Author

Gilbert Perdez

DWIZ 882

2 Chinese nationals arestado ng BIR

Sinampahan ng kasong kriminal ng Bureau of Internal Revenue (BIR) ang dalawang (2) Chinese nationals kaugnay ng mga pekeng tax stamps at cigarette labels na nakumpiska sa isinagawang raid ng mga awtoridad sa Villasis, Pangasinan.

Kinilala ang mga respondents na sina Lian Jun Cheng at Cai Xiao Ming na kapwa nahaharap sa kasong paglabag sa National Internal Revenue code.

Ayon kay Police Maj. Fernando Fernandez Jr., hepe ng Villasis police, inabsuwelto naman ng Provincial Prosecutors Office ang mga warehouse workers na sina Bernard Dagpin, Edwin Caga-anan, Gino Amparo, Benjie Terez at Juancho Rey Albestor.

Magugunitang sinalakay ng mga otoridad ang warehouse ng Three W. Carton Trading corp. sa barangay Bacag dahil sa natatanggap nitong sumbong hinggil sa illegal activities sa lugar.

Maliban sa mga pekeng cigarette labels at tax stamps, nasabat din sa operasyon ang isang printing machine na nagkakahalaga ng P300M.

September 8, 2019 0 comment

HEADLINES NATIONAL NEWS

24/7 Assistance desks inilunsad ng BuCor

written by Gilbert Perdez

Naglatag ang Bureau of Corrections (BuCor) ng ‘assistance desks’ para sa mga susuko pang heinous crime convicts.

Ayon kay Melvin Buenafe, Officer-in-Charge ng (BuCor), 24 oras na bukas ang kanilang tanggapan para sa mga ito.

Magugunitang noong miyerkules ay binigyan ng 15 araw na ultimatum ni Pangulong Rodrigo Duterte ang humigit-kumulang 2,000 inmates para sumurender.

Babala ng pangulo, ang hindi makakahabol sa deadline ay mahaharap sa warrantless arrest.

September 8, 2019 0 comment

HEADLINES NATIONAL NEWS

Pagsabog sa Sultan Kudaran inako ng ISIS

written by Gilbert Perdez

Inako ng International terrorist group na Islamic State (ISIS) ang responsibilidad sa pagsabog na naganap sa Sultan Kudarat.

Ayon sa statement ng ISIS, pitong (7) filipino christians ang nasaktan sa nangyaring motorcycle bombing sa isang palengke sa bayan ng Isulan.

Sinasabing iyon ang ika-apat (4) na pambobomba sa lugar sa loob ng 13 buwan.

Wala pang pahayag ang militar hinggil sa statement ng ISIS.

September 8, 2019 0 comment

HEADLINES NATIONAL NEWS

PH Navy ship lumahok sa maritime exercise

written by Gilbert Perdez

Lumahok ang Philippine Navy Patrol ship na BRP Ramon Alcaraz sa maritime exercise kasama ang US navy at iba pang Southeast Asian fleets.

Sinasabing ito ang kauna-unahang pagkakataon na nagsanib-pwersa ang mga naturang bansa sa katulad na military drill.

Magugunitang inorganisa ng American at The Royal Thai navies ang drill na tumagal ng limang (5) araw at nagtapos nitong Biyernes, Setyembre 6.

Ayon kay Capt. Hilarion Cesista, head ng Philippine Contingent, napalakas ng navy ang kanilang maritime operational capability dahil sa nabanggit na military exercise.

September 8, 2019 0 comment

HEADLINES NATIONAL NEWS

Ilang bahagi ng Luzon patuloy na makakaranas ng pag-ulan — PAGASA

written by Gilbert Perdez

Patuloy na magdadala ng pag-ulan sa ilang bahagi ng Luzon ngayong Linggo ang hanging habagat.

Ayon sa PAGASA, makakaranas ng kalat-kalat na pag-ulan at thunderstorms ang Metro Manila, Central Luzon, Ilocos region, Cordillera Administrative region, at Cagayan Valley.

Asahan din ang maulap na kalangitang may manaka-nakang pag-ulan hanggang thunderstorms sa nalalabing bahagi ng bansa.

Samantala, binabantayan naman ng PAGASA ang isang kumpol ng mga ulap sa bandang silangan ng Northern Luzon at isa pang low-pressure area (LPA) malapit naman sa kanluran ng Hilagang Luzon pero hindi ito makakaapekto sa bansa.

Maliban dito, malabo rin umanong manalasa sa Pilipinas ang tropical storm na may international name na “Faxai” na namataan naman sa kanlurang Pasipiko.

September 8, 2019 0 comment

HEADLINES RONDA PROBINSYA

Isang Sharia lawyer patay sa pananambang sa Cotabato City

written by Gilbert Perdez

Patay ang isang Sharia lawyer makaraang tambangan sa Midsayap, Cotabato.

Ayon sa pulisya, nakilala ang biktima na si Khadafy Blao, 43 taong gulang, at residente ng Cotabato City.

Sa imbestigasyon, katatapos lamang ni Blao na magsimba o magsambayang sa isang mosque sa barangay Olandang nang mangyari ang pamamaril.

Bago pa makalabas ng bahay-dasalan ay pinagbabaril na ng hindi pa nakikilalang salarin ang biktima na isang aktibong muslim leader sa probinsiya.

Blangko pa ang pamilya ng biktima, gayundin ang pulisya sa motibo ng krimen.

September 8, 2019 0 comment

HEADLINES RONDA PROBINSYA

Lolo na nakalaya sa ilalim ng GCTA sumuko sa Iloilo

written by Gilbert Perdez

Isang 60 years old na murder convict ang sumuko sa mga otoridad sa pamamagitan ng kanyang kaibigan sa Philippine Air Force (PAF) sa lalawigan ng Iloilo.

Sinasabing si alyas ‘Mulong” ay nakalaya mula sa Sablayan Prison and Penal Colony sa Mindoro Occidental mahigit isang linggo bago niya nabalitaan na pinasusuko silang muli ni Pangulong Rodrigo Duterte.

Ayon kay Mulong, nakalulungkot na babalik na naman siya ng kulungan matapos magdusa sa piitan ng 30 years.

Ayon naman kay Lt. Col. Dennis Alcarde, Commanding Officer ng PAF Tactical Operations Group sa Region 6, kinailangan pa nilang bumiyahe ng limang (5) oras mula Tibiao, Antique patungong bayan ng Dingle sa iloilo para sa pagsurender ni alyas Mulong.

September 8, 2019 0 comment

RONDA PROBINSYA

Sanitary landfill sa Bulacan, sinita ng isang environmental group

written by Gilbert Perdez

69693348_479736212871087_975862457081790464_n

Nanawagan sa Senado at sa Department of Environment and Natural Resources (DENR) ang isang environmental group na imbestigahan ang isang sanitary landfill sa Norzagaray, Bulacan.

Tinukoy ng Alliance for Consumer and Protection of Environment (ACAPE) ang Wacuman Sanitary Landfill na sinasabing banta sa kalusugan ng mga residente.

Ayon kay ACAPE President Jun Braga, lumalabag umano sa national at local environmental laws ang Wacuman.

Kaugnay nito, sumulat na ang ACAPE kina Sen. Cynthia Villar, chairperson ng Senate Committee on Environment and Natural Resources; Sen. Bong Go, chairperson ng Senate Committee on Health; at DENR Sec. Roy Cimatu, para tugunan ang usapin.

Giit ng grupo, dapat siyasatin ang umano’y mga paglabag nito dahil maliban sa hindi magandang dulot sa kalikasan ay nakasasama din ito sa komunidad.

Binigyang diin ng ACAPE ang Wacuman ay hindi nakapag-apply ng permits to operate mula sa LGUs ng San Jose Del Monte (SJDM) at Norzaragay habang nilalabag din umano nito ang Rule 14, Sec. 1 ng Republic Act 2002 (Philippine Ecological Solid Waste Management Act of 2000) na nagsasabing ang lokasyon ng isang landfill ay dapat nakatutugon sa overall land use plan ng LGU.

Maliban dito, isiniwalat din ng grupo na nagdaragdag ng dumi sa San Jose del Monte Tiver ang landfill at nakababahala ito dahil sinasabing ang waterways ng SJDM na Kipungkok, Sto. Cristo, at Sta. Maria River systems ay konektado sa Marilao River at direktang dumadaloy naman patungong Manila Bay.

September 5, 2019 0 comment

HEADLINES NATIONAL NEWS RONDA PROBINSYA

Mahigit 100 pamilya inilikas matapos sumiklab ang putukan sa pagitan ng militar at NPA sa Negros Occidental

written by Gilbert Perdez

Mahigit 100 pamilya ang agad na inilikas matapos sumiklab ang putukan sa pagitan ng militar at mga hinihinalang miyembro ng New People’s Army o NPA sa lungsod ng Escalante, Negros Occidental.

Maliban sa relief assistance mula sa local government unit, isinalang din sa medical check-up ang mga evacuees na ngayo’y nagsisiksikan sa isang elementary school sa Barangay Paitan.

Paliwanag ni Capt. Rowell Dairocas ng civic military operations ng 79th infantry battalion, nakatanggap ng sumbong ang mga sundalo hinggil sa ginagawa umanong recruitment ng NPA sa kanilang lugar kaya’t nirespondehan nila ito at dito na naganap ang engkwentro.

Tinutugis naman ngayon ng mga sundalo ang mga rebelde na posibleng nagbalikan sa bundok matapos ang nasabing bakbakan.

September 1, 2019 0 comment

HEADLINES NATIONAL NEWS RONDA PROBINSYA

Ilang lugar sa Luzon niragasa ng baha

written by Gilbert Perdez

Rumagasa ang baha sa ilang parte ng Ilocos Norte makaraan ang walang tigil na pa-ulan sa lalawigan simula nitong Biyernes.

Pinaka-apektado umano ang Barangay 14 sa bayan ng Paoay kung saan pinasok pa ng baha ang ilang bahay.

Sa taas naman ng tubig-baha, nagmistulang swimming pool ang mga bahay dahil pati garahe at kwarto ay inabot ng tubig.

Naperhuwisyo rin ang ilang rider matapos tumirik ang kanilang motorsiklo.

Pahayag ng ilang opisyal ng bayan, catch basin ang Paoay kaya malalim ang tubig-baha sa kanilang lugar at nakadagdag pa sa baha ang nasirang dike sa kalapit na barangay.

September 1, 2019 0 comment

Newer Posts

Older Posts