Author

Gilbert Perdez

DWIZ 882

Libing ni Reynaldo ‘Kulot’ de Guzman itinakda sa Miyerkules

Hindi matutuloy bukas ang libing ng binatilyong si Reynaldo ‘Kulot’ de Guzman.

Sa panayam ng DWIZ patrol kay Edmund de Guzman, kapatid ni Reynaldo, wala pa ang death certificate ng biktima kaya’t nagpasya ang kanilang pamilya na huwag ituloy bukas ang libing.

Sinabi ni Edmund na sa halip ay Miyerkules na bandang ala-1:00 ng hapon ihahatid sa huling hantungan ang kanyang kapatid.

Nanawagan naman ang pamilya De Guzman sa pamahalaan na gawin ang lahat ng kanilang makakaya upang makamit nila ang hustisya.

Maliban dito, nanawagan din si Edmund sa mga salarin na sumuko na at nawa’y usigin daw sila ng kanilang konsensya.

Magugunitang natagpuang patay si De Guzman sa isang creek sa Nueva Ecija na tadtad ng saksak sa katawan.

—-

September 11, 2017 0 comment

NATIONAL NEWS

2 senador nagpatutsadahan sa Twitter sa isyu ng tattoo

written by Gilbert Perdez

Bagama’t tapos na ang pagdinig sa Senado, nagpatutsadahan sa Twitter sina Senators Antonio Trillanes at JV Ejercito kaugnay sa isyu ng tattoo.

Ito’y matapos mag-post ng kanyang larawan si Ejercito na ipinapakita ang kanyang tattoo sa braso na may caption na “May tattoo po ako pero ‘di po ako Magdalo, Magdiwang po ako!”

Ang Magdalo ay ang grupong kinabibilangan ni Trillanes na dating sundalo.

Magugunitang inakusahan ni Trillanes si Davao City Vice Mayor Paolo Duterte na may tattoo sa likod na sinasabing magpapatunay na miyembro ito ng international triad.

Sinagot naman ni Trillanes ang post ni Ejercito sa kanyang Twitter account kung saan iginiit niyang hindi siya interesado sa tattoo ng kanyang kapwa senador.

AR / DWIZ 882

September 9, 2017 0 comment

ENTERTAINMENT

Ellen Adarna at John Lloyd Cruz magkasamang nag-bakasyon sa Cebu

written by Gilbert Perdez

Wala mang tuwirang pag-amin sina Ellen Adarna at John Lloyd Cruz, tila lalong lumalakas ang hinala na ‘sila’ na at nagde-‘date’ na ang dalawa.

Ito’y matapos kumalat sa social media ang kanilang larawan habang nag-e-enjoy sa kanilang bakasyon sa Cebu.

Sa Instagram, ibinahagi ni Adarna sa kanyang fans ang isang larawan kasama si Cruz na kitang-kita na sweet daw sa isa’t isa sa isang beach sa Bantayan Island.

Samantala, sa ilang clips, makikita na pabirong hinaharana ni Cruz si Adarna sa pamamagitan ng pagkanta ng awiting “Kailan” ng Smokey Mountain at “High” ng Lighthouse Family.

Gayunman, nabatid na kasama naman daw pala nina Ellen at John Lloyd ang kanilang kaibigan na si Kim Araneta sa naturang bakasyon.

AR / DWIZ 882

September 9, 2017 0 comment

SPORTS

San Beda wagi kontra Mapua sa NCAA

written by Gilbert Perdez

Inilampaso ng San Beda ang Mapua University sa score na 88-70 kaya’t naitala nila ang kanilang ika-siyam na sunod na panalo sa 93rd Season ng NCAA Men’s Basketball Tournament.

Nagwagi ang Red Lions sa laban kahit wala sina Head Coach Boyet Fernandez, main man Robert Bolick at rising star Clint Doliguez.

Magugunitang pinatawan ng suspensiyon ang tatlo matapos na mauwi sa gulo ang laro nila kontra College of St. Benilde noong Martes.

Ngunit kahit wala silang coach, kulang naman din sa tao ang Mapua kaya’t hindi ito nakaporma sa kanilang bakbakan na ginanap sa Filoil Flying V Centre.

AR / DWIZ 882

September 9, 2017 0 comment

INTERNATIONAL NEWS

Menor de edad sa Thailand ginahasa ng di bababa sa 40 lalaki

written by Gilbert Perdez

Iniimbestihan na ng pulisya sa Thailand ang ibinunyag ng isang 14-anyos na dalagita na nabiktima umano siya ng gang rape.

Ayon kay Deputy Governor Eggarat Leesen, noon pang Marso nagsumbong sa mga awtoridad ang biktimang si Koh Raed.

Sinasabing maraming beses na ginahasa ang dalagita sa pagitan ng Mayo at Disyembre ng nakaraang taon.

Isiniwalat naman ni Police Major General Boonthawee Torraksa na hindi bababa sa 40 lalaki ang isinangkot ng biktima sa serye ng panghahalay sa kanya.

Bagama’t may tatlong nakasuhan, pansamantalang nakalalaya ang mga ito matapos makapaglagak ng piyansa.

—-

September 9, 2017 0 comment

SPORTS

Winning streak ng Barangay Ginebra buhay pa rin

written by Gilbert Perdez

Buhay pa rin ang winning streak ng Barangay Ginebra.

Ito’y matapos magpakita ng bangis ang Gin Kings sa fourth quarter dahilan upang matalo nila ang Blackwater Elite sa score na 98-81.

Dahil dito, nasungkit ng koponan ang kanilang ika-pitong sunod na panalo sa 2017 Oppo PBA Governors’ Cup sa laro na ginanap sa Mall of Asia Arena.

Sa isa pang laro, matapos mabasag ang losing streak ng Alaska laban sa San Miguel Beermen, nakapagtala ng isa pang panalo ang Aces nang pataubin nila ang GlobalPort Batang Pier sa score na 101-88.

Si Ladontae Henton ang nanguna sa Alaska taglay ang kanyang 36 points, kasama na rito ang 21 rebounds at six assists.

Kumamada rin si Jvee Casio ng 11 markers habang nagdagdag naman ng 12 points si Calvin Abueva na pareho nilang nagawa sa fourth period.

AR / DWIZ 882

September 9, 2017 0 comment

Newer Posts

Older Posts