Gilbert Perdez

Nanawagan ang lokal na pamahalaan ng Puerto Princesa City sa publiko na mag-ingat at protektahan ang sarili mula sa haze na dulot ng mga nasusunog na kagubatan sa Indonesia.

Ang babala ay inilabas sa pamamagitan ng air quality advisory kasunod na rin ng pinakahuling sample na nakuha ng Department of Environment and Natural Resources (DENR) ukol sa kalidad ng hangin sa lungsod.

Dahil dito, iminungkahi ni Atty. Carlo Gomez ng Puerto Princesa City Environment and Natural Resources office ang pagsusuot ng mga face mask o eye goggles upang maproteksiyunan nila ang kanilang mga sarili laban sa polusyon na makukuha sa hangin.

Pinayuhan din ng mga otoridad ang mga residente na iwasan munang mag-jogging at tumakbo sa labas dahil posibleng malanghap nila at pumasok sa kanilang baga ang mga pollutant.

Nagbabala sa publiko ang Archdiocese of Antipolo laban sa mga pekeng pari sa lungsod.

Ayon kay Antipolo Bishop Francisco De Leon, nakatanggap sila ng impormasyon na may mga nagkukunwaring pari at nanghihingi ng pera at katunayan ay marami na umanong nabiktimang deboto.

Sinasabing nanghihingi ng pera o gift card ang mga huwad na pari pagkatapos ng ginagawa nitong house blessing.

Dahil dito, nanawagan si De Leon sa mga parishioner na agad na mag-report sa mga otoridad o sa kanilang tanggapan sakaling mabiktima sila ng mga pekeng pari.

Inaasahang magpapatupad ng malakihang oil price hike ang mga kompanya ng langis simula sa Martes, Setyembre 24.

Ayon sa mga source ng DWIZ mula sa industriya, tinatayang 2.40 hanggang 2.60 ang dagdag-presyo sa kada litro ng gasolina, 1.70 hanggang 1.80 sa kada litro ng diesel, at 1.80 hanggang 1.90 sa bawat litro naman ng kerosene.

Sinasabing ang pagsipa ng presyo ng petrolyo sa pandaigdigang merkado ay bunsod ng pambobomba sa 2 oil facilities sa Saudi Arabia.

Kumpiyansa naman si Energy Secretary Alfonso Cusi na babalik din sa normal ang suplay ng Saudi sa mga susunod na araw kaya’t hindi na nila pakikiusapan ang mga kompanya ng langis na utay-utayin ang dagdag-presyo ng kanilang mga produkto.

Niyanig ng magnitude 4.4 na lindol ang Surigao Del Sur.

Ayon sa PHIVOLCS, tumama ito sa layong 46 na kilometro sa timog silangan ng bayan ng Cagwait.

Sinasabing ‘tectonic’ ang pinagmulan ng pagyanig na may lalim na 15 kilometro.

Wala namang napinsalang istruktura o nasaktan habang wala ring inaasahang artershocks sa naturang lindol.

Inihirit ng isang grupo sa Korte Suprema na payagan ang pinay na si Mary Jane Veloso na tumestigo sa pamamagitan ng written deposition laban sa mga nag-recruit sa kanya.

Ayon sa Migrante International, ang magiging testimonya ni Veloso na kasalukuyang nasa death row sa Indonesia ay magpapalakas sa mga kasong human trafficking, illegal recruitment at estafa na isinampa laban kina Ma. Cristina Sergio at Julius Lacanilao na nakabinbin sa Nueva Ecija Regional Trial Court.

Nabatid na ang pinakahuling pagdinig para sa presentasyon ng mga testigo ng prosekusyon ay isasagawa sa Setyembre 26.

Magugunitang naaresto si Veloso sa Indonesia noong 2009 at pinatawan ng parusang bitay dahil sa nakitang heroin sa kanyang bagahe.

Nakapagtala ng pinakamataas na bilang ng Human Immunodeficiency Virus o HIV infections sa buong bansa ang tatlong lungsod sa Bulacan.

Ayon kay Ron Chie Santos, head nurse ng HIV unit ng Bulacan Medical Center, ito’y kinabibilangan ng Meycauayan, Malolos at San Jose Del Monte.

Sa kauna-unahang LGBTQ+ Leadership Summit, isiniwalat din ni Santos na nasa 2,270 HIV cases ang naitala sa Bulacan simula noong 1984 hanggang ngayong taon.

Sinasabing 257 cases ang na-monitor sa San Jose Del Monte, 123 sa Meycauayan at 115 naman sa Malolos.

Parehong 102 HIV cases naman ang naitala sa mga bayan ng Sta. Maria at Marilao.

Nanawagan ang Manila Traffic and Parking Bureau (MTPB) sa libu-libong motorista na samantalahin ang amnesty program ng lokal na pamahalaan.

Ayon kay MTPB Director Dennis Viaje, tinatayang 50,000 motorista ang hindi pa natutubos ang kanilang driver’s license simula noong 2014 dahil sa iba’t ibang mga paglabag.

Dahil dito, pinayuhan ni Viaje ang mga nabanggit na motorista na kumuha na lamang ng ‘affidavit of loss’ at mag-apply ng panibagong lisensya sa halip na magbayad ng multa.

Nabatid na mayroon nang kasunduan ang city government at Land Transportation Office (LTO) na magiging epektibo sa susunod na taon kung saan maaaring ma-monitor kung talagang nawala o hindi ang lisensya ng isang motorista.

Pinatawan ng Sandiganbayan ng hanggang 8 taong pagkakabilanggo ang isang dating regional director ng Department of Education (DepEd) dahil sa maanomalyang pagbili ng halos 3M halaga ng information technology o I.T. equipment noong 2008.

Sa 21 pahinang desisyon ng 3rd dibisyon ng anti-graft court, napatunayang guilty si Walter Albos, dating DepEd Zamboanga Regional Director sa kasong paglabag sa Republic Act 3019 o anti-graft and corrupt practices act.

Inatasan din ng korte si Albos na magbayad ng katumbas ng halaga ng mga I.T. equipment at hindi na rin ito maaaring humawak ng anumang posisyon sa gobyerno.

Batay sa reklamo na isinampa sa Ombudsman noong 2016, natuklasan na iginawad ang mahigit sa 2.9M pesos na halaga ng kontrata sa isang private supplier nang walang public bidding at walang approval ng regional bids and awards committee ng DepEd.