Gilbert Perdez

Ipinagmalaki ng Commission on Elections (COMELEC) na kumpleto na ang final version ng mga programang gagamitin sa Automated Election System (AES) para sa halalan sa susunod na taon.

Sinaksihan mismo ni COMELEC commissioner Marlon Casquejo ang technical process na isinagawa ng testing firm na Pro V&V, kasama ang ilang opisyal ng Department of Science and Technology (DOST) at Department of Information and Communications Technology (DICT).

Ang nasabing proseso ay may kinalaman sa pagbuo ng AES na kinabibilangan ng Election Management System (EMS), Vote Counting Machines (VCMs), at Consolidated Canvassing System.

PALAISIPAN ngayon sa mga awtoridad kung sino ang walang pusong ina na nag-iwan ng isang patay na sanggol sa loob ng St. Anne Parish Church sa Molo, Iloilo City.

Ayon sa guwardiya ng simbahan, nakita niya ang isang paper bag malapit sa pintuan at nang kanyang tingnan ay laking gulat niya nang makita ang sanggol sa loob nito na tinatayang pito hanggang walong buwan lamang.

Agad namang humingi ng tulong sa pulisya ang sekyu bago isinugod sa ospital ang sanggol pero idineklara itong dead on arrival ng doktor.

NAKAPAGTALA ang Department of Health o DOH ng 838 na bagong kaso ng COVID-19.

Dahil dito, sumampa na sa higit 2.8 milyon (2,831,807) ang kabuuang bilang ng mga tinamaan ng virus sa Pilipinas.

Base sa case bulletin ng DOH, nakapagtala rin ito ng 1,217 na bagong recoveries kung kaya’t sumirit na sa 2,766,816 ang bilang ng mga gumaling sa impeksiyon.

Sa kasalukuyan, nasa 16,630 naman ang active cases sa bansa.

Samantala, dahil sa pagpanaw ng 156 na COVID-19 patients ay umakyat na sa 48,361 sa death toll sa buong kapuluan.

ISINIWALAT ng Armed Forces of the Philippines (AFP) na itotodo na nila ang kanilang ‘final push’ sa pagpapalakas at pagpapaigting ng kampanya laban sa mga banta sa seguridad ng bansa tulad ng mga komunista at terorista.

Pahayag ni AFP chief of staff Lt. Gen. Andres Centino, pangungunahan ng elite force ng Philippine Army ang First Scout Ranger Regiment o FSRR para sa kanilang “last push.”

Layunin ng liderato ni Centino na gawing mas agresibo ang AFP upang tuluyang masugpo ang komunistang grupo sa nalalabing buwan ng pamumuno ni Pangulong Rodrigo Duterte.

TINUTULAN ng isang senador ang dagdag na bayarin sa passport renewal na ipinataw sa mga overseas Filipino workers o OFWs at iba pang mga Pilipino sa ibayong dagat.

Ayon kay Sen. Kiko Pangilinan, ang desisyon ng mga embahada at konsulado ukol sa paggamit ng mga outsourcing companies para sa pagre-renew ng pasaporte ay dagdag-gastos sa mga nahihirapang Pinoy ngayong panahon ng pandemya.

Kabilang sa mga apektado nito ay ang mga OFWs at iba pang mga kababayan natin sa Gitnang Silangan, Europa, Asya, at Estados Unidos.