Tinutugis ngayon ng mga awtoridad ang 1 presong nakatakas mula sa Laong sub-provincial jail sa Northern Samar.
Ayon sa Police Regional Office 8, nakilala ang takas na bilanggo na si Antonio Gonna na nakulong noong Pebrero 22 dahil sa kasong murder.
Sinasabing nagtutulungan ngayon ang joint tracker team ng Laoang municipal police station at Laoang sub-provincial jail upang agad na maibalik sa piitan si Gonna.
Inaalam na ng awtoridad kung paano nakatakas ang naturang preso.
3 ang sugatan habang bumagal ang daloy ng trapiko makaraang magkarambola ang 3 sasakyan sa kahabaan ng North Luzon Expressway (NLEX) sa bahagi ng Bocaue Bulacan.
Sa imbestigasyon ng traffic sector, ang aksidente ay kinasasangkutan ng isang closed van, isa pang van at suv kung saan naipit pa ang driver na si Peter Valencia.
Natagalan ang pag-rescue sa kanya dahil sa mabagal na takbo ng mga sasakyan sa NLEX Bocaue.
Pahayag ni Valencia, nawalan siya ng kontrol sa minamaneho niyang closed van makaraang pumalya ang preno nito.
Sugatan din ang 2 niyang pahinante habang suwerteng walang nasugatan sa mga pasahero ng dalawa pang sasakyan.
60 pamilya ang nawalan ng tirahan makaraang sumiklab ang sunog sa Barangay Old Capitol Site, Quezon City.
Sinasabing nagsimula ang sunog bandang 4 a.m. ng madaling-araw sa Matiwasay Extension.
Ayon sa Bureau of Fire Protection (BFP), mabilis na kumalat ang apoy dahil pawang gawa sa light materials ang mga bahay habang masikip din ang lugar kaya nahirapan ang mga bumbero na apulahin ang apoy.
Tinatayang 30 bahay ang tinupok ng sunog na umabot sa pangalawang alarma.
Inaalam pa ang pinagmulan ng sunog, gayundin ang halaga ng mga napinsalang ari-arian.
5 magkakamag-anak at 2 crew members ang nasagip ng mga awtoridad makaraang tumaob ang isang bangka sa karagatang sakop ng Puerto Princesa, Palawan.
Ayon sa Philippine Coast Guard (PCG), nagsasagawa ng island-hopping tour ang mga biktima sa Honda Bay nang mangyari ang trahedya.
Sinasabing hinampas ng malalakas na alon ang “mart grace 1″ na dulot ng bagyong marilyn dahilan upang tumaob ang nabanggit na bangka.
Agad namang nailigtas ng mga tauhan ng PCG ang mga pasahero ng bangka, kabilang ang isang bata, at maging ang mga crew nito.
Dapat patawan ng sanction ang mga crew ng chinese ship na bumangga sa isang filipino fishing boat sa Recto Bank.
Ito ang inihirit ni Defense secretary Delfin Lorenzana sa kabila nang paghingi ng paumanhin ng may-ari ng barko.
Giit ni Lorenzana, kailangang gamitin ng pamahalaan ng Pilipinas ang lahat ng mga maaaring legal at diplomatikong remedyo laban sa chinese government upang ma-obliga itong patawan ng kaukulang parusa o sanction ang crew ng bangka ng mga tsino.
Dagdag pa ng kalihim, hindi makatao ang ginawang pag-abandona ng mga chinese sa 22 mangingisdang pinoy na lulan ng F.B. Gem-Ver nang kanila itong banggain at paglabag din aniya ito sa mga pandaigdigang batas at kasunduan.
Hindi sisingilin ng buwis sa loob ng 15 taon ang mga negosyanteng bibili ng lupa at magpapatayo ng malalaking gusali sa Escolta na matatagpuan sa Binondo, Maynila.
Ito ang tiniyak ni Manila City Mayor Isko Moreno kasabay nang panawagan sa mga investors na tulungan ang lokal na pamahalaan na buhayin ang dating commercial center.
Magugunitang nagsilbing pangunahing distritong pangkomersiyal ang Escolta hanggang sa tumamlay ito noong dekada 60 kung saan lumipat ang sentro ng negosyo sa Makati.
Gayunman, nilinaw ni Moreno na maaari lamang humirit ng tax exemption ang mga negosyante na magtatayo ng gusali na mayroong 20 palapag habang ang 70% ng mga empleyado nito ay dapat mga residente ng Maynila.
Taliwas sa ipinagmamalaki ng ilang local government units, binigyang diin ng Department of the Interior and Local Government (DILG) na wala pa itong anumang LGU na idineklarang fully compliant o 100% nakasunod sa direktiba ni Pangulong Rodrigo Duterte kaugnay ng clearing operations.
Ang pahayag ay ginawa ni DILG spokesperson undersecretary Jonathan Malaya matapos mapaulat na 6 na lungsod na sa Metro Manila ang nakatugon sa 60 araw na deadline ng Pangulo.
Paglilinaw ni malaya, ang final assessment ay saka pa lamang ilalabas ng kanilang tanggapan pagkatapos ng ultimatum ng Presidente sa Setyembre 29.
Hindi lamang aniya tungkol sa pagsasagawa ng road clearing operations ang nakasaad sa kautusan ng Pangulong Duterte at sa DILG memorandum circular sapagkat saklaw din nito ang pagbabawal sa illegal construction, paghahanda ng road inventories, displacement strategies at rehabilitasyon sa mga binawing public roads.
Muling nilinaw ng Malacañang na walang VIP treatment na nararanasan ang mga high-profile convicts na inilipat sa marines’ barracks sa Taguig City mula New Bilibid Prison.
Ayon kay Palace Spokesperson Salvador Panelo, nasa pamamahala pa rin ng Bureau of Corrections o BuCor ang nabanggit na detention facility at walang kakaibang trato para mga preso.
Giit ni Panelo, seguridad ang pangunahing tinitingnan kaya inilipat ang mga inmates.
Magugunitang inilipat mula bilibid patungong Taguig ang mga drug convicts, kabilang ang drug lord na si Peter Co.
Nakatanggap ng suporta sa Kongreso ang panukalang bigyan ng emergency powers si Pangulong Rodrigo Duterte para maresolba ang lumalalang trapik sa Metro Manila.
Ayon kina Majority Leader Martin Romualdez at Batangas Rep. Raneo Abu, ini-endorso nila ang hirit ni Transportation Secretary Arthur Tugade na pagkalooban ng special traffic-related authority ang presidente.
Para naman kay Romualdez, maituturing nang national emergency ang traffic congestion na nararanasan sa kalakhang Maynila na lubhang nakakaapekto sa ekonomiya at sa mamamayan.
Iimbestigahan ng Philippine National Police (PNP) ang napaulat na may kinalaman ang isang vigilante group sa serye ng mga pamamaslang sa Negros Oriental.
Ayon kay PNP Chief Gen. Oscar Albayalde, may mga natatanggap silang report na may kinalaman ang Kawsa Guilhungan Batok Komunista o KAGUBAK sa pagpatay sa ilang mga tagasuporta ng mga rebeldeng komunista.
Paliwanag ni Albayalde, ito ang unang pagkakataon na narinig niya ang tungkol sa KAGUBAK kaya’t hihingi siya ng mga dagdag pang impormasyon muna kina Central Visayas Police Director Brig. Gen. Debold Sinas at Negros Oriental Police Director Col. Rizalito Gapas tungkol sa naturang grupo.
Matatandaang kapwa nanawagan sa PNP ang mga senador na sina Ronald “bato” Dela Rosa at Risa Hontiveros na imbestigahan ang naturang vigilante group.