Gilbert Perdez

Bahagyang gagalaw ang halaga ng mga produktong petrolyo sa unang linggo ng Setyembre.

Ayon sa mga source ng DWIZ mula sa industriya, lalarga ang kakarampot na tapyas-presyo simula sa Martes.

Sinasabing diyes hanggang dalawampung sentimos ang bawas-presyo sa kada litro ng diesel at kerosene habang sampu habang bente sentimos din sa bawat litro ng gasolina.

Namumuro ring mag-rollback ang presyo ng Liquefied Petroleum Gas o LPG na maglalaro sa limampung sentimo hanggang limang piso at limampung sentimo kada tangke.

Isa umano sa mga posibleng dahilan nito ay ang paggalaw sa presyo ng langis sa pandaidigang pamilihan.

Hinimok ng mag-asawang Chiong si Pangulong Rodrigo Duterte na huwag hayaang mapalaya ang mga nahatulan sa paghalay at pagpatay sa kanilang dalawang anak sa Cebu noong 1997.

Ginawa ng mag-asawa ang panawagan makaraang umugong ang posibleng paglaya ni dating Calauan mayor Antonio Sanchez.

Matatandaang noong 1997 ay dinukot, ginahasa at pinatay ang magkapatid na Marijoy at Jacqueline.

Karamihan sa pitong akusado sa krimen ay mga miyembro ng mga prominenteng pamilya sa Cebu City kabilang ang isang Francisco Juan “Paco” Larañaga na sinasabing apo sa tuhod ni Sergio Osmeña Sr.

Patay ang anim katao matapos magbanggaan ang isang trak at jeep sa Sumulong Highway, Antipolo City.

Maliban sa mga nasawi, dinala rin sa ospital ang apat na sugatan na wala pang pagkakakilanlan.

Sa inisyal na imbestigasyon, nawalan ng preno ang 10-wheeler truck hanggang sa makaladkad nito ang isang jeep bago bumangga sa poste.

Iniimbestigahan pa rin ng mga awtoridad ang insidente.

Nasawi ang isang lalaki makaraang pagbabarilin ng apat na armadong lalaki sa Barangay Sta. Magdalena, San Pablo, Laguna.

Kinilala ang biktima na si Gener Amante, 45 taong gulang, at pamangkin ng dating alkalde ng San Pablo na si Vicente Amante.

Sa imbestigasyon, nakatambay lamang sa labas ng kanilang bahay ang biktima nang may humintong SUV at bigla itong pinaulanan ng bala.

Hindi na umabot nang buhay sa ospital si Gener.

Napag-alaman na si Vicente ay nakasama sa “narco-list” ni Pangulong Rodrigo Duterte noong August 2016 pero itinanggi ito ng dating alkalde.

Bagsak sa kulungan ang dalawang construction worker makaraang mahuli sa ikinasang buy-bust operation ng Philippine Drug Enforcement Agency o PDE sa Dahlia Street, Barangay Payatas, Quezon City.

Kinilala ang mga suspek na sina Louie Clutario at Garry Navarro na natimbog nang bentahan umano ng shabu ang isang poseur buyer ng PDEA.

200 gramo ng hinihinalang shabu ang nasabat mula sa dalawang trabahador na tinatayang nagkakahalaga ng 1.3 million pesos.

Ayon kay PDEA-National Capital Region Officer-in-Charge George Paul Alcovindas, sasampahan ang mga suspek ng kasong paglabag sa Comprehensive Dangerous Drugs Act.