Gilbert Perdez

IPINAGMALAKI ng Bureau of Plant Industry (BPI) na puspusan na ang paghahanda ng pamahalaan ang mga lugar na posibleng lubhang tatamaan ng El Nino.
Sinabi sa Laging Handa public briefing ni BPI spokesperson Jose Diego Roxas na namemeligrong malanta ang mga pananim kaya’t nakaposisyon na ang buffer stock na mga buto.
Ayon kay Roxas, magsisilbi itong production support at gagamitin sa replanting kung kinakailangan sakaling tumama ang matinding tagtuyot.

Bagamat nakapaglabas na aniya ng advisory ukol sa El Niño Watch, sinabi ni Roxas na wala pa namang report kung anu-anong mga lugar ang mga maaapektuhan.
Aniya, normal pa naman ang rehiyon ng Mindanao at iba pang mabababang bahagi ng bansa na nakararanas ng normal na mga pag-ulan.
Gayunman, ibinabala ni Roxas na may mga lugar nang nakakaranas ng kakulangan ng suplay ng tubig, partikular sa hilagang dako ng bansa, kabilang na rito ang Luzon at ilang parte ng Kabisayaan.

Suportado ng Catholic Bishops’ Conference of the Philippines o CBCP ang panawagan ng iba’t ibang grupo na magdeklara ng climate emergency sa bansa.

Ang pahayag ay ginawa ni Fr. Antonio Labiao, executive secretary ng Caritas Philippines, kasabay ng selebrasyon ng Earth Day ngayong araw, Abril 22.

Hinimok din ni Labiao ang pamahalaan na gumawa ng aksiyon para matugunan ang mga epekto ng pabago-bagong klima. Maliban sa Caritas Philippines, nagpahayag din ng suporta sa panawagang ito ang CBCP-Episcopal Commission on Health Care, CBCP-Office on Women, Council of the Laity of the Philippines, Catholic schools at iba pa.

Matatandaang sumugod sa Mendiola Peace Arch ang iba’t ibang climate advocates noong Huwebes para ipanawagan kay Pang. Ferdinand Marcos Jr. na magdeklara ng climate emergency sa buong kapuluan.

Ipinagmalaki ng Department of Budget and Management (DBM) na naglaan ito ng mahigit P1.4 bilyong pondo para sa strategic programs ng Department of Labor and Employment (DOLE) ngayong taon na magbibigay ng trabaho sa mga kabataang Pilipino.

Ginawa ang hakbang kasunod na rin ng direktiba ni Pang. Ferdinand Marcos Jr. na mamuhunan sa labor workforce.

Ayon kay Budget Secretary Amenah Pangandaman, kasama sa mga bubuhusan ng pondo ang Government Internship Program, Special Program for Employment of Students, at Job Search Assistance na tulong na rin ng administrasyon para maihanda ang mga Filipino youth sa aktuwal na trabaho.

“In our goal of attaining progress and prosperity, we believe that having a healthy, productive, and equipped workforce will play a great role. That’s why President Ferdinand Marcos Jr. directed us to give prime importance in investing in our labor workforce, especially the youth,” ani PangaNdaman.

Sa ilalim ng 2023 National Budget, aabot sa P708 milyon ang inilalaang pondo ng DOLE para sa Government Internship Program, P108 milyon para sa Job Search Assistance program, at P769 milyon naman sa Employment Facilitation Program, kabilang ang P585 milyon para sa Special Program for Employment of Students.

Naka-angkla sa programa ang tatlong six-month internship opportunities para sa mga deserving high school, technical-vocational, at college graduates na gustong magtrabaho sa gobyerno.

Tinatayang 12,000 ang target beneficiaries ng pamahalaan.

Nagpaabot ng mainit na pagbati si Pang. Ferdinand Marcos Jr. kay Pinoy boxer Marlon Tapales.

Ito’y matapos magtagumpay si Tapales sa kanyang pinakahuling laban sa Texas, USA.

Ayon kay PBBM, ipinagmamalaki niya ang naging panalo ni Tapales makaraang masungkit ang unified super bantamweight crowns.

Bukod sa pagbati, labis din ang pasasalamat ni Pang. Marcos kay Tapales dahil sa pagiging inspirasyon aniya ng kampeon sa mga kapwa atletang Pilipino.

Matatandaang naisukbit ni Tapales ang WBA at IBF titles nang talunin nito sa pamamagitan ng split decision ang dating kampeon na si Murodjon Akhmadaliev.

Ipinagmalaki ni Pangulong Ferdinand Marcos Jr. ang pinakamataas na dividendo ng Pag-Ibig Fund mula nang tumama ang Covid-19 pandemic.

Ito’y makaraang umabot sa 6.35 percent ang Regular Savings dividend rate nito noong 2022 at lumobo sa 7.03 percent per annum ang Modified Pag-Ibig 2 (MP2) Savings.

Ang dividend rates sa savings ng mga miyembro ng ahensya ang tampok sa Pag-Ibig Fund Chairman’s Report for 2022, kung saan nagbigay ng mensahe si Pangulong Marcos, sa harap ng members, partners at stakeholders.

Ayon kay PBBM, ipinagmamalaki niya ang matagumpay na pagbibigay ng affordable shelter financing ng Pag-ibig na itinatag noong panunungkulan ng kanyang ama na si yumaong Pangulong Ferdinand Marcos Sr.

Kung matatandaan, naitala ng Pag-Ibig Fund ang best performing year nito noong 2022 matapos pumalo sa record high ang net income nito na P44.50 bilyon na mas mataas ng 28% mula sa P34.69 bilyon noong 2021.

Nagsagawa ng orientation ang Climate Change Commission PH (CCC) at Department of Budget and Management (DBM) para sa state universities and colleges (SUCs) na may kaugnayan sa climate change expenditure tagging (CCET).

Kasabay nito, hinikayat ng CCC at DBM ang mga SUCs na taasan ang kanilang climate budget proposals para sa FY 2024.

Ayon sa dalawang ahensya, mahalagang nakikita sa CCET ang mga ililinyang programa, proyekto at aktibidad ng SUCs bilang suporta sa isinusulong nitong mga hakbang at polisiya na may kinalaman sa paglaban sa pabago-bagong klima.

“We call on SUCs to increase and prioritize their budgets for climate research and development to produce the best available science and technologies locally,” wika ni CCC Commissioner Albert Dela Cruz Sr.

Halos limang daang kinatawan mula sa higit isang daang SUCs ang dumalo sa CCC-DBM-led orientation ukol sa CCET.

Samantala, sinabi naman ni CCC Vice Chair at Executive Director Robert E.A. Borje na kumpiyansa silang mapapataas nila ang pondo para sa climate-related activities sa pamamagitan ng mga isinasagawa nilang orientation sessions.

“SUCs are among our key partners in addressing climate change. They provide us site-specific climate information that enable local government units to determine fit-for-purpose programs and activities to address climate change and its impacts,” ani Borje.