalo sa 240 km kada oras.

Kumikilos ang Bagyong Betty pa-kanluran hilagang kanluran sa bilis na 30 km kada oras.

Nakataas ang tropical cyclone warning signal no.1 sa  Eastern portion ng Cagayan (Santa Ana, Gonzaga, lal-lo, Gattaran, Baggao, Peñablanca, Santa Teresita, Buguey) kabilang ang Babuyan at Camiguin Islands at Eastern Portion ng Isabela (Maconacon, Divilacan, Dinapigue, Palanan, San Mariano, Ilagan City, Tumauini, San Pablo, Cabagan).

BUONG pagmamalaking ibinahagi ni Pangulong Ferdinand Marcos Jr. ng kahalagahan ng papel ng mga mga kabataang Pinoy sa mga hakbang sa climate change at disaster resiliency.

Sa kanyang intervention sa ginanap na 42nd Association of Southeast Asian Nations (ASEAN) Summits and Related Summits sa Labuan Bajo, Indonesia, sinabi ng Pangulo na pinangungunahan ng Filipino youth ang mga adbokasiya para maibsan ang epekto ng climate change sa Pilipinas.

Sinabi ni PBBM na mainam aniyang maging halimbawa ito sa ibang mga bansa sa ASEAN.

Kasama sa mga binanggit ng Presidente ang deklarasyon ng tauhang ASEAN Youth in Climate Action and Disaster Resilience Day na ginaganap tuwing November 25 na layong magpalaganap ng impormasyon at hikayatin ang mga kabataan na gumawa ng hakbang laban sa pabago-bagong klima.

Ayon sa Pangulo, ang kinabukasan ng rehiyon ay nakasalalay sa abilidad nitong i-develop ang mga nakababatang populasyon.

Aniya, maisasakatuparan ito kung mabibigyan sila ng sapat nakaalaman para maging handa sa kinabukasan.

Dagdag pa ng Presidente, kailangan ding gumawa ng hakbang ang ASEAN para ihanda ang mga kabataan sa digital at creative economies.

“We must ensure that they are well equipped to not only compete globally, but also to develop expertise, forge linkages, and establish leadership in these fields … strengthening youth people-to-people exchanges to facilitate the free flow of ideas and the transfer of skills is critical. Activities such as the ASEAN Youth Dialogue and the ASEAN Junior Fellowship Program are avenues where the youth can develop their leadership skills and competencies,” pahayag pa ng Pangulo.

Pinangunahan ng Climate Change Commission (CCC) ang isang climate mitigating road show kung saan tampok dito ang kauna-unahang International Climate Partnership Forum on Reforestation, Waste Management and Carbon Trading sa Clark, Pampanga.

Maliban dito, nagkaroon din ng tree-planting activity kasama ang mga estudyante ng University of Nueva Caceres Bataan at ilang kinatawan ng PTT Philippines sa pangunguna ni Sukanya Seriyothin at ilang miyembro ng Philippine National Police Special Action Force (PNP-SAF), Philippine Coast Guard, ilang grupo, local government officials at private individuals sa Sitio Binutas, Barangay Tala, Orani, Bataan.

Bilang suporta sa road show, nangako si Direction Investment Holding Company (DIHC) Executive Director Zulfiquar Ghadiyali ng Abu Dhabi na tutulungan nito ang mga magsasaka at mangingisdang Pilipino upang tumaas ang kanilang produksiyon o farm inputs sa pamamagitan ng modernong teknolohiya na magpapalaki rin ng kanilang kita.

Ayon naman kay CCC Commissioner Albert Dela Cruz Sr., gagamitin ng DIHC ang nasa 3,000 ektaryang sakahan sa Agusan del Sur at Nueva Ecija bilang tulong ng kompanya sa mga lokal na magsasaka.

Sinabi pa ni Dela Cruz na pinuri rin ni Ghadiyali ang isinusulong na food security at self-sufficiency ng administrasyon ni Pang. Ferdinand Marcos Jr. (Gilbert Perdez)

Mas pinaigting pa ng Climate Change Commission PH (CCC) ang pagpapatupad ng mga istratehiya na layong maibsan ang greenhouse gas (GHG) emissions at iba pang human drivers ng global warming sa pamamagitan ng pagbabawas ng karbon.

Ito’y matapos lumagda sa isang Memorandum of Agreement (MOA) ang CCC at National Power Corporation (NPC) na nagpapahiwatig ng commitment ng komisyon na maisulong ang Nationally Determined Contribution (NDC) ng 75 percent GHG emissions reduction ng Pilipinas at maiwasan ito hanggang 2030.

Ang MOA signing ay pinangunahan kamakailan nina CCC Vice Chairperson at Executive Director (VCED) Robert Borje at NPC President Fernando Martin Roxas.

Bahagi rin ito ng itinataguyod ng gobyerno na Carbon Neutrality Program (CNP), isang climate change mitigation strategy sa pamamagitan ng nature-based solutions.

Sa ilalim ng CCC-NPC partnership, isinusulong din ang rehabilitasyon ng mga nakakalbong kagubatan, kabilang ang streambank na natukoy ng NPC na nasa Caliraya-Lumot Watershed Forest Reserve (CLWFR), sa pamamagitan ng reforestation ng 25 ektaryang lupain sa Paete, Laguna.

Bukod dito, isinusulong din ang proteksiyon at paglalatag ng reforestation project sa CLWFR at pagsuporta sa iba pang climate change-related initiatives ng CCC.

“We hope that this MOA can be a model agreement that may be adopted by local government units, NGAs, and private sector. This approach has clear and measurable targets, and will help steer all stakeholders towards concrete results through smaller carbon footprints of organizations, agencies, and communities,” pahayag ni Borje.